Vutlhari 11

₁Vutlhari byi katekisile mafambisele hinkwawo

ya vanhu va wena hi muprofeta lowo hlawuleka.

₂Va fambile emananga, etikweni leri kalaka vanhu,

va dzimile mitsonga ya vona kona.

₃Va lwile ni valala va vona ni ku va hlula.

₄Loko va khomiwile hi torha va komberile eka wena, we HOSI Xikwembu,

kutani u va nyikile mati lama humesiweke eribyeni lero nonon'hwa, va tima torha ha wona.

₅Makhombo lawa u beke Vaegipta ha wona,

ma ponisile vanhu va wena.

_6-8We HOSI Xikwembu, hikwalaho ka xileriso xa Vaegipta

xa ku dlaya vana hinkwavo va vafana exikarhi ka vanhu va wena,

u pfindlusile xiseluselu xa nambu wa valala lava va tiko ra wena lowu khulukaka minkarhi hinkwayo,

hinkwawo u wu thyakisile hi ngati.

Emananga u khomisile vanhu va wena torha,

ku va kombisa hilaha u beke valala va vona hakona,

kutani u va nyikile mati yo tala va nga swi langutelanga.

₉Loko va kambiwa, hambileswi a va layiwa hi tintswalo,

va dyondzile hilaha lavo homboloka a va xanisiwa hakona,

loko va avanyisiwa hi vukarhi bya wena.

₁₀U kamberile vanhu va wena tanihi tatana loyi a layaka n'wana,

kasi u kamberile lavo homboloka tanihi hosi leyi avanyisaka vanhu hi tihanyi;

₁₁va xanisekile hambi va ri ekusuhi kumbe ekule ni vanhu va wena.

₁₂A va ri enhlomulweni lowukulu,

va gomela loko va tsundzuka leswi humeleleke.

₁₃Loko va twile leswaku lavo lulama va katekisiwile hi leswi vona va biweke ha swona,

va swi tivile leswaku a ku ri ku rhandza ka wena, we HOSI Xikwembu.

₁₄Vaegipta va fularherile ni ku tseketsela

loyi a cukumetiweke ni ku vekiwa erivaleni loko a ha ri n'wana,

kambe eku heteleleni ka timhaka ta kona va n'wi hlamarile,

hikuva lavo lulama a va khomiwanga hi torha ku fana na vona.

₁₅Vuhunguki ni vuphukuphuku bya Vaegipta byi kanganyisile miehleketo ya vona,

va gandzela tinyoka ni swiharhi leswi nga pfuniki nchumu.

Hikokwalaho u va bile hi ku funengeta

tiko hinkwaro ra vona hi swivumbiwa leswi swa magidi-gidi,

₁₆u va dyondzisa leswaku munhu ú biwa hi leswi a dyohaka swona.

₁₇Voko ra wena ra matimba hinkwawo leri tumbuluxeke misava exibakabakeni,

ri kotile ku rhumela vanhu lava eswinkankanka swo tala ni tinghala ta matimba.

₁₈Naswona a wu ta kota ku tumbuluxa swiharhi leswintshwa leswo leva,

leswi emilon'weni ya swona ku nga humaka ndzilo ni musi lowukulu lowu mbulukaka,

leswi mahlo ya swona ma vangamaka tanihi tinhlahle ta ndzilo leti chavisaka,

₁₉leswi herisaka vanhu ku nga ri hi ku va dlayetela,

kambe hi ku swi languta ntsena, kutani va chava swinene, va ko va fa.

₂₀Handle ka swona, wena a wu to va dlaya hi ku hefemula ka wena ntsena,

u va hlongorisa hi ku lulama ka wena,

u va hangalasa hi ku tirhisa katsongo matimba ya wena.

Kambe wena u lulamisile swilo hinkwaswo hi ku swi pima ni ku swi hlaya ni ku swi veka exikalweni.

₂₁Ku komba matimba lamakulu minkarhi hinkwayo swi le ka wena, we HOSI Xikwembu.

I mani loyi a nga tiyelaka matimba ya wena xana?

₂₂Emahlweni ka wena misava hinkwayo yi fana ni xilavi xo vevuka ngopfu exikalweni,

ni thonsi ra mberha leri welaka ehansi.

₂₃U twela vanhu hinkwavo vusiwana, hikuva u kota ku endla hinkwaswo;

u rivalela vanhu swidyoho swa vona, leswaku va ta tisola.

₂₄U rhandza hinkwaswo leswi nga kona,

a wu nyenyi xilo ni xin'we xa leswi u swi endleke,

hikuva ingi u nga swi endlanga loko u swi venga.

₂₅Swilo a swi ta ya emahlweni ni ku va kona hi ndlela yini,

loko a wu nga lo swi lava?

Kumbe a swi ta va swi hlayiseke hi ndlela yini,

loko a wu nga swi tumbuluxanga?

₂₆We HOSI Xikwembu la rhandzaka hinkwaswo,

u hlayisa hinkwaswo leswi hanyaka, hikuva i swa wena.