Risimu ra Tinsimu 8

₁Loko a wo va makwerhu

loyi hi nga lo mama vele rin'we,

a ndzi to na hlangana na wena ehandle,

ndzi ku ntswontswa,

ku nga ri na munhu loyi a nga ta ndzi sola.

₂A ndzi ta ku teka,

ndzi ku yisa endlwini ya manana,

yena loyi a ndzi kombeke misava.

A ndzi ta ku nyika vhinyo leyo tsokombela, u nwa,

ni dzova ra magrenada.

₃Onge voko ra wena ra ximatsi ri nga va exikosini xa mina,

lera xinene rona ri nga ndzi singarhela!

₄N'we vanhwana va Yerusalema, ndzi hlambanyeleni

hi timhala ni timbavala,

leswaku mi nge pfuxi murhandziwa wa mina

a nga si swi rhandza.

₅I mani loyi a taka hi tlhelo ra le mananga,

a vukarhile murhandziwa wa yena?

Ndzi ku pfuxile ehansi ka murhi wa muapula,

laha mana wa wena a a lumiwa a ri kona

enkarhini wa ku velekiwa ka wena,

laha loyi a ku kombeke misava a a lumiwa a ri kona.

₆Ndzi veke embilwini ya wena, ndzi va mfungho kona,

u tlhela u ndzi endla mfungho wa voko ra wena,

hikuva rirhandzu ri ni matimba ku fana ni rifu,

ku navela ku ni tihanyi tanihi hi sirha.

Malangavi ya kona i ndzilo lowu vuvumelaka,

lowu hisaka swinene.

₇Mati hambi ma tarisile ku yini,

ma nge ri timi rirhandzu,

hambi yi ri ndhambi,

yi nge ri khukhuli.

Hambiloko wanuna a nga ringeta ku xava rirhandzu

hi rifuwo ra yindlu ya yena hinkwaro,

makumo ya kona ku to va ku soriwa ntsena.

₈Hi ni makwerhu loyi a ha riki ntsongo,

loyi a nga si thugaka mavele;

xana hi ta endla yini hi yena,

loko o tshuka a vulavurisiwile?

₉Loko o va khumbi,

a hi ta aka xihondzo xa silivhere ehenhla ka yena,

loko o va rivanti,

a hi ta n'wi sirhelela hi mapulangi ya kedari.

₁₀Mina ndzi khumbi,

ni mavele ya mina i swihondzo swa rona,

kutani eka yena,

ndzi munhu loyi a tisaka ku rhula.

₁₁Solomoni a a ri ni nsimu ya vhinya eBaala-Hamoni,

leyi a a yi vekile emavokweni ya varindzi,

un'wana ni un'wana wa vona a a fanele ku hakela mihandzu ya kona

hi tisilivhere ta 1 000.

₁₂Wena Solomoni, u nga ha va ni tisilivhere ta 1 000,

varindzi va mihandzu vona va kuma 200;

loko yi ri leya ka mina nsimu ya vhinya,

ndzi ta tihlayisela yona hi ndzexe.

₁₃Wena u tshamaka entangeni wa mina,

vanghana va mina va lava ku twa rito ra wena,

na mina ndza swi lava ku ri twa.

₁₄Hatlisa murhandziwa,

tana ku fana ni mhala kumbe mbavala,

etintshaveni ta mirhi ya swinun'hweriso.