Pisalema ya 114

₁Loko Vaisraele va humile etikweni ra Egipta,

loko vona va ka Yakobo va hambanile na vanhu lava, lava vulavulaka ririmi ro karhata,

₂HOSI Xikwembu xi tihlawulele va ka Yuda va va vanhu va xona,

xi hlawurile Vaisraele leswaku va fumiwa hi xona.

₃Lwandle ri tsutsumile loko ri va vona,

na wona nambu wa Yordani wu tlhelele ndzhaku.

₄Tintshava ti tlula-tlurile kukota tinyimpfu,

switsunga swi tlalamba tanihi swinyimpfana.

₅We lwandle, xana u tsutsumisa ha yini?

Na wena Yordani, i ncini xi ku tlheriselaka endzhaku xana?

₆N'wina tintshava mi tlula-tlurisa hi yini kukota tinyimpfu,

na n'wina switsunga mi tlalambisa hi yini tanihi swinyimpfana xana?

₇Wena misava, rhurhumela emahlweni ka N'wini wa hinkwaswo,

xona Xikwembu xa va ka Yakobo,

₈hikuva hi xona xi humeseke tiva ra mati emakwandzasini,

xi boxa xihlovo eribyeni lero nonon'hwa.