Yobo 33

₁“Ndza kombela wena Yobo, rhiya ndleve,

u yingisa marito ya mina hinkwawo.

₂Ndzi tiyimisele ku vulavula,

marito ya kona ma ndzi tate nomo.

₃Ndzi ta ku byela leswi ndzi swi tivaka,

hi mbilu yo basa ni nomo wo tenga,

₄hikuva Moya wa Xikwembu, hi wona wu ndzi vumbeke,

Lowa-matimba-hinkwawo ú ndzi huhutele wona, a ndzi nyika vutomi.

₅Ndzi hlamule loko u swi kota,

u tilunghisela ku phikisana na mina.

₆Emahlweni ka Xikwembu, mina na wena ha ringana,

ndzi lo vumbiwa na mina hi ntshuri wa misava.

₇Hikokwalaho u nga ndzi chavi, u nga rhurhumeli,

a ndzi nga ku vangeli leswi swi ku tikelaka.

₈“Ndzi ku twile we Yobo, loko u vulavula,

mpfumawulo wa marito ya wena wu ndzi fikerile.

₉U te: ‘Nandzu ndzi hava, a ndzi dyohanga nchumu,

ndzi loyi a tengeke, xo biha a xi kona eka mina.

₁₀Xikwembu xi kumile ndlela yo lwa na mina,

xi ndzi teka ndzi ri nala wa xona;

₁₁xi ndzi bohile milenge;

hinkwako, xo ndzi sala ndzhaku!’

₁₂We Yobo, wa hoxa loko u vurisa leswi,

ndzi tshike ndzi ku byela: Xikwembu i xikulu ku tlula munhu.

₁₃Hikwalaho ka yini u vilela hi xona, u ku:

‘Marito ya mina hinkwawo, xa ala ku ma hlamula!’

₁₄Xikwembu xi vulavula hi tindlela to hambana-hambana

kambe vanhu a va xi twi.

₁₅Xi tirhisa milorho ni swivono swa vusiku,

loko vanhu va ha hluriwa hi vurhongo,

va etlele emasangwini.

₁₆Kutani xi va hlevetela etindleveni,

xi va tsundzuxa, xi tlhela xi fungha:

₁₇Xi va tshikisa mintirho ya vona leyo biha,

xi va sivela ku tikurisa.

₁₈Xi ponisa vutomi bya vona esirheni,

xi va sirhelela ematlharini.

₁₉“Xikwembu xi nga tshinya munhu hi switlhavi, xi n'wi etlerisa emasangwini,

marhambu ya yena ma pandza ma nga miyeli.

₂₀Swakudya swi n'wi hlambisa timbilu,

a hlanta ni leswo xawula.

₂₁Miri wa yena wu herile, a wa ha languteki,

marhambu na wona ma humela handle.

₂₂Emahlweni ka yena, sirha ri lo ahlama,

ú rhelela a ya eka va le hansi.

₂₃Kambe munhu loyi a nga tshuka a pfuniwa hi ntsumi leyi nga ta n'wi yimela eka Xikwembu;

hambi yo va yin'we exikarhi ka madzana-dzana, yi ta n'wi tsundzuxa tifanelo.

₂₄Yi ta n'wi twela vusiwana, yi ku ka Xikwembu:

‘We HOSI, u nga tshiki munhu loyi a hojomela esirheni,

ndzi kumile xo riha milandzu ya yena!’

₂₅Kutani ú ta hola a tsaka emirini,

a kuma ntamu wa vuntshwa bya yena.

₂₆Ú ta huwelela eka Xikwembu; xona xi ta n'wi tsakela,

xi tikomba eka yena esikwini ra ntsako,

a tlhela a va wo lulama eka xona.

₂₇Ú ta suma risimu, a tivisa vanhu a ku:

‘A ndzi dyohile ndzi tshika leswi lulameke,

kambe Xikwembu a xi ndzi tshikanga.

₂₈A ndzi rhelela ndzi ya esirheni, kambe xi ndzi kutsurile;

ndza ha ta hanya ndzi vona ku xa ka dyambu!’

₂₉“Hi wona maendlele yo hambana-hambana ya Xikwembu,

hi swona leswi xi swi endlelaka vanhu minkarhi hinkwayo.

₃₀Xi va tsavula exidziveni xa rifu,

xi va hanyisa ni ku va voninga.

₃₁“Wena Yobo, rhiya ndleve u ndzi yingisa,

u nga ndzi tsemi nomo, ndza ha vulavula.

₃₂Loko wa ha ri na rito, a hi hlamulane,

vulavula, hikuva ndzi nga tsaka ku twa leswaku u munhu wo lulama.

₃₃Kambe loko u ri hava rito, u to miyela u ndzi yingisa,

kutani ndzi ta ku dyondzisa vutlhari.”