Pisalema ya 41

₁Ku katekile munhu loyi a anakanyaka swisiwana;

siku a welaka ekhombyeni, HOSI Xikwembu xa n'wi lamulela,

₂xi n'wi hlayisa ni ku n'wi nyika vutomi,

xi n'wi katekisa emisaveni,

a xi n'wi tshiki a wela emavokweni ya valala va yena.

₃HOSI Xikwembu xa n'wi tiyisa loko a vabya,

loko a ri esangwini ra vuvabyi, xa n'wi ongola.

₄Mina ndzi te: “We HOSI, ndzi twele vusiwana, u ndzi horisa,

hambileswi ndzi ku dyoheleke.”

₅Valala va mina va luka mano va ku:

“Xana ú ta fa rini munhu loyi, hi ta ka hi nga ha vulavuli hi yena!”

₆Loko un'wana a ta ku ta ndzi pfuxela,

wo tela ku ta ndzi koya ntsena,

a ri karhi a xopa-xopa

leswi a nga ta ndzi onha vito ha swona loko a humile.

₇Hinkwavo lava va ndzi vengaka, va hlengeletana va ndzi hleva,

va ndzi navelela swo biha,

₈va ku: “Khote, hambi kona!

Leswi a etleleke, onge ú ta pfuka!”

₉Hambi a ri munghana wa mina loyi a ndzi n'wi tshemba, loyi a ndzi dya na yena,

sweswi ú lwa na mina.

₁₀Kambe we HOSI, ndzi twele vusiwana, u ndzi pfuxa,

leswaku ndzi ya tirihisela eka vona.

₁₁Loko valala va mina va tshika ku khana,

ndzi ta tiva leswaku wa ha ndzi tsakela.

₁₂U ta ndzi seketela, hikuva a ndzi na nandzu,

kutani u ta ndzi hlayisa kusuhi na wena hilaha ku nga heriki.

₁₃A ku nkhensiwe HOSI Xikwembu xa Israele,

sweswi ni hilaha ku nga heriki. Amen! Amen!