Mikiya 6

“Suka u yima u boxa mhaka emahlweni ka tintshava,

swintshabyana swi ri karhi swi ku twa!”

₂N'wina tintshava, twanani milandzu leyi HOSI Xikwembu xi lavaka ku yi boxa,

ndzi vula n'wina masungulo ya misava lama nga kona hilaha ku nga heriki.

HOSI Xikwembu xi ni mhaka leyi xi lavaka ku yi kanela ni vanhu va xona,

xi lava ku tengisana ni Vaisraele.

₃HOSI Xikwembu xi ri:

“N'wina vanhu va mina, xana ndzi mi dyohele yini,

xana ndzi tshama ndzi mi tikisela vutomi xana? Ndzi hlamuleni!

₄Ndzi mi humesile etikweni ra Egipta,

ndzi mi kutsula evuhlongeni lebyi a mi ri ka byona,

kutani ndzi veka Muxe, na Aroni, na Meriyamu

ku va varhangeri va n'wina.

₅N'wina vanhu va mina, ehleketani makungu lawa Balaka hosi ya Mowabu a a ma bohile,

mi tsundzuka ni ndlela leyi Balaama n'wana Beyori a hlamuleke Balaka ha yona;

mi nga rivali na leswi humeleleke ku sukela eXitimi ku ya fika eGiligala,

mi ta tiva ndlela leyi mina HOSI ndzi mi poniseke ha yona.”

₆Vanhu va vutisa va ku:

“Xana HOSI Xikwembu xa le henhla-henhla, xi lava ku humeseriwa yini

loko hi ya emahlweni ka xona hi ya xi gandzela xana?

Xana hi fanele ku xi humesela magandzelo lama hisiwaka,

hi xi tlhavela swinkuzana swa lembe rin'we, xana?

₇Xana HOSI Xikwembu xi nga tsakela ku tlhaveriwa makhuna ya madzana-dzana,

kumbe ku humeseriwa mafurha lama nga tataka ni milambu ya ntsandza-vahlayi xana?

Xana hi nga humesa magandzelo hi vana va hina va mativula,

leswaku HOSI Xikwembu xi hi rivalela ku tiarisa ka hina ni swidyoho swa hina, xana?”

₈Mikiya a hlamula a ku:

“N'wina vanhu, mi byeriwile leswinene

leswi HOSI Xikwembu xi lavaka leswaku mi endla swona:

I ku endla leswi lulameke, mi tshembeka minkarhi hinkwayo,

mi hanya hi ku titsongahata emahlweni ka Xikwembu xa n'wina!”

₉Vanhu lava chavaka vito ra HOSI Xikwembu, va ta ponisiwa;

twanani, xi huwelela vaaki va muti, xi ku:

“Yingisani n'wina hinkwenu va ka Yuda, lava hlengeletaneke emutini wa Yerusalema!

₁₀Xana ndzi nga rivalela lavo homboloka lava tataka tindlu ta vona hi swilo leswi va swi kumeke hi tindlela to homboloka,

lava tirhisaka mimpimo leyi nga riki yona, yi nga leyi ndzi yi vengaka, xana?

₁₁Xana ndzi nga ntshunxa enandzwini loyi a tirhisaka swikalu leswi xisaka,

kumbe maribye yo pima ha wona lama nga helelangiki, xana?

₁₂Van'wankumi va muti lowu va tele tihanyi,

vaaki va wona vo dzumbela ku hembelana

ni ku kanganyisana.

₁₃Hikokwalaho ndzi ta mi vangela vuvabyi lebyo chavisa,

hinkwenu mi ta hela mi ku bi, mi dlayisa hi swidyoho swa n'wina.

₁₄Mi ta dya, kambe a mi nga xurhi,

mi ta tshama mi ri karhi mi twa ndlala minkarhi hinkwayo;

mi ta ringeta ku fihla leswi mi nga na swona,

kambe swi nga ka swi nga poni;

leswi swi nga ta va swi ponile,

ndzi ta swi herisa hi tinyimpi.

₁₅Masimu mi ta rima, kambe a mi nga tshoveli;

mihandzu ya mirhi ya mitlhwari mi ta khuvuta, kambe a mi nga toli mafurha ya kona;

ni mihandzu ya vhinya mi ta pyanyela,

kambe vhinyo ya kona a mi nga yi nwi.

₁₆Mi landzile milawu ya Omri

ni mahanyelo hinkwawo ya va ka Akabu,

mi endla hinkwaswo leswi a va swi endla;

hikokwalaho ndzi ta endla leswaku vanhu va mi nyenya;

loko va vona va ka n'wina, va ta hlakahla tinhloko,

mi ta va xihlekiso exikarhi ka vanhu va matiko.”