Siraka 9

₁U nga tshuki u va ni rilaveta eka wansati loyi u n'wi rhandzaka,

u nga tshuki u n'wi dyondzisa leswo biha, hikuva swi ta ku vavisa.

₂U nga tshuki u tinyiketa eka wansati

hikuva a nga ta ku fuma.

₃U nga twanani ni nghwavava,

yi nga ta ku phasa.

₄U nga titoloveti ni muyimbeleri wa xisati,

ú ta ku kanganyisa.

₅U nga languti nhwanyana hi ku n'wi navela,

u nga ta wela entlhan'wini, kutani u boheka ku n'wi riha.

₆U nga tinyiketi eka tinghwavava,

hikuva u ta hangalasa xuma xa wena.

₇Hikokwalaho u nga rhalarhali emagondzweni,

u nga jikajiki emutini laha ku nga riki na vanhu kona.

₈Loko u hlangana ni wansati wo saseka, langutela etlhelo,

u nga languti nsati wa vumbhurhi wa munhukuloni ku n'wi navela.

Lavo tala va hambukisiwile hi vumbhurhi bya vavasati,

byi vanga ku navela ka nyama tanihi ndzilo lowu tshiveriweke.

₉U nga tshuki u lalela ni wansati wa munhukuloni, hambi ku ri ku nwa vhinyo na yena,

hikuva u ta n'wi navela, kutani u ta lovisiwa.

₁₀U nga tshiki munghana wa wena wa khale.

U nga ka u nga ha kumi munghana lontshwa loyi a fanaka na lowo rhanga.

Munghana lontshwa ú fana ni vhinyo leyintshwa,

leyi nwekaka ni ku nandziha loko yi hundzuke ya khale.

₁₁U nga naveli minkateko ya mudyohi,

hikuva a wu tivi khombo leri ri nga ta n'wi wela.

₁₂U nga nkhensi leswi tsakisaka vahomboloki.

Tsundzuka leswaku va kumiwa va ri ni nandzu vutomi bya vona hinkwabyo.

₁₃Fambela kule ni munhu loyi a nga ni matimba ya ku ku dlaya,

kutani u nga ka u nga chavi ku dlawa.

Kambe loko u fanele ku n'wi tshinelela,

tivonele leswaku a nga ku dlayi.

Tiva leswaku u famba exikarhi ka swirimbana,

u nga dlayiwa hi ku olova.

₁₄Tikarhate ku tiva vaakelani va wena hinkwavo,

vutisa eka lava tlhariheke.

₁₅Vulavula ni lava nga ni ku twisisa,

ku kanela ka wena a ku ve hi ta nawu wa Loyi a nga henhla-henhla.

₁₆Lalela ni lava lulameke,

tinyungubyise hi ku chava HOSI Xikwembu.

₁₇Tanihi leswi mutirhi wa vutshila bya swilo swa mavoko a dzunisiwaka hikwalaho ka leswi a swi endlaka,

vutlhari bya mufumi byi kombisiwa hi marito ya yena.

₁₈Munhu wo jakatseka wa chaviwa emutini,

ni loyi a nga ni futa eku vulavuleni ka yena, wa vengiwa.