Pisalema ya 69

₁We Xikwembu ndzi ponise,

hikuva ndzi lava ku dyiwa hi mati.

₂Ndzi hoxiwe ekheleni leri enteke ra ndzhope,

ku hava laha ndzi nga kandziyaka kona;

ndzi cukumetiwe exidziveni,

maboboma ma ndzi khubumeta.

₃Nkolo wa mina wu twa ku vava,

hikuva ndzi huwelele ngopfu, kutani ndzi karhele,

ni mahlo ya mina ma fehla hi ku ku langutela,

we Xikwembu xanga.

₄Lava va ndzi vengaka mahala,

va tele ku tlula misisi ya nhloko ya mina;

valala va mina lava, va ni matimba va ringeta ku ndzi herisa,

va ndzi hembela va ku ndzi fanele ku tlherisa leswi ndzi nga swi yivangiki.

₅We Xikwembu, u tiva vuphukuphuku bya mina,

milandzu ya mina ndzi nge koti ku ku fihlela yona.

₆We N'wini wa hina, HOSI ya matimba hinkwawo,

wena Xikwembu xa Israele,

u nga pfumeli leswaku lava va ku tshembaka ni ku ku khongela,

va khomiwa hi tingana ni ku tsongahatiwa hikwalaho ka mina.

₇Ndzi tshemba wena ntsena,

kambe hi swona swi ndzi vangelaka tingana ni ku rhuketeriwa hi vanhu.

₈Hambi va ri vamakwerhu, ndzi hundzuke muluveri eka vona,

vanhu va ka hina a va ha ndzi tivi.

₉Ku hisekela yindlu ya wena swa ndzi dya,

lava va ku rhuketelaka, va rhuketela mina.

₁₀Ndza rila ndzi titsona swakudya,

kambe sweswo swi ndzi vangela ndzhukano ntsena.

₁₁Loko ndzi ambala swiambalo swa nkosi,

va ndzi hlekula hikwalaho ka swona.

₁₂Lava dzumbaka enyangweni ya muti, va vulavula hi mina,

va ndzi hlekula hi tinsimu emabyalweni.

₁₃Loko ndzi ri mina we HOSI, ndzi khongela wena ntsena

enkarhini lowu lavekaka.

We Xikwembu, ndzi hlamule hi rirhandzu ra wena lerikulu,

hikuva hi wena muponisi la tshembekaka.

₁₄Ndzi humese endzhopeni

leswaku wu nga tshuki wu ndzi mita;

ndzi ponise eka lava va ndzi vengaka,

u ndzi tsavula exidziveni xa mati.

₁₅U nga pfumeli leswaku maboboma ni magandlati,

swi ndzi khubumeta ndzi nyamalala;

u nga ndzi tshiki ndzi seleteriwa ekheleni ra vafi.

₁₆We HOSI ndzi hlamule, hikuva rirhandzu ra wena ri saseke ngopfu;

etintswalweni ta wena letikulu, hundzuluka u ndzi languta.

₁₇Ndzi nandza wa wena, hikokwalaho u nga ndzi fularheli;

ndzi le maxangwini, hatlisa u ndzi hlamula.

₁₈Tshinela kusuhi na mina, u ndzi lamulela,

u ndzi ponisa emavokweni ya valala.

₁₉Wa swi tiva leswaku ndzi rhuketeriwa ngopfu,

u tiva ni tingana leti ndzi khomisiwaka tona;

valala va mina hinkwavo va tiva hi wena.

₂₀Va ndzi rhuketele ku kondza mbilu ya mina yi vava,

kutani ndzi hela ntamu.

Ndzi lavile wo ndzi twela vusiwana, kambe a ndzi n'wi kumanga,

ndzi pfumarile ni muchaveleri.

₂₁Va ndzi phamele swakudya leswi cheriweke murhi wo dlaya,

loko ndzi twa torha, va ndzi nwisa ntsuvi.

₂₂Swakudya swa vona a swi hundzuke ntlhamu,

swi dlaya vona vinyi ni vanghana va vona.

₂₃Va dlaye mahlo leswaku va nga ha voni,

rhurhumerisa minhlana ya vona minkarhi hinkwayo.

₂₄Va hlundzukele swinene,

u va ba hi vukari bya wena lebyi hisaka.

₂₅Mixaxa ya vona a yi hundzuke marhumbi,

ku nga ha vi na munhu la tshamaka eka yona,

₂₆hikuva va xanisa munhu loyi wena u n'wi beke,

loyi u n'wi boxeke timbanga, va ya mahlweni va n'wi pfatlanya.

₂₇Vanhu lava, va vone nandzu minkarhi hinkwayo,

u nga tshuki u va tsetselela.

₂₈Sula mavito ya vona ebukwini ya vutomi,

ma nga ha tsariwi swin'we ni mavito ya lavo lulama.

₂₉Mina a ndzi munhu wa nchumu, ndzi khomiwe hi switlhavi;

we Xikwembu, hi wena ntsena u nga ndzi ponisaka, u ndzi sirhelela.

₃₀Ndzi ta yimbelela ndzi tlangela Xikwembu,

ndzi ta xi dzunisa hi risimu ra ku nkhensa,

₃₁kutani leswi swi ta tsakisa HOSI Xikwembu

ku tlula loko munhu a xi humesela tihomu tinene,

a xi gandzela ha tona.

₃₂N'wina mi xanisekaka, vonani leswi humelelaka mi tsaka,

n'wina mi khongelaka Xikwembu tsakani mi kuma matimba,

₃₃hikuva HOSI Xikwembu xi pfuna lava nga khombyeni,

a xi rivali vanhu va xona lava bohiweke.

₃₄Matilo ni misava a swi dzunise Xikwembu,

na rona lwandle ni swivumbiwa swa kona hinkwaswo a swi tlangele xona,

₃₅hikuva Xikwembu xi ta ponisa muti wa Siyoni,

xi tlhela xi pfuxa miti ya Yuda,

kutani malandza ya xona ma ta tshama kona,

ma ta teka tiko ri va ra wona;

₃₆Vana va wona va ta nyikiwa rona ri va ndzhaka ya vona,

hikuva lava rhandzaka Xikwembu va ta tshama eka rona.