Vutlhari 9

₁“We Xikwembu xa vatata wa mina ni N'wini wa tintswalo,

u tumbuluxile swilo hinkwaswo hi rito ra wena.

₂Hi vutlhari bya wena u vumbile munhu

ku fuma swivumbiwa swa wena hinkwaswo,

₃a ta fuma ni misava hinkwayo hi ku hlawuleka ni ku lulama,

ni ku avanyisa timhaka hi moya lowu lulameke.

₄Hikokwalaho, ndzi kombela vutlhari lebyi tshamaka etlhelweni ra wena,

u nga ndzi siveri ku va un'wana wa vatirhi va wena.

₅Ndzi hlonga ra wena, na yena mana wa mina a a ri nandza wa wena,

ntamu wa mina wa hela, vutomi bya mina byi komile ngopfu,

a ndzi twisisi ngopfu ku lulama ka wena ni nawu wa wena.

₆Hambiloko munhu a hetisekile exikarhi ka vanhu,

a nge vuriwi nchumu loko a pfumala vutlhari lebyi humaka eka wena.

₇U ndzi hlawurile ku va mufumi wa vanhu va wena,

u ndzi endlile muavanyisi wa vana va wena va xinuna ni va xisati.

₈U ndzi lerisile ku aka Tempele entshaveni ya wena leyo hlawuleka,

ni alitari emutini wa vutshamo bya wena,

xi va xifaniso xa ntsonga lowo hlawuleka lowu u wu lunghiseke ku sukela eku sunguleni.

₉Vutlhari byi tshama na wena, byi tiva ni mintirho ya wena.

Loko u tumbuluxile misava, a byi ri kona,

byi tiva leswi swi ku tsakisaka

ni leswi swi twananaka ni milawu ya wena.

₁₀Hikokwalaho, byi rhumele byi huma etilweni lero hlawuleka,

byi xika hi le xiluvelweni xa wena lexi dzunekaka,

a byi ve na mina emintirhweni ya mina leyo karhata,

leswaku na mina ndzi ta dyondza leswi swi ku tsakisaka.

₁₁Hikuva vutlhari byi tiva ni ku twisisa swilo hinkwaswo,

kutani byi ta ndzi fambisa hi fanelo emintirhweni ya mina;

hi ku dzuneka ka byona byi ta ndzi sirhelela.

₁₂Hikokwalaho mintirho ya mina yi ta amukeleka,

ndzi ta avanyisa vanhu va wena hi ku lulama,

ndzi ta lulamela xiluvelo xa tatana.

₁₃“I mani loyi a tivaka miehleketo ya Xikwembu?

Loyi a twisisaka ku rhandza ka Xikwembu i mani?

₁₄Miehleketo ya vanhu va ku fa a yi pfuni nchumu,

ni makungu ya hina ya hluleka.

₁₅Miri wa hina lowu faka wu hi tshikelela moya,

wu karhata ni mianakanyo ya hina.

₁₆Ku bvumba leswi nga kona emisaveni swa hi nonon'hwela,

leswi nga kusuhi na hina hi swi tiva hi ku tikarhata,

kambe i mani la nga hlavutelaka leswi nga kona etilweni ke?

₁₇I mani loyi a nga tivaka switsundzuxo swa wena loko u nga n'wi nyikanga vutlhari,

ni loko u n'wi tsona Moya lowo Kwetsima lowu humaka etilweni ke?

₁₈Hi mukhuva lowu, tindlela ta vaaki va misava ti lulamisiwile,

vanhu va tivisiwile leswi swi ku tsakisaka, vutlhari byi va ponisile.”