Dafite o bala batho ba gagwe
1Satane a tsogela Baiseraele, a tlhotlheletsa Dafite gore a bale Baiseraele. 2Dafite a raya Joabe le dikgosana tsa batho a re: “Yang lo bale Baiseraele go tswa Berešeba go ya fela kwa Dane; lo ntereletse lefoko gore ke tle ke itse palo ya bone.”
3Mme Joabe a re: “A Jehofa a ntsifatse batho ba gagwe, gore ba fete e e leng palo ya bone galekgolo, mme kgosi morena wa me, a ga se batlhanka ba morena wa me botlhe? Ana morena wa me o lopela eng selo se? Wa bo o gogela Baiseraele molato ka ntlha yang?” 4Le fa go ntse jalo lefoko la kgosi la fenya Joabe. Ka ntlha ya moo Joabe a tloga, a ya a ralala Baiseraele botlhe, a ba a tla Jerusalema. 5Joabe a naya Dafite tshobokanyo ya go balwa ga batho. Baiseraele ba le mmogo ba bo ba le 1 100 000; banna ba ba itseng go janja ka tšhaka; Bajuta ba bo ba le 470 000, e le banna ba ba itseng go kgadimokanya tšhaka. 6Mme Balefi le Babenjamine a se ka a ba balela mo go bone; gonne lefoko la kgosi le le maswe thata mo go Joabe.
7Mme Modimo wa itumologela selo se; ke gone ka moo a betsa Baiseraele. 8Dafite a raya Modimo a re: “Ke leofile thata ka ke dirile selo se. Jaana, ke a go rapela, tlosa boikepo jwa motlhanka wa gago; gonne ke dirile ka boeleele thata.”
9Jehofa a bua le Gate mmonedi wa ga Dafite a re: 10“Ya o bue le Dafite o re, Jehofa o bua jaana a re: ‘Ke baya dilo di le tharo fa pele ga gago; itshenkela sengwe mo go tsone, gore ke tle ke se go direle.’ ”
11Gate a tla mo go Dafite, a mo raya a re: “Jehofa o bua jaana a re: ‘Tsaya se o se ratang; 12a e ka nna le fa e le dinyaga di le tharo tsa leuba; kgotsa go gailwa ka dikgwedi di le tharo fa pele ga baba ba gago, tšhaka ya baba ba gago e ntse e go tshwara; kgotsa e ka nna tšhaka ya ga Jehofa ka malatsi a le mararo, e bong kgogodi mo lefatsheng, le moengele wa ga Jehofa go senya mo melelwaneng yotlhe ya Iseraele?’ Jaana o gopole phetolo e ke tlaa e busetsang kwa go yo o nthomileng.”
13Mme Dafite a raya Gate a re: “Ke mo pitlaganong e kgolo; a ke wele mo seatleng sa ga Jehofa, gonne mautlwelo botlhoko a gagwe a magolo thata; ke se wele mo seatleng sa motho.”
14Jalo Jehofa a tsosetsa Baiseraele kgogodi; mme ga wa banna ba Baiseraele ba le 70 000. 15Mme Modimo wa roma moengele kwa Jerusalema a ya go o senya; mme ya re a itlhoma gore o a o senya, Jehofa a leba, mme a ikwatlhaela bosula, a raya moengele yo o senyang a re: “Go lekanye; gona seatla sa gago jaanong.” Moengele wa ga Jehofa a bo a eme fa seboping sa pholelo sa ga Orenane wa Mojebuse.
16Dafite a tsholetsa matlho, a bona moengele wa ga Jehofa a eme fa gare ga lefatshe le legodimo a tshotse tšhaka e ekilwe mo letsogong la gagwe le otlololetswe Jerusalema. Foo Dafite le bagolwane ba wela fa fatshe ka difatlhogo, ba apere letsela la kgetsi. 17Dafite a raya Modimo a re: “A ga se nna yo ke laotseng gore batho ba balwe? Ke nna fela yo ke leofileng ka ba ka ikepa thata; dinku tse tsone di dirileng? Ke a go rapela, Jehofa Modimo wa me, a seatla sa gago se nne mo go nna le mo ntlong ya ga rre; e seng mo bathong ba gago, gore ba se ka ba nna mo sebetsong.”
18Foo moengele wa ga Jehofa a laola Gate gore a reye Dafite a re, Dafite a ye a agele Jehofa sebeso mo seboping sa pholelo sa ga Orenane wa Mojebuse. 19Mme Dafite a ya ka polelo ya ga Gate e o e buileng ka leina la ga Jehofa. 20Mme Orenane a retologa, a bona moengele; bomorwawe ba bane ba ba nang nae ba iphitlha. Jaana Orenane a bo a fola mabele. 21Ya re Dafite a tla mo go Orenane, Orenane a leba, mme a bona Dafite, mme a tswa mo seboping sa pholelo a ikobela Dafite a isitse sefatlhogo fa fatshe. 22Foo Dafite a raya Orenane a re: “Nnaya felo ga sebopi se, sa pholelo, gore ke agele Jehofa sebeso gone; o tlaa se nnaya ka tlhwatlhwa e e tletseng, gore sebetso se khutlisiwe mo bathong.”
23Orenane a raya Dafite a re: “Se tseye fela, a kgosi morena wa me a dire se se molemo mo matlhong a gagwe; bona, ke go naya dikgomo go nna tshupelo e e fisiwang, le dilo tse go folwang ka tsone go nna dikgong, le mabele go nna tshupelo ya boupe; ke ntsha gotlhe fela.”
24Mme kgosi Dafite a raya Orenane a re: “Nnyaa; mme ruri ke tlaa go reka ka tlhwatlhwa e e tletseng; gonne ga nketla ke tsaya se e leng sa gago ke se tseela Jehofa, le fa e le go isa tshupelo e e fisiwang e ke sa e ntshetsang sepe.” 25Mme Dafite a reka felo foo mo go Orenane ka dipapetla tsa gouta di le 600. 26Mme Dafite a agela Jehofa sebeso gone, a isa ditshupelo tse di fisiwang le ditshupelo tsa kagiso, a biletsa kwa go Jehofa; mme a mo araba a le mo legodimong ka molelo mo sebesong sa tshupelo e e fisiwang. 27Jehofa a laola moengele; mme a somela tšhaka mo kgatleng ya yone. 28Ya re ka lobaka loo, ka Dafite a bona fa Jehofa a mo arabile mo seboping sa pholelo sa ga Orenane wa Mojebuse, foo a isa tlhabelo gone. 29Gonne motlaagana wa ga Jehofa, o Moše o kileng a o dira mo nageng, le sebeso sa tshupelo e e fisiwang, di ne di le kwa felong fa go tlotlometseng kwa Gibeone ka lobaka loo. 30Mme Dafite o ne a sa kake a ya fa pele ga sone a ya go botsa mo Modimong; gonne a boifa ka ntlha ya tšhaka ya moengele wa ga Jehofa.
