Ba ba boileng kwa botshwarong
1Jalo Baiseraele botlhe ba balwa ka fa ditshikeng; mme bonang, ba kwadilwe mo lokwalong lwa dikgosi tsa Iseraele. Bajuta ba isiwa Babilone ba golegilwe ka ntlha ya tlolo ya bone. 2Jaana banni ba ntlha ba ba tsileng ba aga mo dikabelong tsa bone mo metseng ya bone, e ne e le Iseraele, baperesiti, Balefi le Banethinime. 3Mo Jerusalema ga aga bangwe ba bana ba Juta, le ba bana ba Benjamine, le ba bana ba Eferaime le Manase;
4Utekai morwa Amihute, morwa Omeri, morwa Imeri, morwa Bani, wa bana ba ga Perese morwa Juta. 5Le Babišilone; Asaia motsalwapele le bomorwawe. 6Le ba bomorwa Sera ke Jeuele le bana ba ga rraabo ba le 690.
7Le ba bomorwa Benjamine e ne e le Salu morwa Mešulame morwa Hotafia morwa Hasenau; 8le Ibeneia morwa Jerohame, le Ela morwa Usi, morwa Mikeri, le Mešulame morwa Shefatia, morwa Ruele, morwa Ibenija;
9le bomorwa rraabo, ka fa dikokomaneng tsa bone, ba le 956. Banna botlhe bao e ne e le ditlhogo tsa matlo a borraabo ka makgotla a borraabo.
Balefi ba ba agileng kwa Jerusalema
10Le ba baperesiti; Jetaia, le Jehoiaribe le Jakine; 11le Asaria morwa Hilekia, morwa Mešulame, morwa Satoke, morwa Meraiothe, morwa Ahitube, molaodi wa ntlo ya Modimo; 12le Ataia morwa Jerohame, morwa Pašure morwa Malakija, le Masai morwa Adiele, morwa Jasera, morwa Mešulame, morwa, Mešilemithe, morwa Imere; 13le bomorwa rraabo, ditlhogo tsa makgotla a borraabo ba le 1 760; e le banna ba ba nonofileng thata mo tirong ya tirelo ya ntlo ya Modimo.
14Le ba Balefi; Shemaia morwa Hašube, morwa Aserikame, morwa Hašabia, wa bomorwa Merari; 15le Bakebakare, Hereše, le Galale le Mathania morwa Mika, morwa Sikeri, morwa Asafe; 16le Obadia morwa Shemaia, morwa Galale, morwa Jeduthune, le Berekia morwa Asa, morwa Elekana; yo o ne a agile mo metsaneng ya Banetofatha.
Badisa ba Tempele ba ba agileng kwa Jerusalema
17Le balebedi ba kgoro: Shalume, Akube, Talemone, Ahimane le bomorwa rraabo; Shalume e ne e le ene yo mogolo; 18e le bone ba gale ba ne ba ntse ba lebeletse mo kgorong ya kgosi ntlheng ya botlhabatsatsi; e ne e le bone balebedi ba kgoro ba bothibelelo jwa bana ba ga Lefi.
19Le Shalume morwa Kore, morwa Ebiasafe, morwa Kora, le bomorwa rraagwe ba ntlo ya ga rraagwe, Bakora, ba bo ba laola tiro ya tirelo, e le balebedi ba dikgoro tsa motlaagana; le borraabo ba kile ba ne ba le balaodi ba bothibelelo jwa ga Jehofa, balebedi ba botseno. 20Finehase morwa Eleasare e ne e le molaodi wa bone mo metlheng e e fetileng, mme Jehofa a na nae.
21Sekaria morwa Mešelemia e ne e le molebedi wa kgoro ya mogope wa bophuthegelo.
22Bao botlhe ba ba itshenketsweng go nna balebedi ba dikgoro ba bo ba le 212. Bao ba balwa ka losika mo metsaneng ya bone, ba Dafite le Samuele wa mmoni, ba ba tlhomileng mo tirong ya bone ya boikanngo. 23Jalo bone le bana ba bone e ne e le balebedi ba dikgoro tsa ntlo ya ga Jehofa, e bong ntlo ya motlaagana, ka makoko. 24Balebedi ba dikgoro ba bo ba le mo dintlheng tsoo nne, e bong ntlheng ya botlhabatsatsi, ya bophirimatsatsi, ya botsheka le ya borwa. 25Bomorwa rraabo ba ba mo metsaneng ya bone, ba bo ba na le go tla go nna nabo ka letsatsi la bosupa ka metlha le metlha; 26gonne balebedi ba bagolo ba kgoro, ba bane, ba e ne e le Balefi, ba bo ba le mo tirong ya boikanngo, ba bile ba le balaodi ba matlwana le ba mabolokelo mo ntlong ya Modimo. 27Mme ba bo ba lala mo tikologong ya ntlo ya Modimo, gonne tibelo ya bone e le mo go bone, e le tiro ya bone go e bula ka meso le meso.
Balefi ba bangwe
28Bangwe ba bone e ne e le balebedi ba dilwana tsa tirelo; gonne di ne di tle di leriwe mo teng ka palo, di be di ntshiwe ka palo. 29Bangwe ba bone ba bile ba beilwe mo taolong ya dilo tsa ntlo, le ya dilwana tsotlhe tsa ntlo e e boitshepo, le ya setou le ya bojalwa jwa mofine, le ya lookwane, le ya lebano, le ya dinkga monate. 30Bangwe ba bomorwa baperesiti ba baakanya setlolo sa lebano le malao.
31Matithia, mongwe wa Balefi, motsalwapele wa ga Shalume wa Mokora, o ne a na le tiro ya boikanngo mo dilong tse di besiwang mo dipitseng tse di dikhaetla. 32Bangwe ba bomorwa rraabo, ba bomorwa Bakohathe, ba bo ba laola senkgwe sa tshupo, go se baakanya ka sabata mongwe le mongwe.
33Ba ke bone baopedi, ditlhogo tsa makgotla a borraabo ba Balefi, ba ba agileng mo matlwaneng, mme ba bo ba golotswe mo ditirelong tse dingwe; gonne ba tshwerwe ke tiro ya bone motshegare le bosigo.
34Bao e ne e le ditlhogo tsa matlo a borraabo ba Balefi, mo dikokomaneng tsa bone, e le batho ba bagolo, bao ba ne ba agile mo Jerusalema.
Ba lotso le losika lwa ga kgosi Saule
35Mo Gibeone ga bo go agile rraagwe Gibeone, e bong Jeiele, yo leina la mosadi wa gagwe e ne e le Maaka. 36Motsalwapele wa gagwe wa mosimane e ne e le Abedone, ga bo go le Sure, le Kiše, Baale, Nere le Natabe, 37le Getore, le Ahio, le Sekaria le Mikelothe; 38Mikelothe a tshola Simeame. Le bone ba aga le bomorwa rraabo mo Jerusalema bolebagana le bomorwa rraabo.
39Nere a tshola Kiše, Kiše a tshola Saule, Saule a tshola Jonathane, le Melekišue, le Abinatabe le Ešebaale. 40Morwa Jonathane e ne e le Meribe-baale; Meribe-baale a tshola Mika. 41Bomorwa Mika: Pithone le Meleke le Taherea le Ahase. 42Ahase a tshola Jara, Jara a tshola Alemethe le Asemafethe le Simeri; Simeri a tshola Moše. 43Moše a tshola Binea, le Refaia morwawe, le Elease morwawe, le Asele morwawe.
44Asele o ne a na le bana ba basimane ba le barataro, ba maina a bone e leng one a: Aserikame, le Bokeru, Išemaele, le Shearia, le Obedia le Hanane; bao e ne e le bomorwa Asele.
