Pisalema ya 140

₁We HOSI, ndzi lamulele eka vanhu lavo homboloka,

u ndzi sirhelela eka lava nga ni tihanyi.

₂Vanhu lava, va boha makungu layo biha,

va le ku pfuxeni ka tinyimpi.

₃Marito ya vona ma tlhava kukota meno ya nyoka,

ku vulavula ka vona ka dlaya ku fana ni vuxungu bya mhiri.

₄We HOSI, ndzi lamulele emavokweni ya lavo homboloka,

u ndzi biyelela eka vanhu va tihanyi

lava tsakelaka ku ndzi wisa.

₅Vanhu lava va manyunyu va ndzi tumbelerile va lava ku ndzi phasa,

endleleni ya mina va rhiyile mintlhamu, va veka ni swirimbana.

₆We HOSI, ndzi vulavula na wena ndzi ri: U Xikwembu xa mina,

rhiya ndleve u yingisa xirilo xa mina.

₇We HOSI N'wini wa hinkwaswo, wena mukutsuri wanga la nga ni matimba,

u ndzi sirhelerile enkarhini wa nyimpi.

₈U nga pfumeli leswaku lavo homboloka va kuma leswi va swi navelaka;

va nga tshuki va humelela emakungwini ya vona, hikuva va nga tshuka va tikukumuxa!

₉Endla leswaku marito layo biha ya lava va ndzi hembelaka,

ma vuya hi vona.

₁₀A va wele hi makala lama vuvumelaka,

va hoxiwa ekheleni ra ndzhope va nga ha humi!

₁₁Lava hembelaka van'wana, a va herisiwe etikweni,

vanhu va tihanyi a va hatlise va wela ekhombyeni.

₁₂Ndza swi tiva leswaku HOSI Xikwembu xi yima ni lava xanisiwaka,

xi avanyisela swisiwana timhaka ta swona hi ndlela yo lulama.

₁₃Ina, lavo lulama va ta twarisa vito ra wena,

va ta tshama na wena minkarhi hinkwayo.