Yonasi 2

₂“Ekhombyeni ra mina, ndzi ku vitanile we HOSI,

kutani u ndzi hlamurile;

ndzi komberile ku pfuniwa ndzi ri exivandleni xa vafi,

kutani wena u yingisile ku rila ka mina.

₃U ndzi hoxile exidziveni, exivindzini xa malwandle,

mati layo tala ma ndzi funengetile;

magandlati ya wena ni maboboma ya wena hinkwawo

ma hundzile hi le henhla ka mina.

₄Kutani a ndzi ku, ndzi hlongoleriwe

kule ni mahlo ya wena.

Hambiswiritano, Tempele ya wena leyo hlawuleka,

ndzi ta tlhela ndzi yi vona.

₅Mati a ma ndzi rhendzerile ku fika enhan'wini,

kutani magandlati ya xidziva ma ndzi khubumeta;

swimila swa lwandle a swi ndzi tsondzela nhloko.

₆Ndzi mbombomerile emasungulweni ya tintshava,

etikweni ra le hansi leri tinyangwa ta rona

a ti lava ku ndzi pfalela hilaha ku nga heriki.

Kambe wena HOSI Xikwembu xanga,

u tsavurile vutomi bya mina ekheleni ra vafi.

₇Loko ndzi ri kusuhi ni ku nyiketa moya wa mina,

ndzi ku anakanyile;

xikhongelo xa mina xi fikile eka wena,

eTempeleni ya wena leyo hlawuleka.

₈Lava namarhelaka swikwembu swa hava

va hambana ni vukhongeri bya xiviri.

₉Kambe loko a ri mina,

ndzi ta endla leswi ndzi swi hlambanyeke:

Ndzi ta ku humesela magandzelo, hi tinsimu to tlangela.

Hakunene Xikwembu xa ponisa!”