2 BAKORINTHE 11

₁A bo lo ka ka lwa iphapaanya le nna go le gonnye mo boeleeleng; ee, ruri lo ka ka lwa iphapaanya le nna. ₂Gonne ke lo tlhoafaletse ka tlhoafalo ya semodimo, gonne ke ne ke lo beeleletse monna a le mongwe fela, gore ke tle ke lo neele Keresete lo le kgarebane e e itshekileng. ₃Ke a boifa, gore e se re kgotsa motlha mongwe, jaaka noga e tsieditse Efa ka boferefere jwa yone, pelo tsa lona tsa senyega jalo, tsa kgaogana le tshiamo le boitsheko jo bo ntlheng ya ga Keresete. ₄Gonne fa yo o tsileng koo a rera Jesu mongwe o sele, yo re se kang ra mo rera, kgotsa fa lo amogela mowa mongwe o sele, o lo se kang lwa o amogela, kgotsa mafoko a a molemo a sele, a lo se kang lwa a amogela, lo dira sentle jang fa lo iphapaanya nae.

₅Gonne ke solofela gore ga ke kwa morago ga baaposetole ba bagolo, le fa e le go le gonnye. ₆Le fa ke sa itse go bua sentle, ga ke tlhaele mo kitsong; nnyaa, mo dilong tsotlhe re go bonaditse ka ntlha tsotlhe koo go lona.

₇Kgotsa a ke leofile ka go ikokobetsa, gore lona lo golediwe, ka ke lo reretse Mafoko a a Molemo a Modimo, ke sa lope sepe? ₈Ka thukhutha diphuthego tse dingwe, ka amogela tuelo mo go tsone, gore ke direle lona. ₉Ke rile ke le mo go lona, ke tlhoka sengwe, ga ke a ka ka imela motho ope; gonne e rile bagaetsho ba tswa kwa Maketonia, ba ntlaletsa ka fa selekanyong sa go tlhoka ga me; mme mo dilong tsotlhe ke ne ka ithiba gore ke se lo imele. Mme ke tlaa nna ke ithiba jalo. ₁₀Jaaka boammaaruri jwa ga Keresete bo le mo go nna, ga go ketla go dira le motho ope yo o tlaa nkhutlisang go ipelafatsa mo mafatsheng a Akaia. ₁₁Ka ntlha yang? A ke ka gobo ke sa lo rate? Modimo o a itse.

₁₂Se ke se dirang, ke tlaa nna ke se dira fela, gore ke tle ke ba tlhokise seipato ba ba eletsang seipato; e tle e re fa ba ipelafatsa ka sengwe, ba fitlhelwe ba tshwana le rona fela. ₁₃Gonne batho ba ba ntseng jalo, ke baaposetole ba e seng bone, ke badiri ba ba tsietsang, ba ba itshwantshang le baaposetole ba ga Keresete fela. ₁₄Ga se mo go ka gakgamalelwang, gonne Satane le ene o tle a itshwantshe le moengele wa lesedi. ₁₅Ke gone, e be e se selo se segolo fa batlhanka ba gagwe le bone ba ka itshwantsha le batlhanka ba tshiamo; ba bokhutlo jwa bone bo tlaa nnang ka fa ditirong tsa bone.

₁₆Ke bua gape ka re, a go se nne motho ope yo o nkgopolang seeleele; mme fa lo bua jalo, le fa go ntse jalo lo ntshole fela jaaka yo o seeleele, gore le nna ke tle ke ipelafatse go le gonnye. ₁₇Se ke se buang, ga ke se bue ka fa Moreneng, e le jaaka mo boeleeleng, mo boikgantshong jo jwa go ipelafatsa. ₁₈E re ka batho ba le bantsi ba tle ba belafale ka fa nameng, le nna ke tlaa belafala. ₁₉Gonne lo a tle lo iphapaanye le dieleele sentle fela, ka lona lo le botlhale. ₂₀Gonne lo tle lo iphapaanye le motho fa a lo ntsha batlhanka, fa a lo ja, fa a lo thopa, fa a ikgodisa, fa a lo tlhanya mo sefatlhogong. ₂₁Ke bua ka mokgwa wa go inyatsa, jaaka e kete re ne re le bokoa. Le fa go ntse jalo se mongwe o leng pelokgale ka sone, le nna ke pelokgale; ke bua ka boeleele. ₂₂A ke Bahebere? Le nna ke ntse jalo. A ke Baiseraele? Le nna ke ntse jalo. A ke losika lwa ga Aberahame? Le nna ke ntse jalo. ₂₃A ke badiredi ba ga Keresete? Nna bogolo; ke bua jaaka yo o sa ikutlweng ka bontsi jwa ditiro, le ka go tsena mo matlong a kgolegelo gantsi, le ka dithupa tse di fetang selekanyo, le ka go swa gantsi. ₂₄Ke kgwathisitswe gatlhano ke Bajuta, ke ntse ke bewa dithupa di le 39. ₂₅Ke iteilwe ka dithobane gararo, ka kgobotlediwa ka maje gangwe fela, ka thubegelwa ke sekepe gararo, ka lala gangwe fela ka ba ka tlhola mo botennyeng jwa lewatle; ₂₆ke ntse ke le mo diketong gantsi, ka nna mo poitshegong ya dinokwane, le mo poitshegong ya ba gaetsho, le mo poitshegong ya Baditšhaba, mo poitshegong mo motseng, mo poitshegong mo nageng, mo poitshegong mo lewatleng, mo poitshegong mo go bakaulengwe ba e seng bone; ₂₇ke le mo tirong le mo tapisegong, mo ditisong gantsi, mo tlaleng le mo lenyoreng, mo go itimeng dijo gantsi, mo serameng le mo bosaikategang. ₂₈Kwa ntle ga dilo tse di kwa ntle, go na le mo go nkimelang ka malatsi otlhe, ke raya tlhobaelo ka ga diphutego tsotlhe. ₂₉Go na le mang yo o bokoa, nna ke se bokoa? Mang yo o kgopisiwang, nna ke sa gakale?

₃₀Fa ke na le go ipelafatsa, ke tlaa ipelafatsa ka dilo tse di amang bokoa jwa me. ₃₁Modimo le Rra Morena Jesu, one o o bakwang ka bosakhutleng, o a itse fa ke sa ake. ₃₂E rile kwa Damaseko, molaodisiwa wa kgosi Aretase a lalela motse wa Badamaseko, gore a ntshware. ₃₃Mme ka lepelediwa ka seroto ka fa seiponeng se se mo lorakong, ka falola mo diatleng tsa gagwe.