Ku vonakala ku voningela Vaisraele
1Kutani vanhu va wena lavo hlawuleka va voningeriwile hi ku vonakala lokukulu.
Vaegipta a va twa ku vulavula ka vona, kambe a va va vonanga.
Va tshohokile minkateko ya vanhu va wena lava a va nga xanisekiki.
2Va nkhensile Vaisraele lava, hikuva hambiloko va xanisiwile, a va tirihiselanga,
kutani Vaegipta va va kombela ku suka etikweni ra vona.
3We HOSI Xikwembu, u rhangerile vanhu va wena hi ku nembeleta ndzilo
lowu fanaka ni dyambu leri nga hisiki,
ku va voningela ndlela loko va famba etikweni leri a va nga ri tivi.
4Kambe valala va vona lava tsoniweke ku vonakala, va bohekile ku pfaleriwa exinyamini,
hikuva a va khotsile vanhu va wena.
Vanhu van'wana hinkwavo va nyikiwile hi vanhu va wena
ku vonakala loku nga heriki ka nawu.
Ta ku fa ka mativula ya Vaegipta
5Loko Vaegipta va tiyimiserile ku dlaya swihlangi swa vanhu va wena lavo hlawuleka,
ku vile ni xihlangi lexi chukumetiweke ehandle lexi xi nga tsavuriwa ematini.
Kutani we HOSI Xikwembu, u va bile hi ku dlaya vana lavo tala va vona,
ni ku mbombometa mavuthu ya vona hinkwawo hi magandlati ya lwandle.
6Kambe vatata wa hina va tivisiwile ka ha ri nkarhi leswi swi nga ta humelela vusiku byebyo,
leswaku va ta tsaka ni ku tshemba eka leswi u va tshembiseke swona.
7Vanhu va wena a va tiva leswaku u ta kutsula
lavo lulama ni ku herisa valala va vona.
8Hi ndlela leyi wena u beke valala va hina ha yona,
u hi dzunisile hi ku hi vitanela eka wena.
9Enkarhini lowu vakhongeri va Vaisraele va humesela Xikwembu emagandzelo exihundleni,
va tshembisana leswaku va ta hlayisa nawu wa xona,
ni ku avelana hi ku ringana minkateko ni makhombo.
Va yimbelela tinsimu to dzunisa ta vatata wa vona.
10Kambe swirilo swa valala va vona swi twakala hinkwako-nkwako,
loko va rilela vana va vona lava feke.
11Malandza ni vinyi va wona va biwile hi ndlela yin'we,
hosi ni vanhu va yona va lahlekeriwile ku fana.
12Mintsumbu a yi tsandza vahlayi.
Lava va saleke va hanya, a va tsandzeka ku yi lahla.
Vana va vona lava rhandzekeke va herisiwile hi ndlela yin'we ni nkarhi wun'we.
13Vaegipta a va amukelanga xitsundzuxo ni xin'we xa wena, hikuva a va pfumela eka migilo-gilo ya vona.
Kambe loko mativula ya vona ma dlayiwile va pfumela leswaku Vaisraele i vana va wena.
14We HOSI Xikwembu, exikarhi ka vusiku,
loko hinkwaswo swi te whíí,
15rito ra wena ra matimba hinkwawo ri xikile etilweni, ri huma exiluvelweni xa vuhosi bya wena,
ri nghena etikweni leri avanyiseriweke khombo,
ri fana ni nhenha yo chavisa,
16leyi hlomeke xileriso xa wena tanihi banga leri lotiweke swinene.
Yi yima hi matimba, milenge ya yona yi ri emisaveni ni nhloko ya yona yi fika etilweni,
yi tisa rifu hinkwako.
17Enkarhini lowu lava a va ri kusuhi ni ku fa, va lorha swivono swo chavisa,
kutani va chava swinene.
18Loko va ri karhi va lova hinkwako-nkwako,
va boxa nandzu lowu wu va dlayaka.
19A va tiva swivangelo swa ku fa ka vona,
hikuva va swi vonile emilorhweni ya vona yo chavisa.
Ta loko xikhongelo xa Aroni xi ponisa Vaisraele eka rifu
20Vaisraele van'wana na vona va file,
ntungu wu bile lavo tala va vona emananga,
kambe vukari bya wena HOSI Xikwembu byi hatla byi hela.
21Ku vile ni munhu wo kala xisolo loyi a nga hatla a va sirhelela.
Aroni ú hlurile vukari bya wena, ni ku heta khombo leri,
ni ku tikomba leswaku i nandza wa wena,
hi ku hloma matlhari ya ntirho wa yena wa vuprista,
lama nga swikhongelo ni murhi wa risuna wa magandzelo.
22A nga hlulanga ku nonon'hwa lokukulu loku hi matimba ya yena,
kumbe hi matlhari.
Kambe ú yimisile ku biwa loku hi xikhongelo,
ni ku ku tsundzuxa mintwanano ni switshembiso leswi u swi endleke ni vatata wa hina.
23Loko mintsumbu yi tlhandlekeriwile yi endla tinhulu,
ú lamulerile lava va ha hanyaka evukarini bya wena,
a endla leswaku va nga vavisiwi.
24Eka xiambalo xa yena xo leha a ku ri ni xifaniso xa misava hinkwayo.
Ku dzunisa vatata wa hina ú ambarile tingoti ta mune ta maribye ya nkoka lama kovotliweke exincekaneni xa yena xa le xifuveni.
Xidlodlo xa nhloko ya yena a xi ri xikombiso xa vuhosi bya wena.
25Ntsumi leyi yi tisaka rifu yi chavile swilo leswi hinkwaswo, kutani yi tlhelela endzhaku.
Ku ba loku ka wena ka Vaisraele hi ntungu, a ku ringene.
