Risimu ra Tinsimu 1

₂Onge u ngo ndzi ntswontswa,

u ndzi ntswontswa hi nomo wa wena,

hikuva rirhandzu ra wena

ri tlula vhinyo hi ku tsokombela.

₃Mafurha ya wena yo tola ma nun'hwela.

Vito ra wena rona ri fana ni mafurha ya risuna lama chuluriwaka.

Hikokwalaho vanhwana va ku rhandza.

₄Hatlisa u ndzi koka, hi tsutsuma swin'we.

Ndzi nghenise endlwini ya wena, we hosi yanga.

Hi ta ku dzunisa, hi ku tsakela;

hi ta tlangela rirhandzu ra wena, leri tsokombelaka ku tlula vhinyo.

Kunene swa fanela leswaku vanhwana va ku rhandza.

₅Ndzo va ni ntima ntsena, kambe ndzi sasekile,

n'we vanhwanyana va Yerusalema.

Ndzi fana ni mintsonga ya Kedara hi ntima,

hi ku saseka ndzi fana ni makhetenisi ya yindlu ya Solomoni.

₆Mi nga ndzi monyi leswi ndzi dzwihaleke,

ndzi lo hisiwa hi dyambu.

Lava nga ndzi fela mona i vamakwerhu va xinuna:

Va ndzi endlile murindzi wa masimu ya vhinya,

ndzi pfumala nkarhi wo tihlayisela ya mina nsimu.

₇Ndzi byele, wena murhandziwa wa mbilu yanga,

ndzi kombe laha u riselaka kona,

ni laha ntlhambi wa wena wu vundzaka kona ninhlekanhi.

Hikwalaho ka yini mina ndzi fanele ku tsendzeleka,

ndzi landzelela mintlhambi ya vanghana va wena xana?

₈Loko u nga swi tivi, wena mbhurhi exikarhi ka vanhwana,

landzelela mabudula ya ntlhambi,

u byisa swimbutana swa wena swi kongoma emixaxeni ya varisi.

₉Murhandziwa, ndzi ku fanisa ni hanci

leyi kokaka kalichi ya Faro.

₁₀Misisi ya wena leyi lukiweke ya ku sasekela,

nhamu ya wena yi bombisiwile hi vuhlalu bya nkoka.

₁₁Hi ta ku endlela nketani ya nsuku,

hi yi sasekisa hi silivhere.

₁₂Loko n'wini wanga a ha wisile exitshan'wini,

ku nun'hwela ka mafurha lawa ndzi ma toleke, ko nkhúléè!

₁₃Murhandziwa wa mina yena, ú fana ni xinkwamana xa mirhi ya risuna

lexi vekiweke exikarhi ka mavele ya mina.

₁₄Murhandziwa wa mina ú fana ni xichocho xa swiluva swo basa

leswi milaka entangeni wa vhinya le Eni-Gedi.

₁₅Murhandziwa, u sasekile

wo va mbhurhi ya ku vatlwa!

Mahlo ya wena ma fana ni ya matuva.

₁₆Murhandziwa, u mpohlo,

wo va mbhurhi ya jaha hakunene!

Hi ta wisa ebyanyini bya rihlaza.

₁₇Timhandze ta yindlu ya hina ti ta va mirhi ya kedari,

timbalelo ta kona ti ta va mirhi ya kipresi.