2 DITIRAFALO 8

₁Ga dirala ya re dinyaga di le 20 di sena go feta, tse Solomone o ne a aga ntlo ya ga Jehofa le ntlo ya gagwe tota ka tsone, ₂metse e Hurame o kileng a e naya Solomone, Solomone a e aga, mme a baya bana ba Iseraele, gore ba age mo go yone. ₃Solomone a ya motseng wa Hamathe-soba, mme a o fenya. ₄A aga Tatamore mo nageng, le metse yotlhe ya mabolokelo, e o e agileng mo Hamathe. ₅Le gone a aga Bethehorone, o o kwa godimo le Bethehorone, o o kwa tlase, e le metse e e thekeleditsweng ka dithako, ka ditswalo, le mephakalego; ₆le Baalathe, le metse yotlhe ya mabolokelo e Solomone o ne a na nayo, le metse yotlhe ya dikara tsa gagwe, le metse ya bapalami ba dipitse, le tsotlhe tse Solomone o ne a eletsa go di aga go tla a ikgatlha ka tsone, mo Jerusalema, le mo Lebanone, le mo lefatsheng lotlhe la mmuso wa gagwe. ₇Ka ga batho botlhe ba ba setseng ba Bahite, le ba Baamore, le ba Baperise, le ba Bahifa, le ba Bajebuse, le ba e ne e se Baiseraele; ₈mo baneng ba bone ba ba setseng morago ga bone mo lefatsheng, ba bana ba Iseraele ba se kang ba ba nyeletsa, Solomone a ba tsaya lekgetho go tla ba nna batlhanka, nako e sa le eno. ₉Mo baneng ba Iseraele Solomone a se ka a dira batlhanka bape ba go dira tiro ya gagwe; bone ya bo e le batlhabani, le ditlhogo tsa balaodi ba gagwe, le balaodi ba dikara tsa gagwe, le bapalami ba dipitse tsa gagwe. ₁₀Bano e ne e le balaodisiwa ba bagolo ba ga Solomone, e bong batho ba le 250 ba ba laolang batho.

₁₁Solomone a tlhatlosa morwadia Faro kwa motseng wa ga Dafite a mo isa kwa ntlong e o e mo agetseng gonne a re: “Mosadi wa me ga a ketla a nna mo ntlong ya ga Dafite kgosi ya Iseraele gonne mafelo ao a itshepile, kwa letlole la ga Jehofa le tsileng gone.”

₁₂Foo Solomone a isetsa Jehofa ditshupelo tse di fisiwang mo sebesong sa ga Jehofa, se o se agileng fa pele ga mokatako. ₁₃Fela jaaka tshwanelo ya letsatsi lengwe le lengwe e lopa, a isa ka fa taolong ya ga Moše, ka metlha ya bosabata, le ya go rogwa ga dikgwedi, le ya mediro e e laotsweng, mediro e le meraro ka ngwaga, e bong mo motlheng wa modiro wa senkgwe se se sa bedisiwang, le mo go wa modiro wa dibeke, le mo go wa modiro wa metlaagana. ₁₄Makoko a diphapaano a baperesiti a a laolela tirelo ya one, ka fa taolong ya ga Dafite rraagwe, le Balefi a ba laolela ditebelo tsa bone, go baka le go direla fa pele ga baperesiti ka fa tshwanelo ya letsatsi lengwe le lengwe e lopang ka gone; le balebedi ba mejako ka fa diphapaanong tsa bone fa kgorong nngwe le nngwe; gonne Dafite monna wa Modimo o ne a laotse jalo. ₁₅Ga baa ka ba tlogela taolo ya kgosi, e o e laoletseng baperesiti le Balefi ka ga tiro epe, le fa e le ka ga dikhumo.

₁₆Jaana tiro yotlhe ya ga Solomone e bo e ne e baakantswe go tla mo tsatsing la go thaiwa ga ntlo ya ga Jehofa, le go ya mo go wediweng ga yone. Jalo ntlo ya ga Jehofa ya dirwa boitekanelo.

₁₇Foo Solomone a ya Esione-gebere, le kwa Elothe, fa losing lwa lewatle mo lefatsheng la Etome. ₁₈Mme Hurame a mo isetsa dikepe ka batlhanka ba gagwe, le batlhanka ba ba nang le kitso ya lewatle, ba ya le batlhanka ba ga Solomone kwa Ofire, ba tsaya gouta gone e le dikilokerame di feta 15 000, ba e isa kwa go kgosi Solomone.