Pisalema ya 65

₁We Xikwembu, swa fanela leswaku u dzunisiwa emutini wa Siyoni,

ni swilo leswi vanhu va tiboheke ku ku humesela swona, a va swi humese.

₂U Xikwembu lexi yingisaka swikhongelo,

hikokwalaho vanhu hinkwavo va ta eka wena.

₃Timhaka leti hi nga ku dyohela ha tona,

ti hi tikela ku tlula mpimo,

kambe wena u nga hi rivalela milandzu ya hina.

₄Ku katekile munhu loyi u n'wi hlawuleke ku tshama exivaveni xa muti wa wena,

loyi u n'wi tshinetaka kusuhi na wena.

Na hina hi tsakisiwa hi leswo saseka endlwini ya wena,

swi nga leswo hlawuleka swa Tempele ya wena.

₅We Xikwembu muponisi wa hina, wa hi lwela,

u hi hlamula hi tindlela leto hlamarisa;

hambi va ri vanhu lava akeke ematikweni ya le kule

entsungeni wa malwandle, va tshemba wena.

₆Hi matimba ya wena, u tiyisile tintshava,

u ri karhi u komba vunhenha bya wena.

₇U miyeta huwa ya lwandle ni magandlati ya rona,

u herisa na pongo ra vanhu va matiko.

₈Hikokwalaho, emisaveni hinkwayo vanhu va hlamala

loko u va komba mintirho ya wena;

ku sukela evuxeni ku ya fika evupeladyambu,

u va bisa nkulungwana wa ntsako.

₉U tikarhatela misava hi ku yi nisela mpfula,

u yi andzisela minkateko.

We Xikwembu, mati ma khuluka emilambyeni ya wena,

u mirisa mavele emasin'wini ya vanhu;

misava ya kona u yi lulamisa swinene.

₁₀U cheleta laha ku rimiweke,

u fayetela mabuwa ya kona hi mpfula,

u hlekahlekisa misava hi n'wema,

u mirisa swimilana eka yona.

₁₁Lembe hinkwaro u ri sasekisa hi minkateko ya wena,

kun'wana ni kun'wana laha u hundzaka kona, vanhu va dya va xurha.

₁₂Madyelo ya rihlaza ma kumeka ni le mananga,

emagangeni hinkwawo ku twala tinsimu ta ntsako.

₁₃Etimbaleni ku tele tinyimpfu ni timbuti.

Mavele ma funengeta minkova,

ntumbuluko hinkwawo wu yimbelela wu tsakile.