Yobo 35

₂“We Yobo, xana u vona swi lulamile xana, loko u ku:

‘A ndzi na nandzu emahlweni ka Xikwembu!’

₃U vutisela yini u ku: ‘Ndzi ta vuyeriwa ha yini,

ndzi ta kuma yini loko ndzi nga dyohi xana?’

₄Mina ndzi ta ku hlamula,

wena ni vanghana va wena.

₅Languta matilo ni mapapa ya kona:

Ma tlakukile ngopfu ku ku tlula.

₆Loko u dyoha, a wu vavisi Xikwembu,

hambi u tlula nawu u vuyelela, Xikwembu a xi khumbeki hi swona.

₇Ni loko u endla leswi lulameke, u xi nyika yini,

xi amukela yini xo huma eka wena, ke?

₈Ku homboloka ka wena ku vavisa munhu-kuloni,

na kona ku lulama ka wena, ku pfuna yena ntsena.

₉“Lava xanisekaka ngopfu, va huwelela,

va rila loko vafumi va va tshikelela.

₁₀Kambe ku hava na un'we la vitanaka Xikwembu a ku: ‘U kwihi wena Muendli wa hina,

wena u hi tiyisaka hi tinsimu ni le vusikwini.

₁₁U kwihi ke, wena u hi nyikaka vutlhari

byo tlula bya swiharhi ni bya tinyanyana xana?’

₁₂Lava xanisiwaka hi vatikurisi ni vadyohi,

va huwelela, kambe a va hlamuriwi.

₁₃Munhu la rilaka ntsena, Xikwembu a xi n'wi twi,

xona xi nga ni matimba hinkwawo, a xi n'wi twi.

₁₄Kutani xi nga ku vonisa ku yini wena ke, leswi u vulaka leswaku a wu xi voni,

ni leswaku wa ha yimela xona ku tsema mhaka ya wena!

₁₅Wena u ri, a xa ha bi vadyohi hi vukari bya xona,

a xi na mhaka ngopfu ni lava tiarisaka.

₁₆We Yobo, marito lawa ya wena i matlangwana,

u phyaphyarha hi leswi u nga swi tiviki!”