Vutlhari 7

₁Tanihi vanhu hinkwavo, na mina ndzi ta fa,

ndzi ntukulu wa munhu wo sungula loyi a vumbiweke hi ntshuri wa misava.

Ndzi vumbiwile ekhwirini ra manana,

₂ndzi kurisiwile kona tin'hweti ta 10 engatini ya mana wa mina,

ndzi tswariwile hi mbewu ya wanuna entsakweni wa ku etlelana.

₃Loko ndzi velekiwile, tanihi vanhu hinkwavo ndzi sungurile ku hefemula,

ndzi latiwile emisaveni leyi nga vutshamo bya hina hinkwerhu,

xirilo xi vile masungulo ya ku hanya ka mina.

₄Ndzi hlayisiwile hi rirhandzu

ni ku phutseriwa kahle hi xincekana.

₅Ku hava hosi na yin'we leyi nga sungula

ku hanya hi ndlela leyi hambaneke na sweswo.

₆Vanhu hinkwavo va velekiwa hi ndlela yo fana,

kutani va hundza emisaveni hi ndlela yo fana.

₇Hikokwalaho ndzi khongerile, kutani ndzi nyikiwile ku twisisa;

ndzi komberile eka Xikwembu, kutani moya wa vutlhari wu nghene eka mina.

₈Ndzi lavile vutlhari ku tlula tinhonga ni swiluvelo swa vuhosi,

loko ndzi fananisile rifuwo na byona, ndzi anakanye leswaku rifuwo a hi nchumu.

₉A ndzi byi pimanisanga ni ribye ra nkoka ra nxavo lowukulu,

hikuva nsuku wa misava hinkwayo loko wu fananisiwa na byona i sava ntsena,

ni silivhere loko yi ringanisiwa na byona i vumba ntsena.

₁₀Ndzi rhandzile vutlhari ku tlula ntsako emirini ni ku saseka ka nghohe,

ndzi tihlawulele byona ku tlula ku vonakala,

hikuva ku vangama ka byona a ku timeki ni siku ni rin'we.

₁₁Byi ndzi tisele hinkwaswo leswinene,

byi ndzi nyikile ni rifuwo leri tsandzaka vahlayi.

₁₂Ndzi tsakerile leswi hinkwaswo, hikuva vutlhari byi ndzi tisele swona;

kambe a ndzi tivanga leswaku a swi huma eka byona.

₁₃Ndzi byi dyondzile hi ku tinyiketa, ndzi byi dyondzisa van'wana handle ko vilela.

A ndzi fihlanga rifuwo ra byona.

₁₄Eka vanhu, vutlhari i xuma lexi nga heriki.

Lava pfuniwaka ha byona va kuma xinakulobye na Xikwembu,

va amukeleka eka xona hi mhaka ya tinyiko to huma eku leteriweni.

₁₅Ndzi kombela leswaku Xikwembu xi ndzi pfuna ku vulavula hi ku xiyaxiya,

ndzi va ni miehleketo leyi fanelaka tinyiko ta xona.

Hikuva mufambisi wa vutlhari i Xikwembu,

hi xona muololoxi wa tintlhari.

₁₆Hina, ni marito ya hina, ni ku twisisa ka hina,

ni vuswikoti bya hina hinkwabyo,

swi le mavokweni ya xona.

₁₇Xikwembu xi ndzi nyikile vutivi lebyi hetisekeke bya swivumbiwa hinkwaswo,

xi ndzi paluxele xivumbeko xa misava ni mintirho ya swilo hinkwaswo.

₁₈Hi xona xi ndzi tiviseke masungulo ya tinguva, swa le xikarhi ka tona ni mahetelelo ya tona.

Xi ndzi kombile ku hundzuka ka vugima-dyambu ni maxele ya rona,

₁₉ku landzelelana ka minkarhi ya lembe ni mintlawa ya tinyeleti.

₂₀Hi xona xi ndzi paluxeleke xivumbeko xa swifuwo ni mahanyelo ya swiharhi,

matimba ya mimoya ni miehleketo ya vanhu,

tinxaka ta swimila ni matimba ya timitsu.

₂₁Ndzi dyondzile leswi swi nga xihundla ni leswi vonakalaka,

₂₂hikuva ndzi dyondzisiwile hi vutlhari lebyi nga muvumbi wa hinkwaswo.

Vutlhari byi ni moya wo tlhariha, lowo hlawuleka,

lowu nga faniki ni swin'wana, wa maendlele yo tala, wa mano,

lowu hungelaka lomu wu rhandzaka kona, lowu tengeke, lowu basisiweke,

lowu vonakaka swinene, lowu nga hluriwiki,

lowu rhandzaka leswinene, lowu tsakisaka.

₂₃I moya wa matimba lamakulu, lowu katekisaka, wa musa,

wo tiya, wo tshembeka, lowu nga riki ni ku chava,

wa matimba hinkwawo, mulanguteri wa hinkwaswo.

Wu nghena emimoyeni yin'wana hinkwayo yo tlhariha, yo tenga ni ya mano.

₂₄Vutlhari byi tlula hinkwaswo hi ku famba-famba,

hikwalaho ka ku tenga ka byona byi nghena ni ku hangalaka eswivumbiweni hinkwaswo.

₂₅Hi byona ku hefemula ka matimba ya Xikwembu.

Ntwalo wa Xikwembu-xa-matimba-hinkwawo wa tikomba eka byona, wu kala xivati;

leswi nyamisiweke a swi ngheni eka byona.

₂₆Ku vonakala loku nga heriki ku voninga vutlhari,

hi xona xifaniso lexi hetisekeke xa mintirho ni vunene bya Xikwembu.

₂₇Hambiloko byi ri byoxe, vutlhari byi endla hinkwaswo,

a byi hundzuki, kumbe byi hundzula swilo hinkwaswo swi va leswintshwa;

minkarhi ni minkarhi byi nghena eka lava hlawuriweke,

byi va endla vanghana va Xikwembu ni vaprofeta.

₂₈A ku na leswi Xikwembu xi swi rhandzaka

ku tlula munhu la hanyaka hi vutlhari.

₂₉Vutlhari byi tlula dyambu ni tinyeleti hinkwato hi ku saseka ka byona.

Byi tlula ku vonakala

loko byi ringanisiwa na kona,

₃₀hikuva munyama wu hlula ku vonakala,

kambe vubihi a byi hluli vutlhari.