1 DIKGOSI 14

₁E rile ka lobaka loo Abija morwa Jeroboame a tsogelwa ke bolwetse. ₂Jeroboame a raya mosadi wa gagwe a re: “Ke a go rapela, a ko o nanoge, o ikgakise, gore o tle o se ka wa itsiwe fa o le mosadi wa ga Jeroboame, o ye kwa Shilo. Bona, Ahija moperofeti o gone, yo o ne a bua ka ga me, a re: Ke tlaa nna kgosi ya batho ba. ₃O ye o tshotse dinkgwe di le some, le dipapetlana tsa senkgwe, le kurwana ya dinotshe, o ye kwa go ene. O tlaa go bolelela se se tlaa diralelang ngwana.”

₄Mosadi wa ga Jeroboame a dira jalo, a nanoga, a ya kwa Shilo, a ya kwa ntlong ya ga Ahija. Ahija a bo a sa bone, gonne o na a foufetse ka ntlha ya botsofe jwa gagwe. ₅Jehofa a raya Ahija a re: “Bona mosadi wa ga Jeroboame o tla go botsa mo go wena ka ga morwawe; gonne o a lwala. O tlaa bua nae o re, o re: Gonne go tlaa dirala go re fa a tsena, a itsheme mosadi o sele.” ₆Mme ga nna jalo, ya re Ahija a utlwa mokgwasa wa lonao lwa gagwe, ka a tsena ka mojako a re: “Tsena, wena mosadi wa ga Jeroboame, o itshemelang o sele? Gonne ke romilwe kwa go wena ka mafoko a a boima. ₇Ya o bolelele Jeroboame o re: ‘Jehofa Modimo wa Iseraele a re: E re ka ke go tsere mo bathong, ka go goletsa, ka go dira kgosana ya batho ba me Baiseraele, ₈ka rutla bogosi mo kgotleng ya ga Dafite, ka bo naya wena; mme le fa go ntse jalo ga o ise o nne jaaka motlhanka wa me Dafite, yo o ne a tshegetsa ditaolo tsa me, e le yo o ne a ntshala morago ka pelo yotlhe ya gagwe, go dira sone fela se se siameng mo matlhong a me; ₉mme o dirile bosula bogolo go botlhe ba ba neng ba le pele ga gago, wa ya wa itirela medimo e sele le ditshwantsho tse di thetsweng, go ntlhotlheletsa bogaleng, o ntatlhetse ka kwa morago ga gago. ₁₀Ke gone ka moo ke tlaa tsosetsang ntlo ya ga Jeroboame bosula, ke tlaa kgaola mo go Jeroboame ngwana mongwe le mongwe wa mosimane, ene yo o tswaletsweng, le yo o itsamaelang fela mo go Baiseraele; ntlo ya ga Jeroboame ke tlaa e feelela ruri koo, jaaka motho a tla a feelele motshotelo koo, go tsamaya o fela otlhe. ₁₁Wa ga Jeroboame yo o tlaa swelang mo motseng, dintša di tlaa mo ja; yo o swelang kwa nageng dinonyane tsa loapi di tlaa mo ja; gonne Jehofa o se buile.’

₁₂“Ke gone nanoga o ye kwa ntlong ya gago; mme e tlaa re dinao tsa gago di tsena mo motseng, ngwana o tlaa swa. ₁₃Baiseraele botlhe ba tlaa mo lelela ba mo fitlha; gonne ke ene esi wa ga Jeroboame yo o tlaa fitlhwang mo phupung; gonne mo go ene go fitlhetswe sengwe se se molemo ntlheng ya ga Jehofa, Modimo wa Iseraele, mo go ba ntlo ya ga Jeroboame. ₁₄Gape Jehofa o tlaa itsosetsa kgosi ya Iseraele, e e tlaa kgaolang ntlo ya ga Jeroboame ka tsatsi leo; ana mme ka reng? Ke raya fela gompieno. ₁₅Gonne Jehofa o tlaa goba Baiseraele jaaka lotlhaka lo tle lo thukhuthege mo metsing, o tlaa khumola Baiseraele mo lefatsheng le le molemo le, le o ne a le naya borraabo, o tlaa ba falaletsa kwa moseja ga Noka; gonne ba dirile Medimako ya bone, ba tlhotlheletsa Jehofa mo bogaleng. ₁₆O tlaa tlhoboga Baiseraele ka ntlha ya maleo a ga Jeroboame, a o a leofileng, le a o leofisitseng Baiseraele ka one.”

₁₇Mosadi wa ga Jeroboame a nanoga, a tsamaya, mme a tla mo Tiresa; ya re a gata fa serepuding sa ntlo, ngwana a swa. ₁₈Mme Baiseraele botlhe ba mo fitlha, ba mo lelela, ka fa lefokong la ga Jehofa, le o ne a le bua ka motlhanka wa gagwe, Ahija moperofeti.

₁₉Ditiro tse dingwe tsa ga Jeroboame, jaaka a ne a tlhabana le jaaka a ne a busa, bonang, go kwadilwe mo lokwalong lwa ditirafalelo tsa dikgosi tsa Iseraele. ₂₀Lobaka lo Jeroboame a busitseng ka lone e ne e le dinyaga di le 22; mme a robala le borraagwe; Natabe morwawe a busa mo boemong jwa gagwe.

₂₁Rehoboame morwa Solomone a busa mo Juta. Rehoboame o rile a simolola go busa a bo a le dinyaga di le 41, mme a busa ka dinyaga di le 17 mo Jerusalema, motse o Jehofa o ne a o itshenketse mo ditsong tsotlhe tsa Iseraele, go tla a baya leina la gagwe gone. Leina la ga mmaagwe e ne e le Naama mosadi wa Moamone.

₂₂Bajuta ba dira se se bosula mo ponong ya ga Jehofa; ba mo tlhotlheletsa mo lefufeng ka maleo a bone a ba a dirileng, go feta tsotlhe tse borraabo ba kileng ba di dira. ₂₃Gonne le bone ba ne ba ikagela mafelo a a tlotlometseng, le maje a a emeng metloutlo le Medimako, mo thoteng nngwe le nngwe e e godileng, le fa tlase ga setlhare sengwe le sengwe se setala. ₂₄Go ne go bile go le basotoma mo lefatsheng; ba dira jaaka makgapha otlhe a merafe e Jehofa Modimo o ne a e lelekile fa pele ga bana ba Iseraele.

₂₅Ga dirala ya re mo ngwageng wa botlhano wa kgosi Rehoboame, Shišake kgosi ya Egepeto, a bololela Jerusalema. ₂₆A tsaya dikhumo tsa ntlo ya ga Jehofa, le dikhumo tsa ntlo ya kgosi; a tsaya gotlhe fela, a ba a tsaya dithebe tsa gouta tse Solomone o kileng a di dira. ₂₇Kgosi Rehoboame a dira dithebe tsa kgotlho mo boemong jwa tsone, a di tsenya mo diatleng tsa balaodi ba balebedi, ba ba lebeletseng mojako wa ntlo ya kgosi. ₂₈Ga nna jalo, e ne e tle e re gongwe le gongwe fa kgosi e ya mo ntlong ya ga Jehofa, balebedi ba di tshole, ba itse go di busetsa mo ntlwaneng ya balebedi.

₂₉Jaana ditiro tse dingwe tsa ga Rehoboame, le tsotlhe tse o ne a di dira, a ga di a kwalwa mo lokwalong lwa ditirafalelo tsa dikgosi tsa Juta? ₃₀Go ne go le ntwa gare ga Rehoboame le Jeroboame ka metlha yotlhe. ₃₁Rehoboame a robala le borraagwe, a fitlhwa le borraagwe mo motseng wa ga Dafite; leina la ga mmaagwe e ne e le Naama mosadi wa Moamone. Mme Abijame morwawe a busa boemong jwa gagwe.