Iinkcukacha ezongezelelweyo

Xikhongelo xa Azariya 1

Xikhongelo xa Azariya

₁Majaha lawa manharhu ma sungula ku famba-famba endzeni ka malangavi ya ndzilo, ma ri karhi ma yimbelelela Xikwembu etinsimu, ma xi dzunisa ma ku i HOSI. ₂Kavaloko Azariya a yima exikarhi ka ndzilo, a sungula ku khongela hi rito leri tlakukeke a ku:

₃Wa nkhenseka we HOSI, Xikwembu xa vatata wa hina, u fanele ni ku dzunisiwa.

Vito ra wena a ri twarisiwe hilaha ku nga heriki,

₄hikuva u lulamile eka hinkwaswo leswi u hi endleleke swona.

Mintirho ya wena hinkwayo yi le ntiyisiweni ni tindlela ta wena ti lulamile.

Minkarhi hinkwayo ku avanyisa ka wena i ka ntiyiso.

₅Hinkwaswo leswi u nga hi vangela swona,

ni leswi u swi vangeleke Yerusalema muti lowo hlawuleka wa vatata wa hina,

swi komba ku avanyisa ka wena loku lulameke.

U hi endle leswi hi ntiyiso ni ku lulama hikuva hi ku dyoherile.

₆Hi tihambanisile na wena, a hi hlayisanga milawu ya wena,

hi dyohile eka leswo tala ni ku tlula milawu hinkwayo.

₇A hi yi hlayisanga ni ku yi landzelela,

hi tshika swileriso swa wena leswi a swi ta hi tisela leswo saseka.

₈Hinkwaswo leswi u hi vangeleke swona

ni leswi u hi endleleke swona

u swi endle hi ku avanyisa ka ntiyiso.

₉U hi nyiketile eka valala va hina lava pfumalaka nawu,

vapfilunganyi lava vengiwaka swinene,

ni ka hosi leyi nga lulamangiki, leyo homboloka ku tlula tihosi tin'wana ta misava hinkwayo.

₁₀Sweswi ha tsandzeka ku pfula milomu ya hina;

tingana ni nhlomulo swi hi funengetile, hina malandza ya wena hi ku gandzelaka.

₁₁Ntsena hikwalaho ka vito ra wena, u nga hi tshikeri ra makumu,

u nga tshovi ntwanano wa wena na hina.

₁₂U nga hi aleli ni tintswalo ta wena,

hikwalaho ka Abrahama murhandziwa wa wena, ni Isaka nandza wa wena,

ni Vaisraele vanhu va wena lavo hlawuleka.

₁₃U va tshembisile

vatukulu lavo tala tanihi tinyeleti etilweni

ni sava eribuweni ra lwandle.

₁₄Kambe sweswi we HOSI, hi hundzuke vatsongo eka tinxaka letin'wana hinkwato,

hi tsongahatiwile emisaveni hinkwayo hikwalaho ka swidyoho swa hina.

₁₅Eka nkarhi wa sweswi hi hava mupfuni, kumbe muprofeta, kumbe murhangeri;

a ka ha ri na magandzelo lama hisiwaka, ni lama dyiwaka; ku hava tinyiko ni mirhi ya risuna,

ku hava ni ndhawu leyi hi nga ku humeselaka swilo leswi eka yona, leswaku u hi tsetselela.

₁₆Hambiswiritano, hi ta ka wena

hi timbilu leti tshovekeke ni mimoya leyi tisolaka,

swangi hiloko hi ku hisela magandzelo ya tinyimpfu ni ya tinkuzi

ni madzanadzana ya swinyimpfana leswo nona.

₁₇Amukela namuntlha ku hundzuka loku ka hina, tanihi magandzelo ya hina.

Hi navela ku tinyiketa, hi yingisa wena ntsena,

leswaku lava va ku tshembaka va nga khomisiwi tingana.

₁₈Hi timbilu ta hina hinkwato ha ku yingisa,

hi ku komba xichavo, hi lava wena ntsena.

₁₉U nga tshuki u hi khomisa tingana,

kambe hi endle hi tintswalo

u hi twela vusiwana.

₂₀We hosi, hi kutsule hi mintirho ya wena leyo hlamarisa,

leswaku vito ra wena ri dzunisiwa.

Hinkwavo lava xanisaka malandza ya wena, va khomise tingana.

₂₁A va tsongahatiwe, va tekeriwa mimfumo ni vuhosi hinkwabyo,

matimba ya vona ma hundzuka swa hava.

₂₂Va kombise leswaku hi wena ntsena u nga HOSI,

leyi dzunekaka emisaveni hinkwayo.

Ta khele ra ndzilo

₂₃Malandza ya hosi lama nga hoxa majaha lawa manharhu ekheleni ra ndzilo, a ma ya emahlweni ni ku tshivelela ndzilo, ma wu chela mafurha, ni nhlaka, ni ntsembyani, ni tihunyi. ₂₄Malangavi ma kula ku tlula 24 m ehenhla ka khele. ₂₅Ma khapela ni le handle, ma dlaya Vakalediya lava a va ri kusuhi ni khele ra ndzilo. ₂₆Kambe ntsumi ya HOSI Xikwembu yi xikela ekheleni ra ndzilo yi ya yima na Azariya ni vanghana va yena, yi humesela malangavi ehandle ka khele. ₂₇Endzeni ka rona ku sala ku hunga swimoyana swo titimela. Hi ndlela leyi, ndzilo a wu va khumbanga niswitsongo; a wu va vavisanga, naswona a wu va karhatanga.

Risimu ra majaha manharhu

₂₈Kavaloko majaha manharhu ma dzunisa ni ku twarisa Xikwembu hi nomu wu ri wun'we, ma xi nkhensa ma ri ekheleni, ma ku:

₂₉Wa dzuneka we HOSI, Xikwembu xa vatata wa hina

wa vongiwa ni ku twarisiwa hilaha ku nga heriki.

₃₀A ku dzunisiwe vito ra wena lero hlawuleka, ro saseka,

a ri vongiwe ni ku twarisiwa hilaha ku nga heriki.

₃₁Wa dzuneka eTempeleni ya wena leyo hlawuleka, yo twakala,

wa vongiwa ni ku twarisiwa hilaha ku nga heriki.

₃₂Wa dzuneka wena u tshameke ehenhla ka tikerubu, u ri karhi u wungamele na xona xivandla xa vafi,

wa vongiwa ni ku twarisiwa hilaha ku nga heriki.

₃₃Wa dzuneka exiluvelweni xa vuhosi bya wena,

wa vongiwa ni ku twarisiwa hilaha ku nga heriki.

₃₄Wa dzuneka exibakabakeni xa le henhla-henhla,

wa vongiwa ni ku twarisiwa hi tinsimu hilaha ku nga heriki.

₃₅Dzunisani HOSI, n'wina swivumbiwa swa yona hinkwaswo,