2 DITIRAFALO 36

₁Foo batho ba lefatshe ba tsaya Jehoahase morwa Josia, ba mo dira kgosi mo boemong jwa ga rraagwe mo Jerusalema. ₂Jehoahase o rile a simolola go busa a bo a le dinyaga di le 23, mme a busa ka dikgwedi di le tharo mo Jerusalema. ₃Kgosi ya Egepeto ya mo tlosa mo bogosing mo Jerusalema, ya lefisa lefatshe dikilokerame tsa selefera di le 3 400 le dikilokerame di le 34 tsa gouta. ₄Kgosi ya Egepeto ya dira Eliakime monnawe, kgosi ya Juta le Jerusalema, ya fetola leina le gagwe la nna Jehoiakime; mme Neko a tsaya Joahase mogoloe, a mo isa Egepeto.

₅E rile Jehoiakime a simolola go busa a bo a le dinyaga di le 25; mme a busa ka dinyaga di le 11 mo Jerusalema, mme a dira se se bosula mo ponong ya ga Jehofa Modimo wa gagwe. ₆Nebukatenesare kgosi ya Babilone o na a mmololela, a mo golega ka mehiri go tla a mo isa Babilone. ₇Nebukatenesare a ba a isa dilwana tsa ntlo ya ga Jehofa kwa Babilone, a di tsenya mo tempeleng ya gagwe kwa Babilone. ₈Jaana ditiro tse dingwe tsa ga Jehoiakime le dilo tse di makgapha tsa gagwe tse o ne a di dira, le se se fitlhetsweng mo go ene, bonang, di kwadilwe mo lokwalong lwa dikgosi tsa Iseraele le Juta; mme Jehoiakine morwawe a busa mo boemong jwa gagwe.

₉Jehoiakine o rile a simolola go busa a bo a le dinyaga di 8; mme a busa ka dikgwedi di le tharo le malatsi a le some mo Jerusalema: A dira se se bosula mo ponong ya ga Jehofa. ₁₀Mme ya re mo tshokologong ya ngwaga, Nebukatenesare a roma batho, a mo isa Babilone, a na le dilwana tse di molemo tsa ntlo ya ga Jehofa, mme a dira Setekia monnawe kgosi ya Juta le Jerusalema.

₁₁E rile Setekia a simolola go busa a bo a le dinyaga di le 21, mme a busa ka dinyaga di le 11 mo Jerusalema. ₁₂A dira se se bosula mo ponong ya ga Jehofa Modimo wa gagwe; ga a ka a ikokobetsa fa pele ga Jeremia moperofeti fa a bua ka molomo wa ga Jehofa.

₁₃Le gone a tsuololela kgosi Nebukatenesare yo o ne a mo ikanisitse ka Modimo. A thatafatsa thamo ya gagwe, a kgwaralatsa pelo ya gagwe, gore e se ka ya sokologela mo go Jehofa Modimo wa Iseraele. ₁₄Gape ditlhogo tsotlhe tsa baperesiti, le batho ba tlola thatathata ka fa dilong tse di makgapha tsotlhe tsa merafe; ba itshekolola ntlo ya ga Jehofa e o ne a e itshepisitse mo Jerusalema. ₁₅Mme Jehofa, Modimo wa borraabo, a roma kwa go bone ka barongwa ba gagwe, a phakela a ba roma; gonne a utlwela batho ba gagwe botlhoko, le felo ga boago jwa gagwe; ₁₆mme ba sotla barongwa ba Modimo, ba nyatsa mafoko a gagwe, ba tshega baperofeti ba gagwe, ga tsamaya bogale jwa ga Jehofa jwa tsogela batho ba gagwe, ga tsamaya phodiso ya tlhokafalela ruri.

₁₇Ke gone ka moo o lerileng mo go bone kgosi ya Bagalatea, ya bolaela makau a bone ka tšhaka mo ntlong ya felo ga boitshepo ga bone, ya se ka ya utlwela lekau le fa e le morweetsana, motsofe le fa e le motho wa bogologolo botlhoko; wa ba neela botlhe mo seatleng sa yone. ₁₈Le dilwana tsotlhe tsa ntlo ya Modimo, tse dikgolo le tse dinnye, dikhumo tsa ntlo ya ga Jehofa, le dikhumo tsa kgosi, le tsa dikgosana tsa yone; dilo tse tsotlhe ya di isa kwa Babilone. ₁₉Ba fisa ntlo ya Modimo, ba rutlolola lorako lwa Jerusalema, ba fisa mantlo otlhe a dikgosi a teng ka molelo, ba senya dilwana tsotlhe tse di molemo tsa gone. ₂₀Bone ba ba falotseng mo tšhakeng ya ba isa Babilone; mme ba nna batlhanka ba yone le ba bomorwaa yone ba ba ba tla go fitlha mo pusong ya bogosi jwa Peresia; ₂₁go dirafatsa lefoko la ga Jehofa ka molomo wa ga Jeremia, ga tsamaya lefatshe la ja monate wa boSabata ba lone; gonne ya re lefatshe le sa ntse le swafetse la bo le tshegeditse Sabata go fetisa dinyaga di le 70.

₂₂Jaana, e rile ka ngwaga wa ntlha wa ga Kurose kgosi ya Peresia, e le gore lefoko la ga Jehofa ka molomo wa ga Jeremia le dirafadiwe, Jehofa a tlhotlheletsa mowa wa ga Kurose kgosi ya Peresia, a ba a tla a dira kitsiso mo bogosing jotlhe jwa gagwe, a ba a e kwala a re: ₂₃“Kurose kgosi ya Peresia o bua jaana, a re: ‘Jehofa Modimo wa legodimo, o nneile magosi otlhe a lefatshe; o ntaotse gore ke mo agele ntlo kwa Jerusalema o o mo lefatsheng la Juta. Le fa e kabo e le mang yo o gone mo go lona wa batho botlhe ba gagwe, a Jehofa Modimo wa gagwe a nne nae, mme a a tlhatlogele teng.’ ”