Risimu ra Tinsimu 6

₁Xana murhandziwa wa wena ú ye kwihi,

wena mbhurhi ya timbhurhi?

Xana murhandziwa wa wena ú ye tlhelo rihi,

hi ta ku lavisa yena, xana?

₂Murhandziwa wa mina ú rhelele entangeni wa yena,

laha ku byariweke swinun'hweriso,

a ya risela kona ntlhambi wa yena,

ni ku hlengeleta swiluva.

₃Mina ndzi wa murhandziwa wa mina,

na yena i wa mina,

yena la riselaka exikarhi ka swiluva.

₄We murhandziwa u sasekile ku fana ni muti wa Tirisa,

u vumbekile ku fana ni muti wa Yerusalema,

u hlamarisa ku fana ni masocha lama khomeke mijeko.

₅U nga ndzi languti,

hikuva mahlo ya wena ma ndzi heta matimba.

Misisi ya wena yi fana ni ntlhambi wa timbuti,

leti rhelelaka ti suka entshaveni ya Giliyadi.

₆Meno ya wena ma vangama ku fana ni tinyimpfu

leta ha ku hlambisiwaka,

leti tswalaka ha swimbirhi-mbirhi,

ni yin'we ya tona a yi fisi.

₇Marhama ya wena endzeni ka nturhu

ma fana ni magrenada.

₈Ku nga ha va ni tinkosikazi ta 60,

ni vasati lavatsongo va 80,

ni vanhwana va ntsandza-vahlayi,

₉kambe mina ndzi tirhandzela ntsena xituvana xa mina, lexi hetisekeke,

lexi ngo va xoxe eka mana wa xona,

lexi mana wa xona a xi tivaka xi nga ri na xivati.

Loko vanhwana va n'wi vona, va n'wi vula la katekeke,

tinkosikazi ni vasati lavatsongo va n'wi dzunisa, va ku:

₁₀“Loyi i mani, wa langutelo ro fana ni vurhonga,

wo xonga onge i n'weti,

wo vangama tanihi dyambu,

wo hlamarisa ku fana ni masocha lama khomeke mijeko?”

₁₁Ndzi rhelerile ndzi ya entangeni wa le minkanyini

ku ya hlalela swiluva swa le nkoveni,

ni ku vona loko vhinya yi hlukile,

ni loko mirhi ya magrenada yi balekile swiluva.

₁₂Loko ndzi nga si anakanya nchumu,

miehleketo ya mina yi ndzi teka,

yi ndzi veka ekalichini etlhelo ka hosi ya ka hina.

₁₃Cina, cina we Muxulama,

cina hi ku vona!

Xana mi lavela yini ku vona Muxulama,

loko a ri karhi a cina exikarhi ka vahlaleri, xana?