1Gonne re a itse gore, fa ntlo ya rona ya selefatshe ya motlaagana e rutlologa, re na le kago e e tswang Modimong, ntlo e e sa agwang ka diatla, e le ya bosaengkae, kwa magodimong. 2Gonne ruri mo go e, re a fegelwa, re tlhologelelwa go apesiwa boago jwa rona jo bo tswang legodimong; 3gore e tle e re fa re apesitswe, re se ka ra fitlhelwa re sa ikatega. 4Gonne ruri rona ba re mo motlaaganeng o re a fegelwa, ka re imelesegile e seng gore re rata ra bo re sa apara, fa e se gore re rata ra bo re apere, gore se se swang se tle se mediwe ke botshelo. 5Jaana yo o re bopetseng gone moo ke Modimo, o o re neileng sebeelelo sa Mowa.
6Ke gone, e re ka re ntse re le nametsego gale, re itse gore, fa re sa ntse re le mo gae mo mmeleng, re bo re seyo kwa Moreneng, 7gonne re sepela ka tumelo, e seng ka pono. 8Ka re, re a nametsega, mme re rata bogolo ra bo re se mo mmeleng, mme re le kwa gae le Morena. 9Ke gone re tlhagafalelang, gore le fa re le mo gae kgotsa re seyo, re bo re ntse re kgatlha ene fela. 10Gonne rotlhe re na le go bonadiwa fa pele ga senno sa tshekelo sa ga Keresete, gore mongwe le mongwe a amogele dilo tse di dirilweng mo mmeleng, ka fa o dirileng ka teng, gongwe e le molemo, gongwe e le bosula.
Tirelo ya tetlanyo
11Ke gone, e re ka re itse poifiso ya Morena, re rapela batho; re bile re bonalediwa Modimo; ke a solofela gore le mo digakoloding tsa lona re a bonadiwa. 12Ga re lo iphakele gape, re bua ka mokgwa wa go lo naya ka fa lo ka ipelafatsang ka ga rona ka teng, gore lo dirane le ka fa lo ka fetolang ka teng ba ba ipelafatsang ka se se bonalang fela, e seng ka se se mo pelong. 13Gonne le fa re tshereanye, e ne e le ka ga Modimo; kgotsa re le maikutlo a a siameng, e be e le ka ga lona. 14Gonne lorato lwa ga Keresete lo a re patelela; ka re sekaseka jaana, ra re, mongwe o swetse botlhe, ke gone botlhe ba ne ba sule. 15Mme a swela botlhe, gore ba ba tshelang ba se tlhole ba itshelela, mme ba tshelele ene yo o suleng a ba a tsoga ka ntlha ya bone.
16Ke gone, ga re tlhole re itse motho ope ka fa nameng; mme le fa re kile ra itse Keresete ka fa nameng, jaanong ga re tlhole re mo itse jalo. 17Ke gone, fa motho a le mo go Keresete, o a ba a le sebopiwa se seša; dilo tsa bogologolo di fetile; bonang, di ntse dintšha. 18Dilo tsotlhe di tswa mo Modimong, o o re itetlanyeditseng ka Keresete, mme tirelo ya tetlano wa e naya rona. 19Ke go re, Modimo o ne o le mo go Keresete, o itetlanya le lefatshe, o sa balele batho ditlolo tsa bone, mme lefoko la tetlanyo wa le naya rona.
20Ke gone, re barongwa mo boemong jwa ga Keresete, go tshwana jaaka e kete Modimo o rapela ka rona. Re a lo rapela mo boemong jwa ga Keresete, ra re, lo letlane le Modimo. 21Ene yo o ne a sa itse boleo bope, o mo dirile go nna boleo mo boemong jwa rona; gore rona re nne tshiamo ya Modimo mo go ene.
