Moperofeti Mikaia o tlhagisa Ahabe ka mathata a a tlang
1Jaana Jehošafate a bo a na le khumo le tlotlo ka botlalo; mme a itsalanya le Ahabe. 2E rile dinyaga dingwe di sena go feta a ya kwa go Ahabe kwa Samaria. Mme Ahabe a tlhabisa ene le batho ba o nang nabo dinku le dikgomo ka bontsi, a mo tlhotlheletsa go tla a bolola nae a ya kwa Ramothe-gileate. 3Ahabe kgosi ya Iseraele, a raya Jehošafate kgosi ya Juta a re: “A o tlaa bolola le nna ke ya Ramothe-gileate?” Mme a mo fetola a re: “Ke ntse jaaka wena, le batho ba me ba ntse jaaka batho ba gago; re tlaa nna nao mo ntweng.” 4Jehošafate a raya kgosi ya Iseraele a re: “Ke a go rapela, a ko o botse lefoko mo go Jehofa gompieno.”
5Foo kgosi ya Iseraele ya phutha baperofeti, banna ba le 400, a ba raya a re: “A ke re ye go tlhabana kwa Ramothe-gileate, kgotsa a ke re khutle?” Ba re: “Ya; gonne Modimo o tlaa o tsenya mo seatleng sa kgosi.”
6Jehošafate a re: “Kwa ntle ga bao, a ga go na moperofeti ope wa ga Jehofa yo re ka botsang mo go ene?”
7Kgosi ya Iseraele ya raya Jehošafate ya re: “Go sa na le monna mongwe yo re ka botsang mo go Jehofa ka ene; mme ke a mo ila, gonne ga a ke a bolela molemo gope ka ga me, fa e se bosula fela ka metlha yotlhe; ke ene Mikaia morwa Imele.” Jehošafate a re: “A kgosi e se re jalo.”
8Foo kgosi ya Iseraele ya bitsa mogolwane mongwe, ya re: “Itlhaganele o ye go lere Mikaia morwa Imele.”
9Jaana kgosi ya Iseraele le Jehošafate kgosi ya Juta, mongwe le mongwe a dutse mo setulong sa gagwe sa bogosi, ba apere dikobo tsa bone, mme ba bo ba dutse fa patlelong fa botsenong jwa kgoro ya Samaria; baperofeti botlhe ba bo ba bolela fa pele ga bone. 10Setekia morwa Kenaana a itirela dinaka tsa tshipi, mme a re: “Jehofa o bua jaana a re: ‘O tlaa kgorometsa Basiria ka tse, go tsamaya ba nyelela.’ ” 11Baperofeti botlhe ba bolela jalo, ba re: “Ya kwa Ramothe-gileate, o fenye, gonne Jehofa o tlaa o tsenya mo seatleng sa kgosi.”
12Morongwa yo o ileng go bitsa Mikaia a bua nae, a re: “Bona, mafoko a baperofeti a kakanyetsa kgosi molemo ka molomo o le mongwe fela; ke gone ke a go rapela, a lefoko la gago le tshwane le lengwe la bone, o bue molemo.”
13Mme Mikaia a re: “Jaaka Jehofa a tshedile, se Modimo wa me o se buang, ke tlaa bua sone.”
14Ya re a fitlha kwa kgosing, kgosi ya mo raya ya re: “Mikaia, a ke re ye go tlhabana kwa Ramothe-gileate, kgotsa a ke ke khutle?” Mme a re: “Yang, lo fenye; mme ba tlaa tsenngwa mo seatleng sa lona.”
15Kgosi ya mo raya ya re: “Ke tla ge ikanisa ga kae, fa o se ketla o bua sepe le nna fa e se boammaaruri mo ineng la ga Jehofa?”
16Mme a re: “Ke bonye Baiseraele botlhe ba faletse mo dithabeng ba ntse jaaka dinku tse di se nang modisa: mme Jehofa a re: ‘Ba, ga ba na mong; a monna mongwe le mongwe a boele kwa ntlong ya gagwe ka kagiso.’ ”
17Kgosi ya Iseraele ya raya Jehošafate ya re: “A ga ke a go bolelela fa a se ketla a bolela molemo ka ga me, fa e se bosula fela?”
18A re: “Ke gone utlwang lefoko la ga Jehofa: Ka bona Jehofa a dutse mo setulong sa gagwe sa bogosi, mme lesomosomo lotlhe la legodimo le ne le eme ka fa letsogong la gagwe le legolo le fa go la molema. 19Mme Jehofa a re: ‘Mang yo o tlaa tsietsang Ahabe kgosi ya Israele, gore a tsamaye a ye go wa kwa Ramothe-gileate?’ Mme mongwe a bua ka mokgwa o, yo mongwe a bua ka mokgwa o sele. 20Ga tswa mowa mongwe, wa ema fa pele ga Jehofa, wa re: ‘Ke tlaa mo fepisa.’ Mme Jehofa a mo raya: ‘Ka eng?’ 21Wa re: ‘Ke tlaa tswa, mme ke tlaa nna mowa o o akang mo melomong ya baperofeti botlhe ba gagwe.’ A re: ‘Mo fepise, le gone o tlaa fenya; tswa o ye o dire jalo.’
22“Ke gone jaana, bona, Jehofa o tsentse mowa o o akang mo melomong ya baperofeti ba, ba gago; Jehofa o buile bosula ka ga gago.”
23Foo Setekia morwa Kenaana a atamela, a tlhanya Mikaia mo lesameng, a re: “Mowa wa Modimo o dule ka tsela efe mo go nna wa ya go bua nao?”
24Mme Mikaia a re: “Bona, o tlaa bona mo tsatsing leo, mogang o tsenang mo ntlwaneng e e kwa teng o ya go iphitlha gone.”
25Kgosi ya Iseraele ya re: “Tshwarang Mikaia, lo mmusetse kwa go Amone molaodi wa motse, le kwa go Joaše morwa kgosi; 26mme lo re: ‘Kgosi e bua jaana, ya re: Tsenyang seapu se mo ntlong ya kgolegelo, lo mo neye dijo tsa patiko, le metsi a patiko, go tsamaya ke boa ka kagiso.’ ”
27Mikaia a re: “E tlaa re fa o ka boa le fa e le motlha o mongwe fela ka kagiso, Jehofa o tlaa bo a se ka a bua ka nna.” Mme a re: “Lo bo lo utlwe lona lotlhe ditšhaba.”
Loso lwa ga Ahabe
28Jalo kgosi ya Iseraele le Jehošafate kgosi ya Juta, ba ya kwa Ramothe-gileate. 29Kgosi ya Iseraele ya raya Jehošafate ya re: “Ke tlaa ba ikgakisa, ke itse go tsena mo tlhabanong; wena o apare dikobo tsa gago fela.” Kgosi ya Iseraele ya ba ikgakisa; mme ba tsena mo tlhabanong.
30Kgosi ya Siria e ne e laotse balaodi ba dikara tsa gagwe, ya re: “Lo se ka lwa tlhabana le ope monnye le fa e le mogolo, fa e se le kgosi ya Iseraele e le yosi fela.” 31Ga dirala ya re balaodi ba dikara ba bona Jehošafate, ba re: “Ke ene kgosi ya Iseraele.” Ke gone ka moo ba sokologa ba tlhabana nae; Jehošafate a goa, mme Jehofa a mo thusa; mme Modimo wa ba tlhotlheletsa gore ba mo tlogele. 32Mme ga dirala, ya re balaodi ba dikara ba bona fa e se kgosi ya Iseraele, ba bowa mo go mo konateleleng. 33Monna mongwe a hula fela ka bora, ka phaphouletso, mme a betsa kgosi ya Iseraele fa malokololong a moitshomelo wa phemelo; ke gone ka moo a raya mokgweetsi wa kara a re: “Retolola letsogo la gago o ntsamaise ke tswe mo ntweng; gonne ke tlhabilwe mo go botlhoko.” 34Mme tlhabano ya gakala ka tsatsi leo; le fa go ntse jalo kgosi ya Iseraele ya ikemisa mo kareng ya yone, go tlhabana le Basiria go ya maitseboeng; mme ya re e ka ne e le ka letsatsi le kotlomela, a swa.
