Siraka 17

₁HOSI Xikwembu xi vumbile vanhu hi ntshuri wa misava,

kutani xi va tlherisela eka wona.

₂Xi va nyikile ku hanya malembe ma nga ri mangani,

kambe xi va nyikile ni matimba ya ku fuma swilo hinkwaswo emisaveni.

₃Xi va tumbuluxile hi xifaniso xa xona

ni ku va avela matimba ya xona.

₄Xi endlile leswaku swivumbiwa hinkwaswo leswi hanyaka swi chava vanhu ngopfu,

ni leswaku swifuwo hinkwaswo ni tinyanyana hinkwato swi lawuriwa hi vona.

₅[HOSI Xikwembu xi nyikile vanhu switwi swa 5 swa miri wa vona,

xi tlhela xi va nyika ku anakanya ni ku twisisa leswi nga switwi swa vu-6 ni vu-7,

leswaku va nga twisisa matirhele ya switwi swa 5 leswin'wana.]

₆Xi va nyikile ririmi, ni mahlo, ni tindleve,

ni miehleketo, ni mapfalo.

₇Xi va tata hi vutivi ni ku twisisa,

xi va tivisa leswo biha ni leswo saseka.

₈Xi vekile ku vonakala ka xona etimbilwini ta vona,

leswaku va ta vona vukulu bya mintirho ya xona.

₉[Xi va pfumelele ku tinyungubyisa

hi swihlamariso swa xona hilaha ku nga heriki,]

₁₀va ta kota ku dzunisa vito ra xona lero hlawuleka,

ni ku twarisa vukulu bya swiendlo hinkwaswo swa xona.

₁₁Xi va nyike vutivi

ni Nawu lowu nga masungulo ya vutomi.

₁₂Xi endlile ntwanano lowu nga heriki na vona

ni ku va hlavutela ku avanyisa ka xona.

₁₃Va vonile ku saseka lokukulu ka vuhosi bya xona

ni ku twa ku dzuneka ka ku vulavula ka xona.

₁₄Xi va byerile xi ku: “Tivoneleni eka vuhomboloki hinkwabyo.”

Xi lerisile munhu un'wana ni un'wana hilaha a faneleke ku hanya hakona ni vanhukulobye.

₁₅HOSI Xikwembu xi tiva leswi vanhu va swi endlaka minkarhi hinkwayo,

ku hava ndlela ya ku titumbeta eka xona.

₁₆[Ku sukela evuhlangini bya vona,

vanhu va lava leswo biha,

a va swi koti ku hundzuluxa timbilu ta vona to nonon'hwa kukota maribye, ti va timbilu leto olova.

₁₇HOSI Xikwembu xi avanyisile vanhu va misava ematikweni ya vona.]

Etikweni rin'wana ni rin'wana xi vekile mufumi wa rona,

kambe xi hlawurile Vaisraele ku va vanhu va xona va xiviri.

₁₈[Vaisraele i mativula ya xona,

lava xi va layaka loko xi va kurisa.

Xi va nyika ku vonakala ka rirhandzu ra xona,

a xi va loloheli ni siku ni rin'we.]

₁₉HOSI Xikwembu xi languta leswi vanhu va swi endlaka minkarhi hinkwayo,

xi vona swiendlo swa vona hinkwaswo.

₂₀Ku hava xidyoho ni xin'we xa vona lexi xi nga xi tumbelelaka,

hikuva xi tiva hinkwaswo.

₂₁[Kambe HOSI Xikwembu xi tele tintswalo, xi tiva swivumbiwa swa xona.

Xi swi ponisile, a xi swi tshikanga.]

₂₂Eka HOSI Xikwembu ku hanana ni swisiwana swi fana ni xingwavila xa nkoka,

ni musa wa munhu a xi wu rivali niswitsanana.

₂₃Endzhaku xi ta avanyisa vahomboloki,

xi ta va ba hi ku ya hi mintirho ya vona.

₂₄Kambe xi ta pfumelela lava tisolaka ku hundzukela eka xona.

Minkarhi hinkwayo xi tiyisa mihlana ya lava helaka mbilu.

₂₅Hundzulukela eka HOSI Xikwembu,

kutani u tshika swidyoho swa wena.

Khongela hi mbilu ya wena hinkwayo

leswaku xi ta ku pfuna ku hanya kahle.

₂₆Hundzulukela eka Loyi a nga henhla-henhla, u tshika vuhomboloki hinkwabyo.

Venga swa manyala hi mbilu ya wena hinkwayo.

₂₇Loko munhu a ha hanya, a nga dzunisa HOSI Xikwembu,

kambe xana i mani la nga nkhensaka Loyi a nga henhla-henhla a ri exivandleni xa vafi?

₂₈Lava hanyaka kahle va nga yimbelela ni ku dzunisa HOSI Xikwembu,

kambe vafi, va nga ka va nga xi nkhensi.

₂₉Tintswalo ta HOSI Xikwembu hi letikulu!

Lava hundzulukelaka eka xona, xa va rivalela.

₃₀Vanhu a va swi koti ku va ni swilo hinkwaswo,

hikuva ku hava munhu na un'we loyi a hanyaka hilaha ku nga heriki.

₃₁Ku hava xilo lexi hatimaka ku tlula dyambu,

kambe ku hatima ka dyambu ka dzwihala.

Swi tano, timbilu ta vanhu na tona,

ti nga thyakisiwa hi swidyoho.

₃₂HOSI Xikwembu xi vona tinyeleti hinkwato etilweni,

kambe vanhu vona i ntshuri ni nkuma ntsena.