2 DITIRAFALO 11

₁E rile Rehoboame a tla mo Jerusalema a phutha ba kgotla ya Juta le ya Benjamine, banna ba le 180 000 ba ba tlhophegileng, e le banna ba ntwa, gore ba tlhabane le ba Iseraele, go tla ba busetsa bogosi mo go Rehoboame. ₂Mme lefoko la ga Jehofa la tla kwa go Shemaia monna wa Modimo la re: ₃“Bua le Rehoboame morwa Solomone, kgosi ya Juta, le ba Iseraele botlhe ba ba mo go ba Juta le mo go ba Benjamine o re: ₄‘Jehofa o bua jaana a re: Lo se ka lwa bolola, le fa e le go tlhabana le bana ba ga rraeno; a mongwe le mongwe wa lona a boele kwa ga gagwe; gonne selo se, se tswa mo go nna.’ ” Mme ba reetsa mafoko a ga Jehofa, ba boa kwa go bololeleng Jeroboame.

₅Rehoboame a aga mo Jerusalema, a aga metse ya phemelo mo Juta. ₆A aga e bong Bethelehema, le Etame le Tekoa, ₇le Bethesure, le Shoko le Adulame, ₈le Gathe, le Mareša le Sife, ₉le Atoraime, le Lakiše le Aseka, ₁₀le Sora, le Aijalone le Heberone, metse e e mo Juta le mo Benjamine, metse e e thekeleditsweng. ₁₁Mme a thatafatsa manno a a thata a phemelo, a baya balaodi gone, le sekokotlegelo sa dijo, le lookwane le bojalwa jwa mofine. ₁₂Le mo motseng mongwe le mongwe a baya dithebe le marumo, a e thatafatsa mo go feteletseng. Mme Bajuta le Babenjamine, e ne e le ba gagwe.

₁₃Baperesiti le Balefi ba ba mo go ba Iseraele botlhe ba ya kwa go ene ba tswa kwa melelwaneng yotlhe ya bone. ₁₄Gonne Balefi ba ne ba tlogela dintlhana tsa bone, le dithuo tsa bone ba tla mo Juta le mo Jerusalema, gonne Jeroboame le bomorwawe ba ba latlha, gore ba se ka ba direla Jehofa ka tiro ya boperesiti. ₁₅Mme a itlhomela baperesiti ba mafelo a a tlotlometseng, le ba medimo ya dikapodi, le ba dinamane tse o di dirileng. ₁₆Morago ga bone, go sa le go tswa mo ditsong tsotlhe tsa Iseraele botlhe ba ba itlhomamisitseng ka pelo tsa bone go batla Jehofa, Modimo wa Iseraele, mme ba tla Jerusalema go isetsa Jehofa Modimo wa borraabo tlhabelo. ₁₇Jalo ba thatafatsa bogosi jwa Juta, ba naya Rehoboame morwa Solomone thata, ka dinyaga di le tharo, gonne ba ne ba sepela ka dinyaga di le tharo mo tseleng ya ga Dafite le Solomone.

₁₈Rehoboame a tsaya mosadi, Mahalathe morwadia Jerimothe, morwa Dafite, le wa ga Abihaile morwadia Eliabe morwa Jese. ₁₉A bona nae bana ba basimane: Jeuše, le Shemaria le Sahame. ₂₀Morago ga gagwe a tsaya Maaka morwadia Abesalome; a bona nae Abija, le Atai, le Sise le Shelimothe. ₂₁Rehoboame a rata Maaka, morwadia Abesalome bogolo go basadi botlhe ba gagwe le bagadingwana ba gagwe; (gonne o ne a tsaya basadi ba le 18 le bagadingwana ba le 60, mme a tshola bana ba basimane ba le 28, ba basetsana ba le 60.) ₂₂Rehoboame a baya Abija morwa Maaka mogolo, e bong kgosana mo go bomonnawe, gonne o na a laotse go mo dira kgosi. ₂₃A dira ka botlhale, a falaletsa bomorwawe botlhe le mafatshe otlhe a Juta le Benjamine, a ba baya mo motseng mongwe le mongwe o o thekeleditsweng, a ba naya dijo ka botlalo. A ba batlela basadi ba le bantsi.