Vutlhari 3

₁Loko va ri lavo lulama, va sirheleriwa hi Xikwembu,

va nga ka va nga xanisiwi.

₂Vanhu vo kala mano va ehleketa leswaku lavo lulama, loko va fa,

va susiwa emisaveni va ya nghena ekhombyeni lerikulu,

₃va hi siya va ya eku herisiweni.

Kambe a hi swona. Va lo nghena eku rhuleni.

₄Hambiloko vanhu va anakanya leswaku va biwile,

lavo lulama va tshemba ku hanya hilaha ku nga heriki.

_5-6Mahlomulo ya vona a ma ringanisiwi ni minkateko leyi va nga ta yi amukela.

Xikwembu xi va kamberile tanihi nsuku endzilweni,

kutani xi va kumile va fanerile ku va na xona,

xi va amukerile tanihi magandzelo lama hisiwaka.

₇Loko Xikwembu xi ta ku ta ta va avanyisa,

va ta vangama exikarhi ka lavo homboloka ku fana ni byanyi bya tlhongwe lebyi pfurhaka exikarhi ka mavivi.

₈Lavo lulama va ta lerisa vanhu, va fambisa ni matiko,

kutani Xikwembu N'wini wa vona xi ta va fuma hilaha ku nga heriki.

₉Lava va xi tshembaka va ta twisisa ntiyiso wa tindlela ta xona.

Lavo tshembeka va ta hanya erirhandzwini ra xona,

hikuva xi komba vahlawuriwa va xona musa ni tintswalo,

[xi va sirhelela minkarhi hinkwayo.]

₁₀Kambe lavo homboloka va ta biwa hilaha swi faneleke miehleketo ya vona yo biha,

hikuva va tsan'we lavo lulama ni ku tiarisa emahlweni ka HOSI Xikwembu.

₁₁Lava solaka vutlhari ni switsundzuxo va ta hlupheka evutomini bya vona.

Ku tshemba ka vona a swi pfuni nchumu, mintirho ya vona a yi na mihandzu,

swiendlo swa vona i swa hava.

₁₂Vasati va vona i swiphukuphuku,

vana va vona i vahomboloki.

₁₃Vatukulu va vona va ta rhukaniwa.

Ku katekile mhika leyi tengeke,

leyi yi nga oswangiki,

yi ta kuma hakelo loko Xikwembu xi ta avanyisa vanhu.

₁₄Ku katekile na yena mutsheniwa loyi a hlayiseke nawu,

loyi a nga kungelangiki HOSI Xikwembu swo biha.

Hikwalaho ka ku tshembeka ka yena,

ú ta kuma hakelo leyo hlawuleka leyi tlulaka nkateko wo va ni vana,

a nyikiwa ndhawu leyi tsakisaka swinene

eTempeleni ya HOSI Xikwembu etilweni.

₁₅Swiendlo swo lulama swi fana ni murhi lowu vekaka mihandzu yo hlamarisa.

Vutlhari byi kotisa rimitsu leri tswalaka swihluke minkarhi hinkwayo.

₁₆Kambe vana va vaoswi ni va lava hlanganaka hi ndlela leyi yilaka,

va ta fa va ha ri vatsongo.

₁₇Hambiloko va dyuhala ngopfu, a va nga vuriwi nchumu,

eku dyuhaleni ka vona va nga ka va nga fundzhiwi.

₁₈Loko va fa va ha ri vatsongo, a va nga vi ni ku tshemba,

a va nga tweriwi vusiwana hi siku ra ku avanyisa.

₁₉Makumu ya rixaka ra lavo homboloka ma vavisa ngopfu.