2 DITIRAFALO 17

₁Jehošafate morwawe a busa mo boemong jwa gagwe, mme a ithatafaletsa Baiseraele. ₂A baya batlhabani mo metseng yotlhe e e thekeleditsweng ya Juta, a baya ditlhopha tsa masole mo lefatsheng la Juta le mo metseng ya Eferaime, e Asa rraagwe o ne a e gapile. ₃Jehofa o ne a na le Jehošafate, gonne a sepela mo ditseleng tsa ntlha tsa ga Dafite rraagwe, mme a se ka a batla kwa go boBaale. ₄A batla mo Modimong wa ga rraagwe, a sepela mo ditaolong tsa one, mme e seng ka fa ditirong tsa Baiseraele. ₅Ke gone ka moo Jehofa a tlhomamisa bogosi mo seatleng sa gagwe; mme Bajuta botlhe ba leretse Jehošafate dineo; a bona khumo le tlotlo ka botlalo. ₆Pelo ya gagwe ya tsholetsega mo tseleng tsa ga Jehofa; gape a tlosa mafelo a a tlotlometseng le Medimako mo Juta. ₇Gape ya re ka ngwaga wa boraro wa puso ya gagwe a roma dikgosana tsa gagwe, e bong Benehaile, le Obadia, le Sekaria, le Nathanaele le Mikaia, ba ya go ruta mo metseng ya Juta; ₈le Balefi nabo, e bong Shemaia, le Nathania, le Sebadia, le Asafele, le Shemi-ramothe, le Jehonathane, le Atonija, le Tobija le Tobatonija ba Balefi; le baperesiti nabo, e bong Elišame le Jehorame. ₉Ba ruta mo Juta ba tshotse lokwalo lwa molao wa ga Jehofa, ba tsamaya ba ralala metse yotlhe ya Juta, ba ruta mo bathong.

₁₀Poifo ya ga Jehofa ya wela mo magosing otlhe a mafatshe a a mo tikologong ya Juta, mme ba se ka ba dira ntwa le Jehošafate. ₁₁Bangwe ba Bafilisitia ba leretse Jehošafate dineo le selefera sa lekgetho; Baarabia ba mo leretse matsomane, diphelefu di le 7 700; le diphoko di le 7 700. ₁₂Jehošafate a kokotlegela thata; a aga dikago tsa tlhabanelo le metse ya dipolokelo mo Juta. ₁₃O ne a na le ditiro di le dintsi mo metseng ya Juta; le banna ba ntwa e le diganka tse di pelokgale mo Jerusalema. ₁₄Mme e ke yone palo ya bone ka fa makgotleng a borraabo: Bajuta, balaodi ba dikete; Atane wa molaodi le diganka tse di pelokgale di le 300 000 di na nae. ₁₅Le Jehohanane wa molaodi a rulagana nae, a na le batho ba le 280 000. ₁₆Yo o ne a rulagana le ene e ne e le Amasia morwa Sikeri, yo o ne a ineela mo go Jehofa ka peleego; le diganka tse di pelokgale di le 200 000 nae. ₁₇Le Babenjamine; Eliate wa seganka se se pelokgale le batho ba le 200 000 ba ba tlhometseng bora le thebe, ba na nae. ₁₈Yo o ne a rulagana le ene e ne e le Jehosabate, a na le batho ba le 180 000 ba ba iketleeleditseng ntwa. ₁₉Bao ke bone ba ba neng ba direla fa kgosing, kwa ntle ga ba kgosi e ba beileng mo metseng e e thekeleditsweng mo lefatsheng lotlhe la Juta.