Siraka 48

₁Kutani ku humelele muprofeta Eliya,

loyi a a hiseka tanihi ndzilo lowu pfurhaka swinene,

marito ya yena a ma fana ni xisana lexi pfurhaka.

₂Ú vangerile vanhu dyandza,

kutani lavo tala va fa hikwalaho ka ku hiseka ka yena.

₃Hi ku vulavula hi vito ra HOSI Xikwembu, ú siverile mpfula,

ni ku xikisa ndzilo hi le tilweni kanharhu.

₄We Eliya, masingita ya wena ma hlamarisile!

Ku hava munhu un'wana handle ka wena loyi a nga tikukumuxaka hikwalaho ka masingita lawa!

₅Hi vito ra Loyi a nga henhla-henhla

u pfuxile munhu eku feni.

₆U vangerile tihosi ni vakulukumba van'wana

mavabyi ni rifu.

₇U twile Xikwembu loko xi ku tshinya entshaveni ya Sinayi

ni ku rihisela hi ku avanyisa valala va xona entshaveni ya Horebe.

₈U hlawurile tihosi leswaku ti rihisela Xikwembu

ni vaprofeta lava nga ta ta endzhaku ka wena.

₉U tlakuleriwile etilweni hi xihuhuri xa ndzilo

hi kalichi leyi kokiwaka hi tihanci ta ndzilo.

₁₀Matsalwa ma vula leswaku u ta tlhela u vuya emisaveni hi nkarhi lowu faneleke,

ku ta ta rhulisa Xikwembu leswaku xi nga bi vanhu hi vukari lebyikulu,

ni ku vuyisela timbilu ta vatatana eka vana va vona,

ni ku pfuxa tinyimba ta Israele.

₁₁Ku katekile lava nga ta ku vona loko u vuya

ni lava feleke erirhandzwini, hikuva na hina hi ta hanya.

₁₂Loko Eliya a funengetiwile hi xihuhuri,

Elixa ú tatiwile hi moya wa yena,

kutani vutomi bya yena hinkwabyo a nga chavanga vafumi.

A va n'wi sindzisanga ku endla leswi va swi lavaka.

₁₃A ku vanga ni ntirho lowu wu n'wi hluleke.

Hambiloko a file, ntsumbu wa yena wu endlile mahlori.

₁₄Loko a ha hanya ni loko a file

ú endlile masingita lama hlamarisaka.

₁₅Hambiloko ku humelerile hinkwaswo leswi, Vaisraele a va tisolanga,

a va tshikanga swidyoho swa vona

ku ya fika loko va tekiwile etikweni ra vona va yisiwa evukhumbini,

ni ku hangalasiwa emisaveni hinkwayo.

Lava saleke a va nga ri vangani,

kambe va yile emahlweni va fumiwa hi vatukulu va Davhida.

₁₆Exikarhi ka vona, van'wana va endlile leswi tsakisaka HOSI Xikwembu,

kambe van'wana va engetelerile swidyoho swa vona.

₁₇Hezekiya ú tiyisile ntsindza wa yena,

kutani a fikisa mati eka wona.

A boxa ndlela ya mati eribyeni ro tiya swinene, hi switirho swa tinsimbhi,

a kovotla ni makhele yo hlayisela mati eka wona.

₁₈Enkarhini wa ku fuma ka Hezekiya, Senakeribi ú hlaserile ntsindza,

kutani a rhuma Rhabi-Xake kona, a suka emutini wa Lakixi.

A xungeta Yerusalema

ni ku tikukumuxa ni ku tiarisa.

₁₉Kutani Vaisraele va hela timbilu ni ku rhurhumela hi ku chava,

va vaviseka kukota wansati loko a veleka.

₂₀Kambe va khongerile HOSI Xikwembu xa tintswalo va tlakusa mavoko ya vona eka xona,

kutani Muhlawuleki ú hatlisile ku va hlamula, a va rhumela Esaya ku va ponisa.

₂₁HOSI Xikwembu xi ba mixaxa ya Vaasiriya,

ntsumi ya xona yi va herisela makumu.

₂₂Hezekiya ú endlile leswi tsakisaka HOSI Xikwembu,

ú yile emahlweni hi ku tiya endleleni ya kokwa wa yena Davhida,

hi ku landza swileriso swa Esaya

loyi swivono swa yena a swi ri leswi tshembekaka.

₂₃Ú tlherisile ndzhuti

ni ku engetela vutomi bya hosi Hezekiya.

₂₄Hi matimba ya moya wa yena ú vonile swilo swa nkarhi lowu taka.

Ú chavelerile lava feriweke emutini wa Yerusalema.

₂₅Ú paluxile leswi a swi fanele ku humelela misava yi nga si hela,

ni swihundla leswa ha taka.