Risimu ra Tinsimu 2

₁Mina ndzi xiluva xa le Xaroni, ndzi xiluva xa le minkoveni.

₂Exikarhi ka vanhwanyana, murhandziwa wa mina ú fana ni xiluva

lexi rhendzeriweke hi mitwa.

₃Exikarhi ka majaha, murhandziwa wa mina ú fana ni murhi wa muapula

lowu nga swihlahleni.

Ndzi tshamile hi ntsako lowukulu endzhutini wa wona,

mihandzu ya wona ya ndzi nandzihela.

₄Ú ndzi tisile endlwini ya nkhuvo,

mujeko wa yena ehenhla ka mina i rirhandzu.

₅Ndzi laveleni mihandzu ya vhinya leyi omisiweke,

mi pfuxa ni matimba ya mina hi maapula,

hikuva ndza fa hi rirhandzu.

₆Onge voko rakwe ra ximatsi ri nga va exikosini xa mina,

lera xinene rona ri va ri ndzi singarherile.

₇N'we vanhwanyana va Yerusalema, ndzi hlambanyeleni

hi timhala ni timbavala

leswaku mi nge pfuxi murhandziwa wa mina

a nga si swi rhandza.

₈Ndzi twa rito ra murhandziwa,

hi luyaa, wa karhi wa ta,

ú thamuka-thamuka tintshava,

a tlula-tlula ni switsunga.

₉Murhandziwa wa mina,

ú fana ni mhala kumbe mbavala.

Vonani, hi luyaa, ú yimile kusuhi ni rihlampfu ra ka hina,

ú hlometela hi le mafasitereni, a languta endzeni.

₁₀Murhandziwa wa mina wa ndzi vitana, ú ri:

“Tana hi famba, xiluva xanga,

suka u yima, we murhandziwa,

₁₁hikuva vuxika byi hundzile,

ni mpfula yi xile, yi hangalakile.

₁₂Swiluva na swona swi balekile etikweni,

nkarhi wa ku yimbelela ka tinyanyana wu fikile,

ku twala rito ra tuva etikweni ra ka hina.

₁₃Minkuwa yi tswarile,

mirhi ya vhinya na yona yi balekile swiluva swo nun'hwela.

Tlakuka, we murhandziwa,

tana hi famba, wena xiluva xanga!”

₁₄Wena xituvana xa mina, lexi tumbelaka emaribyeni

ni le mabakweni ya riwa,

u nge, ndzi vona nghohe ya wena;

vulavula, ndzi ku twa,

hikuva rito ra wena ra tsokombela,

ni nghohe ya wena yi xongile.

₁₅Hi khomeleni timhungubye ni swimhungubyana,

swi ta ka swi nga onhi masimu ya vhinya,

hikuva masimu ya hina ya vhinya

ma balekile swiluva.

₁₆Loyi i murhandziwa wa mina, na mina ndzi wa yena;

ntlhambi wa yena ú wu risela exikarhi ka swiluva,

₁₇vurhonga byi ko byi tshwuka,

ni dyambu ri ko ri tlhava.

Murhandziwa, vuya hi ku hatlisa,

ku fana ni mhala kumbe mbavala,

etintshaveni ta Betere.