1Leyi i buku ya timhaka ta vutomi bya mina Tobiti n'wana Tobiele, wa Ananiele, wa Aduwele, wa Gabaele, wa Rafaele, wa Raguwele, wa rixaka ra Asiele, wa nyimba ya Neftali. 2Loko Xalimanazere a fuma tiko ra Asiriya, ndzi khomiwile emutini wa mina wa Tixibe lowu nga en'walungwini wa tiko ra Galeliya edzongeni ra Kadexe-Neftali en'walungwini ni le vupeladyambu bya Hasoro ni le n'walungwini wa Fogoro, kutani ndzi yisiwile evukhumbini.
Ta vuntshwa bya Tobiti
3Mina Tobiti, ndzi fambile etindleleni ta ntiyiso ni ta ku lulama vutomi bya mina hinkwabyo, naswona ndzi endlile mintirho leyo tala ya rirhandzu eka varikwerhu ni ka Vayuda van'wana lava yisiweke swin'we na mina evukhumbini emutini wa Ninivha lowu nga ntsindza wa tiko ra Asiriya.
4Loko ndza ha ri ntsongo, ndzi tshamile en'walungwini wa tiko ra Israele. Vanhu va tinyimba hinkwato ta Vaisraele a va fanerile ku ya gandzela Xikwembu emutini wa Yerusalema. Yerusalema i muti lowu Xikwembu xi wu hlawuleke exikarhi ka miti hinkwayo ya Israele ku va ndhawu leyi Tempele ya xona yi nga ta fanela ku akiwa kona, yi ta va vutshamo lebyo hlawuleka bya xona hilaha ku nga heriki. Kambe vanhu hinkwavo va nyimba ya ka hina ya Neftali va fularherile muti wa Yerusalema ni tihosi leti nga vatukulu va Davhida. 5Tanihi vanhu hinkwavo va ka Neftali, va ndyangu wa ka hina a va toloverile ku ya emutini wa Dani etintshaveni ta le n'walungwini wa Galeliya, ku ya gandzela rhole ra nsuku leri vekiweke kona hi Yerobuwamu hosi ya Israele.
Ta ku tshembeka ka Tobiti eka vukhongeri byakwe
6Hi mina ntsena exikarhi ka va ndyangu hinkwavo wa ka hina a ndzi toloverile ku ya eYerusalema ku ya tlangela minkhuvo hinkwayo ya Xikwembu, hilaha nawu wa Muxe wu lerisaka Vaisraele hinkwavo hakona. A ndzi hatlisela eYerusalema ndzi ri ni mihandzu yo sungula ya ntshovelo wa mina, ni mativula ya swifuwo swa mina, ni vukhume bya tihomu ta mina, ni voya byo sungula bya tinyimpfu ta mina. Kutani a ndzi ya yima emahlweni ka alitari eTempeleni, ndzi nyika tinyiko leti hinkwato eka vaprista lava nga vatukulu va Aroni. 7A ndzi humesa vukhume byo sungula bya ntshovelo wa mina wa mavele, ni wa vhinyo, ni wa mihandzu ya mirhi ya mitlhwari ni magrenada, ni makuwa, ni mihandzu yin'wana, ndzi byi nyiketa eka Valevhi lava a va tirhela Xikwembu eYerusalema. Lembe rin'wana ni rin'wana, handle ka lembe ra vu-7 ri nga ra ku wisisa masimu, a ndzi xavisa vukhume bya vumbirhi bya hinkwaswo leswi a ndzi ri na swona, kutani hi mali ya kona ndzi ya eYerusalema ku ya xava swakudya swa nkhuvo.
8Hi lembe ra vu-3 rin'wana ni rin'wana a ndzi nyika vukhume bya vunharhu eka tinoni, ni le ka lava pfumalaka vatswari, ni le ka valuveri lava tshamaka exikarhi ka Vaisraele, kutani ndzi dya minkhuvo swin'we na vona. A ndzi endla tano hi ku landza nawu wa Muxe tanihi laha Debora mana wa kokwa wa mina Ananiele a ndzi leriseke hakona. (A ndzi ri hava vatswari hi ku fa ka tatana).
Ta ku tshembeka ka Tobiti evukhumbini
9Loko ndzi kurile, ndzi tekile Ana, un'wana wa nyimba ya ka hina. Kutani hi velekile n'wana wa mufana loyi hi n'wi thyeke vito ra Tobiya. 10Endzhaku ka sweswo, ndzi yisiwile evukhumbini etikweni ra Asiriya. Leswi hi swona swi nga endla leswaku ndzi kumeka ndzi tshama eNinivha.
Loko hi ri eNinivha, vamakwerhu ni Vayuda van'wana hinkwavo a va toloverile ku dya swakudya swa vaaki va kona. 11Kambe mina ndzi arile ku swi dya, 12hikuva a ndzi landzelela swileriso swa Xikwembu-xa-le-henhla-henhla hi mbilu ya mina hinkwayo. 13Kutani HOSI Xikwembu xi endla leswaku Xalimanezere a ndzi xixima, kutani a ndzi veka ku va muxavi wa swilo hinkwaswo swa yena.
14Loko Xalimanesere a nga si fa, a ndzi ya eMediya nkarhi na nkarhi ku ya n'wi xavisela swilo kona. Nkarhi wun'wana, loko ndzi ri emutini wa Rhage kwale Mediya, ndzi humesile mali ya silivhere yo ringana 410 kg, kutani ndzi yi nyikile Gabaele makwavo wa Gabriya leswaku a ndzi hlayisela yona. 15Loko Xalimanesere a file, Senakeribi n'wana wa yena a sala a fuma. Xikan'we-kan'we tindlela ta ku ya eMediya ti nga fambeki, kutani a ndza ha swi kotanga ku ya kona.
Tobiti a lahla vafi
16Loko Xalimanesere a ha ri hosi, ndzi hlayisile Vayuda varikwerhu hi ku va nyika leswi va swi pfumalaka. 17Loko va ri ni ndlala, ndzi va fihlutile; loko va swerile, ndzi va ambexile; naswona, loko ndzi tshuka ndzi vona ntsumbu wa un'wana wa varikwerhu lowu cukumetiweke ehandle ka khumbi ra Ninivha, a ndzi wu teka ndzi ya wu lahla hilaha swi faneleke hakona.
18Siku rin'wana Senakeribi ú rhukanile Xikwembu N'wini wa tilo. Kavaloko Xikwembu xi n'wi ba, kutani Senakeribi a boheka ku tlhelela etikweni ra Yudiya. Loko a ri karhi a vuya etikweni ra Mediya, a a hlundzukile swinene, kutani a dlayetela Vaisraele lavo tala. Kambe mina ndzi tekile mintsumbu ya vona ndzi ya yi lahla exihundleni. Loko Senakeribi a lava mintsumbu, a nga yi kumanga.
19Kambe un'wana wa vavanuna va le Ninivha a ya tivisa hosi leswaku hi mina a ndzi lahla mintsumbu leyi exihundleni. Loko ndzi twile leswaku Senakeribi ú byeriwile mhaka leyi ni leswaku va lava ku ndzi dlaya, ndzi chavile, kutani ndzi balekile eNinivha ndzi ya tumbela. 20Swilo hinkwaswo leswi a ndzi ri na swona swi tekiwile swi ya nghenisiwa endlwini yo hlayisela tinhundzu ta hosi. A ndzi nga siyiwanga na nchumu handle ka nsati wa mina Ana ni n'wananga Tobiya.
Ntukulu wa xinuna wa Tobiti a n'wi lamulela
21Loko ku hundzile masiku ya kwalomu ka 40, vana vambirhi va xinuna va Senakeribi va n'wi dlaya. Kutani va balekela etintshaveni ta Ararata. Kavaloko Esari-Hadoni n'wana un'wana wa Senakeribi a sala a fuma, kutani a veka Ayikara n'wana wa makwerhu Anaele ku va muhlayisi wa timali hinkwato ta tiko rakwe. 22Leri a ri ri ravumbirhi Ayikara a nyikiwa xitshamo lexi, hikuva enkarhini wa Senakeribi a a ri mucheri wa vhinyo, ni muhlayisi wa xilemo xa mfumo, ni mulawuri wa mali hinkwayo ya yena. Kutani leswi Ayikara a a ri n'wana wa xinuna wa makwerhu, ú ndzi kombelerile, kutani ndzi pfumeleriwa ku tlhelela eNinivha.
