Siraka 23

₁We HOSI Xikwembu, Tatana ni n'wini wa vutomi bya mina,

u nga ndzi tshiki ndzi fumiwa hi marito ya mina, u nga pfumeli leswaku ma ndzi lovisa.

₂Onge ndzi nga biwa hi nkharisa hikwalaho ka miehleketo ya mina,

leswaku vutlhari byi laya mianakanyo ya mina.

A ndzi naveli ku tsetseleriwa loko ndzi hoxile,

a ndzi lavi leswaku swidyoho swa mina swi tshikiwa.

₃Hikokwalaho swidyoho swa mina a swi nga andzi,

swihoxo swa mina a swi nga tali.

A ndzi nga wi,

kutani a ndzi nga khomisiwi tingana emahlweni ka valala va mina.

₄We HOSI, Tatana ni Xikwembu xa vutomi bya mina,

ndzi ponise eku tikuriseni.

₅Ndzi sirhelele eku naveleni loko biha.

₆Ndzi ntshunxe eka makolo ni ku navela ka ntumbuluko,

u nga ndzi tshiki emavokweni ya ku hiseka ka tingana.

₇Vana vanga, yingisani leswi ndzi mi tsundzuxaka swona mayelana ni ku vulavula;

loyi a swi landzelelaka a nge phasiwi hi ntlhamu.

₈Mudyohi ú phasiwa hi ntlhamu wa marito ya yena,

ú khunguvanyekisiwa hi marito ya yena ya ku tikurisa ni ku rhukana.

₉U nga titoloveti ku hlambanya,

u nga tshuki u tlanga hi vito ro hlawuleka ra HOSI Xikwembu.

₁₀Nandza loyi a tshamelaka ku biwa

a nga ka a nga pfumali mafidzulo,

loyi a hlambanyaka hi vito ra Xikwembu minkarhi hinkwayo

a nga ka a nga rivaleriwi swidyoho.

₁₁La tibohaka kanyingi hi ku hlambanya, mbilu ya yena yi tala hi ku homboloka,

kutani maxangu ma nga ka ma nga suki endlwini ya yena.

Loko a nga hlayisi ku hlambanya ka yena, wa dyoha.

Loko a swi rivala, ú dyoha kambirhi.

Loko a hlambanya swa mahala, a nga rivaleriwi,

kutani yindlu ya yena yi ta tala hi makhombo.

₁₂Ku ni ku vulavula kun'wana loku ringanaka ni rifu;

ku nga tshuki ku kumeka exikarhi ka Vaisraele!

Vakhongeri lava nge kule na swona,

a va nga khidi eswidyohweni.

₁₃U nga titoloveti ku vulavula swa thyaka ni swa manyala,

swi yisa exidyohweni.

₁₄Tsundzuka tata wa wena ni mana wa wena

loko u tshama exikarhi ka lava va mavito.

U nga tshuki u tirivala exikarhi ka vona,

kutani u tiendla xiphukuphuku hi mavulavulele ya wena.

Kutani u navela onge a wu nga tswariwangi,

u rhukana ni siku ra ku velekiwa ka wena.

₁₅Munhu loyi a tolovelaka ku vulavula marito ya nhlamba,

a nga ka a nga tintshunxi eka wona ni siku ni rin'we.

₁₆Ku ni tindlela to hambana ta ku dyoha

ni ku vanga ku hlundzuka ka Xikwembu,

kambe ku navela ka nyama ku kotisa ndzilo lowu hisaka swinene ni ku pfurha,

wu nga ka wu nga timeki wu nga si hela.

Munhu loyi a hanyaka hi ku endla vuoswi,

a nga ka a nga tshiki xidyoho lexi xi nga si n'wi lovisa.

₁₇Muoswi ú navela vavasati hinkwavo,

a nga tshiki ku etlela na vona ku kondza a fa.

₁₈Muoswi loyi a dyohelaka nsati wa yena

ú tibyela a ku: “Ndzi voniwa hi mani?

Munyama wu ndzi rhendzerile ni makhumbi ya ndzi tumbeta,

ku hava loyi a ndzi vonaka. Xana ndzi ta chava yini?

Loyi a nga henhla-henhla a nge vi na mhaka ni swidyoho swa mina.”

₁₉Munhu loyi ú chava vanhu ntsena,

a nga tsundzuki leswaku mahlo ya Xikwembu ma tlula dyambu ka 10 000 hi ku vangama,

kutani xi xiyaxiya swiendlo hinkwaswo swa vanhu,

ni leswi va swi tumbetaka xa swi tiva.

₂₀Xi tivile hinkwaswo xi nga si tumbuluxa misava,

ni leswi xi swi endleke xa swi tiva hinkwaswo.

₂₁Muoswi loyi ú ta khomiwa loko a nga swi langutelanga,

kutani ú ta biwa erivaleni.

₂₂Swi tano ni wansati loyi a nga tshembekangiki eka nuna wa yena,

la kumaka n'wana ni wanuna wa le handle.

₂₃Xo sungula ú tshovile nawu wa Loyi a nga henhla-henhla.

Xa vumbirhi, ú dyoherile nuna wa yena.

Xa vunharhu, ú tiendlile nghwavava hi ku oswa

ni ku kuma n'wana ni wanuna un'wana.

₂₄Wansati loyi ú ta tisiwa ehubyeni,

vana va yena va ta vangeriwa mahlomulo.

₂₅Va ta pfumala ndzhuti emahlweni ka vanhu,

va nge swi koti ku va ni mindyangu.

₂₆Ku tsundzukiwa ka wansati loyi ku ta va ndzhukano,

tingana ta yena a ti nga heli.

₂₇Loko a fa, lava saleke va ta tiva leswaku lexi tlulaka ku chava Xikwembu, ku hava,

ni ku nandziha ko tlula ku yingisa milawu ya Xikwembu, ku hava.

₂₈[Ku landza Xikwembu ku tisa ku fundzhiwa,

ku amukeriwa hi xona i ku hanya malembe yo tala.]