1 DIKGOSI 2

₁Jaana lobaka lwa ga Dafite lwa go swa lwa atamela; mme a laela Solomone morwawe a re: ₂“Nna ke ya tseleng ya lefatshe lotlhe; mme ka re, o nne thata o bo o iponatse fa o le monna. ₃O tshegetse tao ya ga Jehofa Modimo wa gago, go sepela mo ditseleng tsa gagwe, go tshegetsa melao ya gagwe, le ditaolo tsa gagwe, le dikatlholo tsa gagwe, le ditshupo tsa gagwe, ka fa go kwadilweng mo molaong wa ga Moše ka gone, gore o tle o dire ka botlhale mo go tsotlhe tse o di dirang, le gongwe le gongwe kwa o retologelang gone, ₄gore Jehofa a tlhomamise lefoko la gagwe le o ne a le bua ka ga me, a re: ‘Fa bana ba gago ba tlhokomela tsela ya bone, go sepela fa pele ga me mo boammaaruring ka pelo yotlhe ya bone, le ka mowa otlhe wa bone, ga go ketla go go tlhokafalela monna mo setulong sa bogosi sa Iseraele,’ (go bua Jehofa).

₅“Gape, o a itse se Joabe morwa Seruja o ne a se ntirela, e bong se o ne a se direla balaodi ba babedi ba dintwa tsa Iseraele, e bong Abenere morwa Nere, le Amase morwa Jethere, ba o ba bolaileng, a tsholola madi a ntwa mo motlheng wa kagiso, a ba a baya madi a ntwa mo moitlamong wa gagwe o o neng o le mo lothekeng lwa gagwe, le mo ditlhakong tsa gagwe tse o ne a di rwele. ₆Ke gone dira ka fa botlhaleng jwa gago, mme o se ka wa lesa tlhogo ya gagwe e pududu ya fologela mo phupung ka kagiso.

₇“Mme o nne pelonomi mo go bomorwa Baresilai wa Mogileate, mme a ba nne mo go bone ba ba jelang fa lomating lwa gago, gonne e rile ke tshaba Abesalome mogoloo, ba ne ba tla jalo mo go nna.

₈“Bona, o na le Shimei morwa Gere wa Mobenjamine wa Bahurime, yo o ne a mphutsa ka phutso e e botlhoko ka tsatsi le ke ileng kwa Mahanaime ka lone; mme a tla go nkgatlhantsha kwa Joretane, ka mo ikanela ka Jehofa ka re: ‘Ga nketla ke go bolaya ka tšhaka.’ ₉Ke gone jaana, o se ka wa mo golola mo molatong, gonne o motho yo o botlhale; o tlaa itse se o tshwanetseng go se mo direla, o tlaa folosetsa tlhogo e pududu ya gagwe mo phupung ka madi.”

₁₀Dafite a robala le borraagwe, mme a fitlhwa mo motseng wa ga Dafite. ₁₁Lobaka lo Dafite o ne a busitse Iseraele ka lone e ne e le dinyaga di le 40; a busa ka dinyaga di supa mo Heberone, a busa ka dinyaga di le 33 mo Jerusalema. ₁₂Mme Solomone a dula mo setulong sa bogosi sa ga Dafite rraagwe; mme bogosi jwa gagwe jwa nitama thata.

₁₃Foo Atonija morwa Hagithe a tla mo go Bathešeba mmaagwe Solomone. Bathešeba a re: “A o tla ka kagiso?” A re: “Ka kagiso.” ₁₄Gape a re: “Ke na le sengwe se ke se buang nao.” A re: “Bua.”

₁₅A re: “O a itse fa bogosi e ne e le jwa me, le go re, Baiseraele botlhe ba ne ba lebile nna gore ke ba buse; le fa go ntse jalo bogosi bo retologile, bo ile go nna jwa ga nnake, gonne e le jwa gagwe bo tswa mo go Jehofa. ₁₆Jaana ke go lopa topo e le nngwe fela, o ko o se gane.” Mme a mo raya a re: “Bua.”

₁₇A re: “Ke a go rapela, bua le kgosi Solomone (gonne ga a ketla a go gana), gore a tle a nneye Abišage wa Mošuneme go nna mosadi.”

₁₈Bathešeba a re: “Go molemo; ke tlaa go buelela mo kgosing.”

₁₉Ke gone ka moo Bathešeba a ya kwa go kgosi Solomone, go buelela Atonija mo go ene. Kgosi ya nanoga ya tla go mo kgatlhantsha; mme a mo ikobela, a dula mo setulong sa gagwe sa bogosi, a laola gore go beelwe mma kgosi setulo sa segosi; mme a dula ka fa tsogong le legolo la gagwe. ₂₀Foo a re: “Ke lopa toponyana mo go wena; a ko o se gane.” Kgosi ya mo raya ya re: “Lopa mma, gonne ga nketla ke gana.”

₂₁A re: “A Abišage wa Mošuneme a newe Atonija mogoloo go nna mosadi.”

₂₂Kgosi Solomone a fetola mmaagwe a re: “Ke ka ntlha yang o lopela Atonija Abišage wa Mošuneme? Mo lopele le jone bogosi; gonne ke mogolole. Ee, o bo lopele ene le Abiathare moperesiti, le Joabe morwa Seruia.” ₂₃Foo kgosi Solomone a ikana ka Jehofa, a re: “A Modimo o ntirele jalo, o bo o oketse, fa Atonija a sa buela lefoko le gore a ipolaye. ₂₄Ke gone jaana jaaka Jehofa a tshedile, yo o ntlhomamisitseng, a mpaya mo setulong sa bogosi sa ga rre Dafite, yo o bileng a ntirela motse, jaaka a boletse, ruri Atonija o tlaa bolawa ka tsatsi leno.”

₂₅Kgosi Solomone a roma ka Benaia morwa Joiata; mme a mo wela godimo a mmolaya a swa.

₂₆Kgosi ya raya Abiathare moperesiti ya re: “Ya kwa Anathothe, kwa matlhagareng a gago; gonne o tshwanetse go swa; ga nketla ke go bolaya mo lobakeng lono, ka o ne wa rwala letlole la ga Jehofa Modimo fa pele ga rre Dafite, le ka gonne o ne wa patikwa ka tsotlhe tse rre o ne a patikwa ka tsone.” ₂₇Solomone a kgoromeletsa Abiathare kwa ntle a se ka a tlhola a le moperesiti wa ga Jehofa; gore a tle a diratse lefoko la ga Jehofa, le o ne a la bua ka ga ntlo ya ga Eli kwa Shilo.

₂₈Mafoko a fitlha kwa go Joabe, gonne Joabe o ne a sokologetse kwa go Atonija, le fa a se ka a sokologela kwa go Abesalome. Joabe a tshabela kwa Mogopeng wa ga Jehofa, mme a tshwara dinaka tsa sebeso. ₂₉Ga bolelelwa kgosi Solomone ga twe: “Joabe o tshabetse kwa Mogopeng wa ga Jehofa, mme bonang, o fa sebesong.” Foo Solomone a roma Benaia morwa Joiata a re: “Ya, o mo wele godimo.” ₃₀Benaia a tla mo Mogopeng wa ga Jehofa, mme a mo raya a re: “Kgosi e bua jaana ya re: ‘Tswa.’ ” Mme a re: “Nnyaa; ke tlaa swela fa.” Benaia a busetsa lefoko kwa kgosing a re: “Joabe o buile jaana, a mphetola a re, a re.”

₃₁Kgosi ya mo raya ya re: “Dira jaaka a buile, o mo wele godimo, o mo fitlhe; gore o tlose mo go nna le mo ntlong ya ga rre madi a a se nang molato, a Joabe o a tsholotseng. ₃₂Jehofa o tlaa busetsa madi a gagwe mo tlhogong ya gagwe, ka a ne a wela banna ba le babedi ba ba siameng godimo, le ba ba molemo bogolo go ene, a ba bolaya ka tšhaka, e bong Abenere morwa Nere, molaodi wa ntwa ya Iseraele, le Amase morwa Jethere molaodi wa ntwa ya Juta, rre Dafite a sa itse. ₃₃Jalo madi a bone a tlaa boela mo tlhogong ya ga Joabe, le mo tlhogong ya losika lwa gagwe ka bosakhutleng; mme mo go Dafite, le mo losikeng lwa gagwe, le mo ntlong ya gagwe, le mo setulong sa gagwe sa bogosi, go tlaa nna kagiso ka bosakhutleng, e e tswang mo go Jehofa.”

₃₄Foo Benaia morwa Joiata a ya a mo wela godimo, a mmolaya; mme a fitlhwa mo ntlong ya gagwe kwa nageng. ₃₅Kgosi ya tlhoma Benaia morwa Joiata mo boemong jwa gagwe mo taolong ya ntwa; Satoke moperesiti kgosi ya mo tlhoma mo boemong jwa ga Abiathare.

₃₆Kgosi ya roma, ya bitsa Shimei, ya mo raya ya re: “O ikagele ntlo mo Jerusalema, o age gone, mme o se ka wa tswa gone wa ya gope. ₃₇Gonne e tlaa re mo tsatsing le o tswang ka lone, o kgabaganya molatswana wa Kiterone, o itse ka tlhomamo fa ruri o tlaa swa, madi a gago a tlaa nna mo tlhogong ya gago.”

₃₈Shimei a raya kgosi a re: “Lefoko leo le molemo; jaaka kgosi morena wa me a buile, motlhanka wa gago o tlaa dira jalo.” Shimei a aga mo Jerusalema malatsi a le mantsi.

₃₉Ga dirala ya re go sena go feta dinyaga di le tharo, batlhanka ba ga Shimei ba le babedi ba ngwegela kwa go Akiše morwa Maake kgosi ya Gathe. Ga bolelelwa Shimei ga twe: “Bona, batlhanka ba gago ba kwa Gathe.” ₄₀Shimei a nanoga, a belesa esela ya gagwe a ya Gathe kwa go Akiše, a ya go batla batlhanka ba gagwe; Shimei a ya a busa batlhanka ba gagwe kwa Gathe. ₄₁Ga bolelelwa Solomone fa Shimei a ne a dule mo Jerusalema a ile Gathe, a bile a tsile. ₄₂Kgosi ya roma, ya bitsa Shimei, ya mo raya ya re: “A ga ke a go ikanisa ka Jehofa, ka ba ka go tlhomamisetsa, ka re: ‘O itsetse ruri fa e tlaa re mo tsatsing le o tswang ka lone, o tswela go gongwe, o tlaa swa ruri?’ Mme wa nthaya wa re: ‘Lefoko le o le utlwileng le molemo.’ ₄₃Ke ka ntlha yang o se ka wa tshegetsa ikano ya ga Jehofa, le tao e ke go laileng ka yone?” ₄₄Gape kgosi ya raya Shimei ya re: “O a bo itse boikepo jotlhe jo bo mo pelong ya gago, jo o bo diretseng Dafite rre; ke gone Jehofa o tlaa busetsang boikepo jwa gago mo tlhogong ya gago. ₄₅Mme kgosi Solomone o tlaa segofadiwa, le setulo sa ga Dafite sa bogosi se tlaa tlhomamisiwa fa pele ga Jehofa ka bosakhutleng.”

₄₆Kgosi ya laola Benaia morwa Joiata, mme a tswa a mo wela godimo, a ba a tla a swa. Mme bogosi jwa tlhomamisiwa mo seatleng sa ga Solomone.