Siraka 33

₁Ku hava leswo biha leswi welaka la chavaka Xikwembu,

kambe xi ta n'wi ponisa emiringweni hinkwayo.

₂Munhu wa vutlhari a nga vengi nawu wa Xikwembu,

kambe mukanganyisi ú fana ni ngalava leyi biwaka hi bubutsa ehenhla ka lwandle.

₃Munhu loyi a twisisaka, ú tshemba nawu wa Xikwembu,

eka yena nawu lowu wu tshembekile hi ku hetiseka, tanihi vuhlolotwana lebyo hlawuleka.

₄Lulamisa leswi u lavaka ku swi vula, kutani vanhu va ta ku yingisa.

Lavisisa leswi u swi dyondzisiweke, u nga si sungula ku vulavula.

₅Mbilu ya xiphukuphuku yi fana ni vhilwa ra golonyi,

miehleketo ya yena yi fana ni ansi ya golonyi leyi yi rhendzelekaka.

₆Munghana wo tseketsela ú fana ni hanci

leyi yi rilelaka un'wana ni un'wana loyi a yi gadaka.

₇Xana hikwalaho ka yini siku rin'wana ri hlawuleka ku tlula rin'wana,

hambiloko masiku hinkwawo ma voningiwa hi dyambu rin'we ke?

₈Ma hambanisiwile hi xileriso xa Xikwembu

lexi xi ma lunghiseleke minkhuvo yo hambana-hambana.

₉Man'wana xi ma lunghisele minkhuvo leyikulu yo hlawuleka,

man'wana xi ma endlile masiku ntsena.

₁₀Vanhu hinkwavo va vumbiwile hi ntshuri

tanihi Adamu.

₁₁Hi vutivi bya xona lebyi hetisekeke, Xikwembu xi va hambanisile,

ni ku va nyika mintirho yo hambana-hambana.

₁₂Xi katekisile ni ku tlakusa van'wana,

van'wana xi va endlile lavo hlawuleka ni ku va tshineta eka xona,

kambe van'wana xi va rhukanile, ni ku va tsongahata, ni ku va susa eswiluvelweni swa vona.

₁₃Tanihi vumba emavokweni ya muvumbi wa timbita lebyi vumbiwaka hilaha a swi tsakelaka hakona,

vanhu emavokweni ya Mutumbuluxi wa vona va endliwa hilaha xi rhandzaka hakona.

₁₄Vunene byi hambanile ni vubihi,

vutomi byi hambanile ni rifu,

kutani mudyohi ú hambanile ni mukhongeri.

₁₅Xiyaxiya swilo hinkwaswo leswi tumbuluxiweke hi Loyi a nga henhla-henhla,

swi famba hi swimbirhi-mbirhi, xilo xin'wana xi hambana ni xin'wana.

₁₆Hambiloko ndzi ve wo hetelela ku fika entirhweni, ndzi tikarhatile.

Ndzi fana ni munhu loyi a khwajaka leswi siyiweke hi vatshoveri va mihandzu ya vhinya.

Kambe Xikwembu xi ndzi pfunile ku tlula van'wana,

kutani ndzi tatile xibya xa mina xo kamela ka xona mihandzu, tanihi mutshoveri wa mihandzu ya vhinya.

₁₇Ndzi lava ku ku tivisa leswaku ndzi endlile hinkwaswo leswi ku nga ri ku titirhela ntsena,

kambe ndzi swi endlerile vanhu hinkwavo lava lavaka ku dyondza.

₁₈Ndzi yingiseni, n'wina vakulukumba va tiko!

Na n'wina varhangeri va nhlengeletano, mi twa leswi ndzi lavaka ku mi byela swona!

₁₉Eku hanyeni ka wena, u nga pfumeli ku fumiwa hi van'wana vanhu,

hambi ku ri hi n'wana wa wena wa mufana, kumbe hi nsati wa wena, kumbe hi makwenu, kumbe hi munghana.

U nga nyiki leswi u nga na swona eka van'wana.

Nkarhi wun'wana u ta hundzuluxa miehleketo, u tlhela u swi kombela.

₂₀Loko wa ha hefemula, u nga pfumeleli van'wana

ku fambisa vutomi bya wena.

₂₁Swa antswa loko vana va wena va pfuniwa hi wena

ku tlula loko wena u pfuniwa hi vona.

₂₂Tirha hi ku tlurisa eka hinkwaswo leswi u swi endlaka,

u nga tinyamisi.

₂₃Yimela nkarhi wa makumu ya vutomi bya wena, hi siku ra rifu ra wena,

kutani avela vadyandzhaka va wena leswi u nga na swona.

₂₄Mbhongolo yi fanele yi nyikiwa byanyi, ni ku rhwexiwa ndzhwalo, ni ku biwa.

Hlonga ri fanele ri nyikiwa swakudya, ni ku rhwexiwa ntirho, ni ku layiwa.

₂₅Loko u nyika hlonga ra wena ntirho, u ta tshama hi ku rhula.

Loko u ri tshika ri nga endli nchumu, ri ta lava ku ntshunxiwa.

₂₆U nga lerhisa xihari hi joko ni ku xi pana,

hlonga ro homboloka ri nga vavisiwa swinene hi ku bohiwa hi tinsimbhi.

₂₇Ri nyike ntirho, u nga pfumeli ri tshama hi mavoko.

Vulolo byi ta ri endla leswaku ri ku karhata.

₂₈Ku tirha i fanelo ya rona.

Loko ri ala ku ku yingisa, ri bohe milenge hi tinsimbhi.

₂₉U nga tshuki u xanisa van'wana,

ni ku va endlela leswi nga lulamangiki.

₃₀Hlayisa hlonga ra wena kukota loko u tihlayisa,

hikuva u ri xavile hi mali yo tala.

₃₁Hlayisa nandza wa wena kukota loko u hlayisa makwenu,

hikuva u n'wi lava kukota loko u tilava.

Loko u n'wi xanisa, kutani a baleka,

u ta n'wi lava u ku ú kwihi?