1 DIKGOSI 7

₁Solomone a ja dinyaga di le some le boraro mo kagong ya ntlo ya gagwe, a wetsa ntlo yotlhe ya gagwe. ₂Gonne o ne a aga ntlo ya sekgwa sa Lebanone; boleele jwa yone e le jwa dimetara di le 44, boatlhamo jwa yone e le jwa dimetara di le 22, le bogodimo jwa yone e le jwa dimetara di le 13,5, a e tlhoma mo godimo ga maotwana a masetara a le ditsela di le nne le mesipuri ya masetara godimo ga maotwana. ₃E ne e khurumeditswe ka masetara godimo ga mesipuri e e 45 e e neng e le mo maotwaneng; mo tseleng nngwe le nngwe ga bo go le a le some le botlhano. ₄Go ne go le ditsela di le tharo tsa marofa a lesedi; lesedi le lebaganye le lesedi, go le dithulagano di le tharo. ₅Ditswalo tsotlhe le maotwana a ditswalo di le dintlha tse di lekalekanang tsoo nne mo tebaganong; lesedi le lebaganye le lesedi a le dithulagano di le tharo.

₆A dira mokatako ka maotwana, boleele jwa one e le jwa dimetara di le 22, le boatlhamo jwa one dimetara di le 13,5, go le mokatako fa pele ga one; le maotwana le mesipuri e mekima fa pele ga one.

₇A dira mokatako o o okameng setulo sa bogosi kwa o ka dulelang tsheko gone, e bong mokatako wa tshekelo; go ne go khurumeditswe ka mosetara go tswa bophaphathong go ya bophaphathong.

₈Le ntlo ya gagwe e o agang mo go yone, lolwapa lo longwe lo lo mo teng ga mokatako, lo dirilwe ka tiro e e ntseng jalo fela. Le gone a direla morwadia Faro, yo Solomone o ne a mo nyetse, ntlo e e tshwanang le mokatako oo.

₉Dikago tse tsotlhe e ne e le tsa maje a a thata go rekwa, e bong maje a a betlilweng, ka fa selekanyong, a a setlhilweng ka bošage, ka fa teng le ka fa ntle, go tswa fela mo motheong le go ya tlhomesong, le kwa ntle go ntse fela jalo go ya kwa lolwapeng lo logolo. ₁₀Motheo o ne o dirilwe ka maje a a thata go rekwa, e bong maje a magolo, maje a a dimetara di le 3,5 le maje a le dimetara di le 4. ₁₁Kwa godimo go le maje a a thata go rekwa, e bong maje a a betlilweng ka fa selekanyong, le dikgong tsa mosetara. ₁₂Lolwapa lo logolo tikologong lo na le ditsela di le tharo tsa maje a a betlilweng, le tsela e le nngwe fela ya mepako ya masetara; go tshwana le lolwapa lwa ka fa teng lwa ntlo ya ga Jehofa, le mokatako wa ntlo.

₁₃Kgosi Solomone a roma a ya go lere Hirame kwa Ture. ₁₄Hirame e ne e le morwa mosadi mongwe wa motlholagadi wa lotso lwa ga Nafetali, rraagwe e le monna wa Ture, modiri wa dilo tsa kgotlho; o ne a tletse botlhale le tlhaloganyo le botswerere go dira ditiro tsotlhe tse kgotlho. A tla kwa go kgosi Solomone a dira tiro yotlhe ya gagwe.

₁₅Gonne o ne a tshela maotwana a le mabedi a kgotlho, lengwe le lengwe le le gogodimo jwa dimetara di le 8; lengwe le lengwe le na le bokima jwa dimetara di le 5,3 fa le lekanngwa ka lodi tikologong. ₁₆A dira ditlhogo di le pedi tsa kgotlho e e tshetsweng go tla di bewa mo godimo ga maotwana a kgotlho; bogodimo jwa tlhogo nngwe e ne e le dimetara di le 2,2, le bogodimo jwa tlhogo e nngwe e le dimetara di le 2,2. ₁₇Ditlhogo tse di mo godimo ga maotwana di diretswe ditloa tsa mebala e e tshekaganyeng le makantsa a a dirilweng jaaka bompolokwane; di supa tsa tlhogo nngwe, le di supa tsa tlhogo e nngwe. ₁₈A dira maotwana jalo; go ne go le ditsela di le pedi mo tikologong ya lotloa lo longwe, go khurumetsa ditlhogo tse di mo godimo ga maotwana; mme a direla tlhogo e nngwe jalo.

₁₉Ditlhogo tse di mo godimo ga maotwana mo mokatakong e ne e le tiro e e tshwantshang dithunya tsa masoma, dikilometara di le 1,8. ₂₀Go bile go le ditlhogo kwa godimo mo maotwaneng gaufi le mpa e e bapileng le tiro e e ntseng selotloa; digaranata di le makgolo mabedi di le ditsela tikologong ya tlhogo e nngwe.

₂₁A tlhoma maotwana fa mokatakong wa tempele; a tlhoma lekotwana la ka fa ntlheng ya le legolo, a le raya leina, a re Yakina; a tlhoma lekotwana le le ka fa ntlheng ya la molema, a le raya leina a re, Boase. ₂₂Mo godimo ga maotwana go ne go le tiro e e tshwantshang dithunya tsa masoma; tiro ya maotwana ya wediwa jalo.

₂₃A dira lewatle le le thetsweng, le le dimetara di le 4,4 go tswa losing longwe go ya losing lo longwe, mo tikologong le le sediko, bogodimo jwa lone bo le jwa dimetara di le 2,2; selekanyo sa tikologo ya lone e le dimetara di le 13,2. ₂₄Ka fa tlase ga dintshi tsa lone mo tikologong go le dikgolokwe tse di le dikologileng, di dikologa lewatle ka selekanyo sa dimetara di le 4,5, dikgolokwe di le ditsela di le pedi, di theletswe gongwe le lone lewatle. ₂₅La ema mo dikgomong di le some le metso mebedi, di le tharo di lebile ntlheng ya botsheka, di le tharo di lebile ntlheng ya bophirimatsatsi, di le tharo di lebile ntlheng ya borwa, di le tharo di lebile ntlheng ya botlhabatsatsi; lewatle le ne le beilwe mo godimo ga tsone, megatla ya tsone e lebile kwa teng. ₂₆Bokima jwa lone e le dimilimetara di le 75; dintshi tsa lone di dirilwe jaaka losi lwa senwelo mo tshwanong ya sethunya sa lesoma; le ne le lekanye dinkgwana tsa metsi di le 2 000.

₂₇Ditlhomo tse di some a di dira ka kgotlho; boleele jwa setlhomo sengwe e le jwa dimetara di le 1,8, boatlhamo jwa sone e le jwa dimetara di le 1,8 le bogodimo jwa sone e le dimetara di le 1,3. ₂₈Tiro ya ditlhomo e ne e ntse jaana: Di ne di na le masinamelo, go le masinamelo fa gare ga digomo; ₂₉mo masinamelong a a fa gare ga digomo go ne go le ditau, le dikgomo, le botšheruba; mo digomong go le lekotwana kwa godimo; fa tlase ga ditau le dikgomo go le manya a a tshophilweng. ₃₀Setlhomo sengwe le sengwe se ne se na le maoto a a dikologang a le mane a kgotlho le diase tsa kgotlho; dinao tsa tsone tse nne di na le marudi; marudi a ne a thetswe fa tlase ga botlhapelo, a na le manya a a tshophilweng, a le ka fa tlhakoreng longwe le longwe. ₃₁Molomo wa lone ka fa teng ga tlhogo le kwa godimo o le selekanyo sa disentimetara di le 45; molomo wa lone o le phogotlha jaaka popego ya lekotwana, e le disentimetara di le 18; mo molomong wa lone go le maseto, le masinamelo a tsone a le dintlha tse di lekalekanyeng di le nne, a se sediko. ₃₂Maoto a a dikologang a mane a le fa tlase ga masinamelo; diase tsa maoto a a dikologang di le mo ditlhomong; bogodimo jwa lekoto e le disentimetara di le 66. ₃₃Modiro wa maoto a a dikologang o ne o tshwana le modiro wa lekoto le le dikologang la kara; diase tsa one le difelane tsa one, le dipeke tsa one, le dinafe tsa one, e le tse di thetsweng tsotlhe. ₃₄Mo ditlhofing tse nne tsa setlhomo sengwe le sengwe go ne go le marudi a le mane: marudi a sone e ne e le a sone tota. ₃₅Ka fa godimo ga setlhomo go le sedikologo se se bogodimo bo le disentimetara di le 22; mo godimo ga setlhomo mabogo a sone le masinamelo a sone a tshwana naso. ₃₆Mo dipapetleng tsa mabogo a sone, le mo masinamelong a sone, a seta botšheruba, le ditau, le ditlhare tsa makolane, ka fa sebakeng sa sengwe le sengwe, di na le manya a a tshophilweng, a le tikologong ya tsone. ₃₇A dira ditlhomo ka bosome jwa tsone ka mokgwa o o ntseng jaana: Tsotlhe di le thelo nngwe fela, le selekanyo se le sengwe fela, le popego e le nngwe fela. ₃₈A dira matlhapelo a le some a kgotlho; botlhapelo bo le bongwe fela bo le selekanyo sa dinkgwana tsa metsi di le 40; botlhapelo bongwe le bongwe bo le dimetara di le 1,8; le mo go sengwe le sengwe sa ditlhomo tse di some go le botlhapelo bo le bongwe fela. ₃₉Ditlhomo a baya di le tlhano ka fa ntlheng ya le legolo ga ntlo, le di le tlhano ka fa ntlheng ya la molema ga ntlo; lewatle a le baya ka fa ntlheng ya le legolo ga ntlo ntlheng ya botlhabatsatsi, bolebana le borwa.

₄₀Hirame a dira matlhapelo, le diolela melora, le megotšana. Jalo Hirame a wetsa tiro e o ne a e direla kgosi Solomone mo ntlong ya ga Jehofa. ₄₁Maotwana a mabedi, le megopo e mebedi ya ditlhogo tse di godimo ga maotwana; le ditiro tsa selotloa tse pedi tsa go khurumetsa megopo e mebedi ya ditlhogo tse di mo godimo ga maotwana; ₄₂le digaranata tse di 400 tsa ditiro tsa selotloa tse pedi; ditsela di le pedi tsa digaranata tsa lotloa longwe le longwe go khurumetsa megopo e mebedi ya ditlhogo tse di mo godimo ga maotwana. ₄₃Le ditlhomo tse di some, le matlhapelo a le some mo ditlhomong; ₄₄le lewatle le le lengwe fela, le dikgomo tse di 12 tse di fa tlase ga lewatle; ₄₅le dipitsa, le diolela melora, le megotšana; e bong dilwana tse tsotlhe tse Hirame o ne a di direla kgosi Solomone mo ntlong ya ga Jehofa, e ne e le tsa kgotlho e e phatsimisitsweng. ₄₆Dilwana tseo kgosi ya di thelela mo lobaleng lwa Joretane, mo mmung o o letsopa o o fa gare ga Sukothe le Sarethane. ₄₇Solomone a lesa dilwana tseo fela a se ka a di lekanya bokete, ka di le bontsi jo bo feteletseng; bokete jwa kgotlho bo no bo retela go lekanngwa.

₄₈Solomone a dira dilwana tsotlhe tse di mo ntlong ya ga Jehofa: Sebeso sa gouta, le lomati lwa bojelo lo senkgwe sa tshupo se nnang mo go lone, a lo dira ka gouta. ₄₉Le ditlhomo tsa dipone di le tlhano ka fa ntlheng ya le legolo le di le tlhano ka fa ntlheng ya la molema, fa pele ga felo ga bobuelo, a di dira ka gouta e e sa pekwang; le dithunya, le dilampa, le ditlawa, a di dira ka gouta; ₅₀le dinwelo, le dipoma, le megotšana, le dintsho, le seola molelo, a di dira ka gouta e e sa pekwang; le dikgokelo tsa ditswalo tsa ntlo e e ka fa teng, e bong felo ga botshepo jo bo itshepileng, le tsa ditswalo tsa ntlo tota, e bong tsa tempele, a di dira ka gouta.

₅₁Jalo tiro yotlhe e kgosi Solomone o ne a e dira mo ntlong ya ga Jehofa ya wediwa fela jalo. Solomone a tsenya dilo tse Dafite rraagwe o ne a di tshwaetse Modimo, e bong selefera, le gouta, le dilwana, a di tsenya mo mabolokelong a ntlo ya ga Jehofa.