Yoxuwa 19

₁Kutani ku huma xiphemu xa vumbirhi lexi averiweke va ka Simiyoni hi ku ya hi mindyangu ya vona. Ndzhaka ya vona a yi ri xikarhi ka ndzhaka ya va ka Yuda. ₂Ndzhaka ya vona yi katsa miti leyi: Berexeba, na Xeba, na Molada; ₃na Hasari-Xuwala, na Bala, na Esemu; ₄na Elitolada, na Betuli, na Horma; ₅na Sikilaga, na Beta-Marikaboto, na Hasari-Susa; ₆na Beta-Lebawoto, na Xaruheni. Miti ni swimitana swa yona i 13. ₇Miti yin'wana hi leyi: Ayini, na Rimoni, na Etere, na Axani. Miti ni swimitana swa yona i mune. ₈Ku katsiwa ni swimitana hinkwaswo leswi rhendzeleke miti leyi ku ya fika eBaalata-Bere, wu nga muti wa Rhama lowu wu nga edzongeni. Leyi hi yona ndzhaka ya va ka Simiyoni hi ku ya hi mindyangu ya vona. ₉Ndzhaka leyi yi averiweke va ka Simiyoni a xi ri xiphemu xa tiko ra va ka Yuda, hikuva va ka Yuda a va averiwile xiphemu lexikulu; kutani xiphemu xin'wana xa tiko leri a ri ri ra va ka Yuda xi nyikiwile va ka Simiyoni.

₁₀Kutani ku huma xiphemu xa vunharhu lexi averiweke va ka Zebuloni, hi ku ya hi mindyangu ya vona. Ndhawu leyi yi nga ndzhaka ya vona yi famba ku ya fika eSaridi. ₁₁Kutani ndzilekana wa kona wu tlhandluka wu kongoma evupeladyambu etlhelo ra Mariyala wu hundza hi le Dabexeti, wu ya fika exinkobyaneni lexi xi nga evuxeni bya Yokineyama. ₁₂Ku suka eSaridi ndzilekana wu jika wu kongoma endzilekaneni wa Kisiloti-Taboro, hi tlhelo ra le vuxeni, wu hundza wu ya eDaberata, kutani wu ya fika eYafiti. ₁₃Ku suka kona, wu kongoma evuxeni eGati-Hefere ni le Eti-Kasini, wu hundza wu ya fika eRimoni, wu jika wu kongoma eNeya. ₁₄Hi tlhelo ra le n'walungwini, ndzilekana wu jikela eHanatoni wu ya helela eka Nkova wa Yifita-Eli. ₁₅Ndzilekana wu katsa ni miti leyi: Katati, na Nahalala, na Ximroni, na Yidala, na Betlehema. Miti ni swimitana swa yona i 12. ₁₆Miti leyi ni swimitana swa yona hi yona ndzhaka ya va ka Zebuloni hi ku ya hi mindyangu ya vona.

₁₇Kutani ku huma xiphemu xa vumune lexi xi averiweke va ka Isakara hi ku ya hi mindyangu ya vona. ₁₈Tiko ra vona ri katsa miti leyi: Yizriele, na Kesuloto, na Xuneme; ₁₉na Hafarayimi, na Xiyoni, na Anaharati; ₂₀na Rabiti, na Kixiyoni, na Ebeze; ₂₁na Remete, na Eni-Ganimi, na Eni-Hada, na Beta-Pasese. ₂₂Ndzilekana wu katsa ni tindhawu leti: Taboro, na Xahasuma, na Beta-Xemexe, kutani wu ya helela enambyeni wa Yordani. Miti ni swimitana swa yona i 16. ₂₃Miti leyi ni swimitana swa yona hi yona ndzhaka ya va ka Isakara hi ku ya hi mindyangu ya vona.

₂₄Kutani ku huma xiphemu xa vuntlhanu lexi xi averiweke va ka Asere hi ku ya hi mindyangu ya vona. ₂₅Tiko ra vona ri katsa miti leyi: Helikati, na Hali, na Beteni, na Akixafa; ₂₆na Alameleke, na Amadi, na Mixala. Hi tlhelo ra vupeladyambu ndzilekana wu hundza hi le Karmele na le Xihoro-Libinata. ₂₇Kutani wu jika wu kongoma eBeta-Dagoni evuxeni, wu hundza hi le Zebuloni ni le ka Nkova wa Yifita-Eli, wu kongoma en'walungwini eBeta-Emeke na Neyiele, wu ya emahlweni wu ya ta hi le Kabulu, ₂₈ni le Ebrona, ni le Rehobo, ni le Hamoni, ni le Kana, wu ya fika ni le Sidoni lonkulu. ₂₉Kutani ndzilekana wu jika wu kongoma eRhama, wu fika ekhokholweni ra Tiri wu jika wu kongoma eHosa, wu ya helela elwandle. Ndzilekana wu katsa ni miti leyi: Mahalabu, na Akizibi, ₃₀na Uma, na Afeke, na Rehobo. Miti ni swimitana swa yona i 22. ₃₁Miti leyi ni swimitana swa yona hi yona ndzhaka ya va ka Asere hi ku ya hi mindyangu ya vona.

₃₂Kutani ku huma xiphemu xa vu-6 lexi xi averiweke va ka Neftali hi ku ya hi mindyangu ya vona. ₃₃Ndzilekana wa tiko ra vona wu sukela eHelefa wu ya ta hi le nkuhlwini lowu nga Saananimi, ni le Adaminekeba, ni le Yabinele, ni le Lakumi, wu ya helela enambyeni wa Yordani. ₃₄Kutani ndzilekana wu jika wu kongoma le Azinoto-Tabori evupeladyambu. Ku suka kona wu kongoma eHukoko, wu ya hundza hi le dzongeni ra Zebuloni, ni le vupeladyambu bya Asere, wu ya ta hi le Yordani evuxeni bya Yuda. ₃₅Miti ya makhokholo hi leyi: Sidimi, na Sere, na Hamata, na Rakata, na Kinereta, ₃₆na Adama, na Rhama, na Hasoro, ₃₇na Kedexe, na Edreyi, na Eni-Hasori; ₃₈na Yironi, na Migidali-Ele, na Horeme, na Beta-Anati, na Beta-Xemexe. Miti ni swimitana swa yona i 19. ₃₉Miti leyi ni swimitana swa yona hi yona ndzhaka ya va ka Neftali hi ku ya hi mindyangu ya vona.

₄₀Kutani ku huma xiphemu xa vu-7 lexi averiweke va ka Dani hi ku ya hi mindyangu ya vona. ₄₁Tiko leri ri nga ndzhaka ya vona ri katsa miti leyi: Sora, na Exitawulu, na Yiri-Xemexe; ₄₂na Xaalabini, na Ayaloni, na Yitila; ₄₃na Elone, na Timina, na Ekroni; ₄₄na Elteke, na Gibetoni, na Baalata; ₄₅na Yehudi, na Bene-Beraka, na Gati-Rimoni; ₄₆na Me-Yarikona, na Rakoni, ni ndhawu leyi langutaneke ni muti wa Yopa. ₄₇Loko va ka Dani va tsandzekile ku teka tindhawu leti va averiweke tona, va tlhandlukile va ya hlasela muti wa Lexeme va wu hlula. Kutani va dlaya vaaki va wona hi fumu, va teka muti lowu wu va wa vona, va tshama eka wona, va wu thya vito ra Dani kokwa wa vona. ₄₈Miti leyi ni swimitana swa yona hi yona ndzhaka ya va ka Dani hi ku ya hi mindyangu ya vona.

₄₉Loko Vaisraele va hetile ku avelana tindhawu hinkwato ta tiko, leti a ti fanele ku va ndzhaka ya vona, va nyikile Yoxuwa n'wana Nuni ndzhaka ya yena exikarhi ka vona. ₅₀Vaisraele va endlile hilaha HOSI Xikwembu xi va leriseke hakona. Va nyika Yoxuwa ndhawu leyi a kombeleke yona, wu nga muti wa Timinata-Sera, lowu wu nga emagangeni ya Efrayimi. Kutani Yoxuwa a pfuxa muti lowu, a tshama eka wona.

₅₁Leyi hi yona ndzhaka leyi muprista Eliyazara na Yoxuwa n'wana Nuni ni varhangeri va mindyangu ya tinyimba ta Vaisraele va yi aveke hi ku tirhisa vuhlolotwana emahlweni ka HOSI Xikwembu le Xilo, enyangweni ya Ntsonga lowo Hlawuleka. Hi ndlela leyi, ku va loko va hetile ku avela vanhu etiko.