Ta Simoni n'wana Oniyasi
1Lonkulu exikarhi ka vamakwavo loyi a a fundzhiwa hi varikwavo,
a a ri muprista lonkulu Simoni n'wana Oniyasi.
Hi yena la lunghiseke Xivandla lexo hlawuleka
ni ku tiyisa Tempele.
2Ú vekile masungulo ya makhumbi mambirhi layo tlakuka,
a aka ni rirhangu ra Tempele.
3Enkarhini wa yena ku ceriwile khele ro hlayisa mati
leri ringanaka lwandle hi ku anama.
4Ú endlile makungu ya ku sirhelela vanhu va yena loko va ri karhi va hlaseriwa,
a tiyisa ni muti wa Yerusalema leswaku wu ta hlula loko wu hlaseriwa.
5Simoni a a dzunekile swinene loko a huma eXivandleni lexo hlawuleka ngopfu
a ri karhi a famba eTempeleni emahlweni ka vanhu.
6A a fana ni nyeleti ya mixo leyi vangamaka emapapeni
ni n'weti loko wu basile.
7A a kotisa dyambu leri vangamaka ehenhla ka Tempele ya Loyi a nga henhla-henhla,
ni nkwangulatilo lowu hatimaka swinene emapapeni.
8A a ri tanihi swiluva swa mavalavala enkarhini wa ximun'wana,
ni swiluva swa le nhoveni leswi kulaka kusuhi ni xinambyana,
ni mirhi ya kedari ya Lebanoni enkarhini wa ximumu.
9A a fana ni mirhi ya risuna leyi hisiwaka,
ni xinwelo xa nsuku lowu furiweke lexi khavisiweke hi maribye yo hambana-hambana ya nkoka.
10A a kotisa ni murhi wa mutlhwari lowu tswalaka mihandzu yo tala,
ni murhi wa kipresi lowu tlakukaka wu ya fika emapapeni.
11Loko Simoni a ambarile nguvu ya yena yo leha
ni swiambalo swin'wana swa yena swo saseka swinene,
kutani a tshinela alitarini,
a sasekisa ngopfu xivava xa Tempele.
12Loko vaprista va n'wi nyika leswi ringanaka swa magandzelo,
a a yimile emahlweni ka alitari,
ni vapfuni va yena va n'wi rhendzerile tanihi harhi enhlokweni,
a fana ni murhi wa kedari wa Lebanoni lowu rhendzeriweke hi mincindzu.
13Vaprista lava a va ri vatukulu va Aroni
lava ambaleke swiambalo swa vona swo saseka swinene.
A va yima emahlweni ka ntshungu hinkwawo wa Vaisraele,
va tamele timhamba leti humeseriwaka HOSI Xikwembu.
14Loko a hetile ku khongela alitarini
ni ku lunghisela Xikwembu xa le henhla-henhla xa matimba hinkwawo emagandzelo,
15Simoni a a teka xinwelo,
a xi tata hi vhinyo yo tsokombela leyo nuhela swinene,
kutani a yi chela ehansi emahlweni ka alitari,
yi va gandzelo ra Loyi a nga henhla-henhla, HOSI ya tilo ni misava.
16Vaprista a va huwelela
ni ku ba tinanga ta vona ta silivhere leyi furiweke.
A va bongoxa swinene,
leswaku va yingisiwa hi Loyi a nga henhla-henhla.
17Xikan'we vanhu hinkwavo a va korhama ni ku tiwisela ehansi,
va gandzela HOSI Xikwembu xa le henhla-henhla xa matimba hinkwawo.
18Kutani vayimbeleri a va sungula ku xi dzunisa,
va yimbelela tinsimu to saseka swinene.
19Vanhu a va ya emahlweni ku khongela HOSI Xikwembu xa tintswalo xa le henhla-henhla
ku fika loko ntirho wa magandzelo wu hela.
20Kutani Simoni a a xika alitarini,
a tlakusela mavoko ya yena ehenhla ka ntshungu hinkwawo,
a va katekisa hi xichavo
hi vito ra HOSI Xikwembu.
21Vanhu a va tlhela va korhama ni ku tiwisela ehansi,
va amukela minkateko ya Loyi a nga henhla-henhla.
Ta ku dzunisa HOSI Xikwembu
22Sweswi a hi dzuniseni Xikwembu, HOSI ya tilo ni misava.
Xi endlile mintirho leyikulu hinkwako.
Xi hi kurisile ni ku hi twela vusiwana,
ku sukela siku ra ku velekiwa ka hina.
23A xi hi tsakise
ni ku hi nyika ku rhula etikweni ra Israele hilaha ku nga heriki.
24A xi hi twele vusiwana minkarhi hinkwayo
ni ku hi pfuna loko hi pfumala.
Ta tinxaka tinharhu ta vanhu lava vengiwaka
25Ndzi venga tinxaka timbirhi ta vanhu,
lera vu-3 a ri faneriwi hi ku thyiwa rixaka.
26Tinxaka leti i ta va Vaedomu, na Vafilista,
na Vasamariya va vuphukuphuku.
Ta vutlhari bya Yesu n'wana Siraka
27Mina Yesu n'wana Siraka Eliyazara wa muti wa Yerusalema,
ndzi ringetile hi vutlhari bya mina hinkwabyo
ku tsala buku leyi,
leswaku van'wana va ta kuma eka yona switsundzuxo ni vutivi.
28Ku katekile lava yingisaka tidyondzo leti.
Hinkwavo lava va ti amukelaka etimbilwini ta vona, va ta kuma vutlhari.
29Hinkwavo lava va ti landzelaka, va ta kuma matimba minkarhi hinkwayo,
hikuva va ta famba eku vonakaleni ka HOSI Xikwembu.
