Siraka 1

₁Vutlhari hinkwabyo byi huma eka HOSI Xikwembu,

kutani byi le ka xona hilaha ku nga heriki.

₂Xana i mani la nga hlayaka sava eribuweni ra lwandle,

ni mathonsi ya mpfula, ni minkarhi leyi nga heriki xana?

₃I mani loyi a nga paluxaka mpfhuka wa matilo,

ni ku anama ka misava, ni swidziva swa lwandle, na byona vutlhari xana?

₄Vutlhari byi tumbuluxiwile swilo swin'wana swi nga si va kona,

ku twisisa loku hetisekeke a ku ri kona misava yona yi nga si va kona.

₅[Masungulo ya vutlhari i rito ra Xikwembu xa le henhla-henhla,

tindlela ta xona i swileriso hilaha ku nga heriki.]

₆Xana i mani loyi a nga tshama a kombisiwa laha vutlhari byi sukelaka kona?

I mani la twisisaka tindlela ta byona ke?

₇[Xana i mani la paluxeriweke vutlhari xana?

I mani la twisiseke ntokoto lowukulu wa byona ke?]

₈Ku na un'we ntsena la tlhariheke,

kutani hi fanele ku yima hi xichavo emahlweni ka xiluvelo xa yena.

₉HOSI Xikwembu hi xona xi tumbuluxeke vutlhari,

xi byi vonile kutani xi byi kamba,

xi byi chululela ehenhla ka mintirho hinkwayo ya xona.

₁₀Xi nyika un'wana ni un'wana ku ya hi mpimo lowu wu n'wi ringaneke,

kambe xi byi nyika hi ntalo eka lava va xi rhandzaka.

₁₁Loko u chava HOSI Xikwembu, ku fundzhiwa ni ku tlakusiwa swi ta va swa wena,

u ta khapa hi ntsako lowukulu.

₁₂Ku chava HOSI Xikwembu swi tsakisa mbilu,

swi ta ku nyika ntsako lowukulu ni malembe layo tala.

₁₃Emakun'wini ya vutomi bya wena hinkwaswo swi ta ku fambela kahle,

HOSI Xikwembu xi ta ku katekisa hi siku ra ku fa ka wena.

₁₄Masungulo ya vutlhari i ku chava HOSI Xikwembu,

vutlhari byi nyikiwile lavo tshembeka va ha ri emakhwirini ya vamana wa vona.

₁₅Byi ve na vanhu ku sukela eku sunguleni,

kutani vanhu va minkarhi leyi taka va ta tshemba byona.

₁₆Vutlhari lebyi hetisekeke i ku chava HOSI Xikwembu,

vanhu va tsaka hi mihandzu ya byona.

₁₇Byi tata miti ya vona hi swilo hinkwaswo leswi timbilu ta vona ti swi navelaka,

mihandzu ya byona byi yi chela eswitlatini swa vona.

₁₈Hakelo ya vutlhari i ku chava HOSI Xikwembu

loku tswalaka ku rhula ni vutomi lebyinene.

₁₉[HOSI Xikwembu xi vonile vutlhari, kutani xi byi kamba,]

vutlhari byi nisela vanhu ku twisisa ni vutivi,

byi engetela ni ku fundzhiwa eka lava va byi amukelaka.

₂₀Rimitsu ra vutlhari i ku chava HOSI Xikwembu,

ku hanya malembe layo tala i marhavi ya byona.

₂₁[Ku chava HOSI Xikwembu swi susa swidyoho,

swi herisa ni vukari.]

₂₂Ximbilwa-mbilwana a xi amukeleki

hikuva xa lovisa.

₂₃La lehisaka mbilu wa tikhoma ku fikela nkarhi lowu faneleke,

kutani ú ta tala hi ntsako.

₂₄Ú pfala nomu wa yena ku fikela nkarhi lowu faneleke,

kutani lavo tala va ta vulavula hi ta vutlhari bya yena.

₂₅Swivuriso swa vutivi swi le vuhlayiselweni bya vutlhari,

kambe lavo homboloka va nyenya leswo lulama.

₂₆Loko u lava vutlhari, hlayisa milawu ya HOSI Xikwembu,

kutani HOSI Xikwembu xi ta ku nyika byona hi xitalo.

₂₇Vutlhari ni swiletelo i ku chava HOSI Xikwembu,

ku tshembeka ni ku titsongahata swa xi tsakisa.

₂₈Tshembeka eripfumelweni ra wena,

gandzela HOSI Xikwembu hi mbilu ya wena hinkwayo.

₂₉U nga vi mukanganyisi.

Tivonele eka leswi u swi vulavulaka.

₃₀U nga tshuki u tikurisa, hikuva u nga ta tsongahatiwa,

u tivangela ku soriwa.

HOSI Xikwembu xi ta paluxa swihundla swa wena,

xi ta ku tsongahata emahlweni ka ntshungu loko wu hlengeletanile,

hikuva leswi swi ku susumeteke a ku nga ri ku chava HOSI Xikwembu,

ni mbilu ya wena a yi tele hi vukanganyisi.