1 DITIRAFALO 13

₁Dafite a gakololana le balaodi ba dikete, le ba makgolo, e bong le mogogi mongwe le mongwe. ₂Dafite a raya phuthego yotlhe ya Iseraele a re: “Fa go le molemo mo matlhong a lona, mme fa e le mo go tswang mo go Jehofa Modimo wa rona, a re romeng batho ba ye le lefatshe lotlhe, ba ye gongwe le gongwe kwa go ba ga rona ba ba setseng mo lefatsheng lotlhe la Iseraele, ba baperesiti le Balefi ba nang nabo mo metseng ya bone e e nang le dintlhana, gore ba phuthegele kwano go rona. ₃A re busetseng letlole la Modimo wa rona kwa go rona, gonne ga re a ka ra botsa kwa go lone mo metlheng ya ga Saule.” ₄Mme phuthego yotlhe ya re e tlaa dira jalo, gonne selo seo se ne se siame mo matlhong a batho botlhe.

₅Jalo Dafite a phutha Baiseraele botlhe, go tswa Shihore molatswana wa Egepeto, go ya fela kwa botsenong jwa Hamathe, gore ba tle go tsaya letlole la Modimo kwa Kiriathe-jearime. ₆Dafite a tlhatloga, le Baiseraele botlhe, ba ya kwa Baale, ke go re kwa Kiriathe-jearime, o e leng wa Juta, ba ya go tsaya gone letlole la Modimo, Jehofa yo o dutseng mo ditšherubeng, yo o bidiwang ka le e leng Leina. ₇Mme ba tshola letlole la Modimo ka kara e ntšha, ba e ntsha mo ntlong ya ga Abinatabe, mme Use le Ahio ba kgweetsa kara. ₈Dafite le Baiseraele botlhe ba letsa fa pele ga Modimo ka thata yotlhe ya bone, e bong ka dipina, le ka diharepe, le ka disaletere, le ka meropana, le ka disemebala le ka dinaka.

₉Ya re ba tla fa seboping sa pholelo sa ga Kitone, Use a ntsha letsogo, a re o tshwara letlole; gonne dikgomo di ne tsa kgokgweetsega. ₁₀Bogale jwa ga Jehofa jwa tukela Use, mme a mo itaya, ka a ntsheditse letlole letsogo, a swela gone fa pele ga Modimo. ₁₁Dafite a itumologa ka Jehofa a tshoganyeditse Use, leina la felo foo la bidiwa ga twe Peresusa, nako e sa le eno. ₁₂Dafite a boifa Modimo ka tsatsi leo, a re: “Ana ke tlaa isa jang letlole la Modimo kwa go nna kwa gae?” ₁₃Dafite a se ka a hudusetsa letlole kwa go ene kwa motseng wa ga Dafite, mme a le isa fa thoko mo ntlong ya ga Obete-etome wa Mohite. ₁₄Letlole la Modimo la nna le ba ntlo ya ga Obete-etome mo ntlong ya gagwe ka dikgwedi di le tharo. Jehofa a segofatsa ntlo ya ga Obete-etome le tsotlhe tse o ne a na natso.