Swirilo 3

₁Ndzi munhu loyi a voneke maxangu,

hikuva N'wini wa hinkwaswo ú ndzi bile ngopfu.

₂Ú ndzi khayimile a ndzi yisa

exinyamini lexo chavisa.

₃Hakunene, siku rin'wana ni rin'wana

ú tshamela ku ndzi ba.

₄Ú hlakatile miri wa mina hinkwawo,

a ndzi tshova ni marhambu.

₅Ú ndzi rhendzerile, a ndzi phutsela

hi mbitsi ni nhlomulo;

₆ú ndzi tshamisisile exinyamini,

ku fana ni vanhu lava feke khale.

₇Ú ndzi pfalerile ekhotsweni leswaku ndzi nga baleki,

a ndzi bona hi tinketani leto tiya.

₈Hambiloko ndzi huwelela ndzi kombela ku pfuniwa,

a nga yingisi xikhongelo xa mina.

₉Ú ndzi pfalela tindlela hi maribye lamakulu,

a gombonyokisa budula ra mina.

₁₀Eka mina ú fana ni xinkankanka lexi xi ndzi bvutameleke,

onge i nghala leyi yi ndzi tumbeleleke.

₁₁Ú ndzi pfalerile tindlela, a ndzi handzulela,

a ndzi siya ndzi nga ha pfuni nchumu.

₁₂Ú kongile vurha bya yena,

a ndzi copa hi nseve.

₁₃Ú hlomurile miseve enkotlotweni wa yena,

a ndzi tlhava mbilu ha yona.

₁₄Ndzi hundzukile xihlekiso exikarhi ka va ka hina hinkwavo,

siku hinkwaro va ndzi hlekula hi tinsimu.

₁₅Ú ndzi dyisa leswo bava ndzi ko ndzi hlamba timbilu,

a ndzi nwisa nyongwa ndzi kala ndzi hlanta.

₁₆Ú ndzi wiserile etaleni,

ndzi funya nkuma;

₁₇ú ndzi pfumata ku rhula emoyeni,

ndzi rivele ni leswaku ku tsaka swi vula yini!

₁₈Sweswi ndzi ri, a ndza ha hanyeli nchumu,

a ndza ha ri na leswi ndzi nga swi langutelaka eka HOSI Xikwembu.

₁₉Loko ndzi tsundzuka nhlomulo ni ku pepetseka ka mina,

onge ndzo nwisiwa nyongwa leyi bavaka.

₂₀Ndzi tshama ndzi ri karhi ndzi swi tsundzuka,

kutani swi ndzi heta matimba.

₂₁Kambe swi kona swin'wana leswi ndzi swi langutelaka,

leswi ndzi swi tshembaka, swi nga leswi:

₂₂Rirhandzu ra HOSI Xikwembu a ri heli,

tintswalo ta xona a ti na makumu;

₂₃ti vonaka ti ri tintshwa siku rin'wana ni rin'wana.

Ku tshembeka ka wena HOSI, i kukulu!

₂₄Ndzi vula sweswo ndzi ri: HOSI Xikwembu i ndzhaka ya mina,

hikokwalaho ndzi veka ku tshemba ka mina eka xona.

₂₅HOSI Xikwembu xi ni vunene eka lava va xi tshembaka,

eka vanhu lava va xi lavaka.

₂₆Hikokwalaho swi sasekile

loko munhu a lehisa mbilu, a langutela leswaku HOSI Xikwembu xi n'wi ponisa.

₂₇I mhaka leyinene loko munhu a dyondza ku rhwala maxangu

a ha ri lontshwa.

₂₈Munhu loyi Xikwembu xi n'wi rhwexeke maxangu,

a a tikhome a tiyisela;

₂₉a a titsongahate swinene,

kumbexana a nga ha nyikiwa ku tshemba;

₃₀a a kangatele rhama eka loyi a n'wi baka,

a amukela ni ku rhukaniwa.

₃₁N'wini wa hinkwaswo a nge tshiki munhu

a n'wi tshikela makumu;

₃₂hambiloko a tisela munhu ku vaviseka, wa ha ta n'wi tsetselela

hikwalaho ka rirhandzu ra yena lerikulu, ro tshembeka;

₃₃a nga swi tsakeli ku tsongahata vanhu,

kumbe ku va tisela makhombo.

₃₄Ku rahetela mubohiwa un'wana ni un'wana

laha tikweni,

₃₅ni ku bakanyela etlhelo tifanelo ta munhu

emahlweni ka Loyi a nga henhla-henhla,

₃₆ni ku gombonyokisa mhaka ya yena ehubyeni,

N'wini wa hinkwaswo a nga lavi ni ku swi vona!

₃₇Loko N'wini wa hinkwaswo a nga lerisanga nchumu,

xana i mani loyi a nga vulaka rito, kutani swilo swi humelela, xana?

₃₈Minkateko ni makhombo a swi humeleli,

loko Loyi a nga henhla-henhla a nga lerisanga.

₃₉Xana munhu ú vilelela yini

loko a beriwa swidyoho swa yena, kambe a nga tekeriwanga vutomi xana?

₄₀A hi tikambeni, hi xiyaxiya tindlela ta hina,

kutani hi tlhelela eka HOSI Xikwembu.

₄₁A hi tlakuseni mavoko,

hi khongela Xikwembu xa le matilweni hi timbilu ta hina hinkwato, hi ku:

₄₂“Hi tiarisile hi ku dyohela we HOSI,

kutani a wu hi rivalelanga.

₄₃“Eku hlundzukeni ka wena, u hi tumbelerile,

u hi hlongorisa ni ku hi dlayetela u nga tsetseleli.

₄₄U tifihlile hi papa

leswaku swikhongelo swi nga ha ku fikeli.

₄₅Exikarhi ka vamatiko,

u hi hundzurile thyaka ra le taleni.

₄₆“Valala va hina hinkwavo

va hi hlekula,

₄₇va hi chavisa, va hi phasa,

va hi heta ni ku hi lovisa;

₄₈mahlo ya mina ma halata mihloti onge i nambu,

hikwalaho ka ku lovisiwa ka vanhu va ka hina.

₄₉“Mihloti ya mina yi ta halaka

vusiku ni nhlekanhi, yi nga yimi,

₅₀ku kondza loko HOSI Xikwembu

xi languta xi ri etilweni, xi swi vona:

₅₁Mahlo ya mina ma fehla,

loko ndzi vona leswi humelelaka vanhu va muti wa ka hina.

₅₂“Valala va mina va ndzi hlotile onge ndzi xinyanyana,

kasi a ndzi na nandzu.

₅₃Va ndzi wiserile ekheleni ndza ha hanya,

va tlhela va ndzi hoxetela hi maribye.

₅₄Ndzi mbombomerile ematini,

kutani ndzi ku: ‘Yóò, ndzi lovile!’

₅₅“We HOSI, ndzi huwelerile eka wena

ndzi ri ehansi ekheleni.

₅₆U twile xikombelo xa mina loko ndzi te:

‘U nga ali ku twa ku konya ka mina, loko ndzi kombela ku pfuniwa.’

₅₇Siku ndzi ku vitaneke, u tile kusuhi na mina,

u ku: ‘U nga chavi!’

₅₈“We N'wini wa hinkwaswo, u yima na mina,

u biyelerile vutomi bya mina.

₅₉U vonile hilaha ndzi dyoheriwaka hakona we HOSI.

Avanyisa timhaka ta mina!

₆₀Makungu ya vona hinkwawo ya ku tirihisela ni ku lwa na mina,

u ma vonile.

₆₁“We HOSI, u twile loko va ndzi hlekula,

u vonile ni makungu ya vona hinkwawo ya ku lwa na mina.

₆₂Marito ni ku lumbeta ka lava va ndzi vengaka,

swa ndzi xanisa masiku hinkwawo.

₆₃Languta! Hambi va tshamile kumbe va yimile,

va le ku ndzi hlekuleni hi tinsimu.

₆₄“We HOSI, bana vanhu lava

hi ku ya hi leswi va ndzi endleke swona;

₆₅tlanyarisa timbilu ta vona,

u va fularhela;

₆₆we HOSI, va hlundzukele u va hlongorisa,

u va herisa, va nyamalala laha misaveni.”