Nahume 1

₂HOSI i Xikwembu xa rilondzo, lexi rihisetaka.

HOSI ya rihiseta, ya kariha;

HOSI yi tirihisela eka valala va yona,

yi karihela lava va yi vengaka.

₃Hambileswi HOSI yi hlwelaka ku kariha, yi ni matimba lamakulu,

yi nga ka yi nga tshiki lava nga ni nandzu.

HOSI yi pfula ndlela ya yona hi xihuhuri ni bubutsa,

mapapa i ritshuri leri pfuxiwaka hi milenge ya yona.

₄Yi tshinya lwandle, kutani ri phya,

yi omisa milambu hinkwayo;

swimila swa Baxani ni swa Karmele swa vuna,

swiluva swa Lebanoni swa dzudzeka.

₅Tintshava ta ninginika, loko HOSI yi humelela,

switsunga swa mbundzumuka;

misava ya tsekatseka emahlweni ka yona,

matiko ni vaaki va wona hinkwavo va rhurhumela.

₆Xana i mani la nga tiyaka emahlweni ka vukari bya yona xana?

Ku hlundzuka ka yona loku pfurhaka, ku nga tiyela hi mani xana?

Vukari bya yona bya hangalaka ku fana ni ritshwa,

maribye ma fayeka loko yi humelela.

₇HOSI Xikwembu i Xikwembu lexinene,

i khokholo hi siku ra khombo;

xi hlayisa lava chavelaka eka xona.

₈Hi siku leri ndhambi ya mati yi taka ha rona,

HOSI yi ta lovisa xivandla hinkwaxo xa Ninivha,

yi ta hlongolela valala va yona emunyameni.

₉Xana i xikungu muni

lexi mi xi tshamaka HOSI xana?

Xikungu xexo, yi ta xi herisela makumu,

yi nga ka yi nga tirihiseli kambirhi eka valala va yona.

₁₀Va kotisa mitwa leyi phasaneke,

va fana ni vanhu lava pyopyiweke loko va nwile.

Va ta tshwa kukotisa byanyi lebyi omeke,

va tshwela makumu.

₁₁Munhu wa makungu layo biha ya ku lwa ni HOSI, loyi a byeleteleke vanhu leswi nga pfuniki nchumu,

ú huma eka wena Ninivha.

₁₂HOSI Xikwembu xi vurisa sweswo, xi ri:

“Hambiloko va le Asiriya va nga kayiveli nchumu, hambiloko va tele,

va ta tsemiwa, va nyamalala.

Hambileswi ndzi ku tsongahateke wena Yuda tiko ra mina,

a ndzi nga ha tlheli ndzi ku tsongahata.

₁₃Sweswi ke, ndzi ta tshova joko ra Asiriya

leri ri ku tikelaka, ndzi ta tsema tinketani leti ti ku bohaka.”

₁₄HOSI Xikwembu xi lerisile timhaka hi tlhelo ra wena, xi ku:

“A wu nga ha vi na vatukulu ku yisa xivongo xa wena emahlweni.

Ndzi ta susa swifaniso swa swikwembu swa wena, swa mintsandza ni swa koporo, etempeleni ya swona.

Ndzi karhi ndzi cela sirha ra wena,

hikuva a wa ha ri nchumu.”

₁₅Langutani! Murhumiwa wa ta hi le tintshaveni;

ú tisa mahungu lamanene,

ni ku tivisa timhaka ta ku rhula.

N'wina vanhu va Yuda, cinani minkhuvo ya n'wina,

hetisani leswi mi swi hlambanyeke,

hikuva muonhi a nga ka a nga ha hlaseli tiko ra n'wina, ni siku ri rin'we,

ú heriseriwe ra makumu.