Abesalome o ikaelela go tsogologela Dafite
1Ga dirala ya re morago ga moo, Abesalome a ipaakanyetsa kara le dipitse, le banna ba le 50, ba ba sianang fa pele ga gagwe. 2Abesalome o ne a tle a phakele a ye go ema fa tseleng ya kgotla ya motse; mme go dirale e re fa motho mongwe a na le sengwe se se tshwanetseng go ya go sekwa kwa kgosing, foo Abesalome a mmitse a re: “O motho wa motse ofe?” Mme a re: “Motlhanka wa gago ke wa lotso lwa sennanne lwa ditso tsa Baiseraele.” 3Abesalome a mo reye a re: “Bona, mafoko a gago a molemo a siame; ga go na motho ope yo o beilweng ke kgosi go tla go go utlwa.” 4Gape Abesalome a bue a re: “Ao, a bo nka bo ke beilwe moatlhodi mo lefatsheng, gore motho mongwe le mongwe yo o nang le mafoko kgotsa kgang, a tle mo go nna, mme ke ne ke tlaa mo direla tshiamiso.” 5Mme go dirale go re e ne e re motho mongwe a atamela a tla go mo ikobela, a ntshe letsogo, a mo tshware, a mo atle.
6Mme Baiseraele botlhe ba ba tlang go atlholwa kwa kgosing, Abesalome a ba direle ka mokgwa o o ntseng jaana; mme Abesalome a utswa dipelo tsa batho ba Iseraele.
7Ga dirala ya re kwa bofelong jwa dinyaga di le nne Abesalome a raya kgosi a re: “Ke a go rapela, o mme ke ye go lefa ikano ya me mo Heberone, e ke e ikanetseng Jehofa. 8Gonne e rile motlhanka wa gago a agile kwa Gešure, kwa Siria, ka ikana ka re: ‘Fa ruri Jehofa a tlaa mpusetsa kwa Jerusalema, foo ke tlaa direla Jehofa.’ ”
9Kgosi ya mo raya ya re: “Ya ka kagiso.” Mme a nanoga, a ya Heberone.
10Abesalome a roma ditlhola tsa ya le ditso tsotlhe tsa Iseraele, tsa re: “E tlaa re lo utlwa tumo ya lonaka, foo lo re: ‘Abesalome ke kgosi kwa Heberone!’ ” 11Abesalome a tswa mo Jerusalema a na le banna ba le 200, ba ba laleditsweng, ba tsamaya fela ba se na mogopolo; ba bo ba sa itse sepe. 12E rile Abesalome a sa ntse a isitse ditshupelo, a roma a ya go bitsa Ahithofele wa Mogilo mogakolodi wa ga Dafite, a mo ntsha kwa motseng wa ga gabo, e bong Gilo. Morero o wa gapa batho thata; ka gonne batho ba nna ba ntsifalela kwa go Abesalome ka gale.
Dafite o tswa mo Jerusalema o a tshaba
13Ga tla morongwa kwa go Dafite, a re: “Dipelo tsa banna ba Iseraele di ile le Abesalome.”
14Dafite a raya batlhanka ba gagwe botlhe ba ba nang nae mo Jerusalema, a re: “Tlogang, a re tshabeng; gonne go ka tla ga se ka ga falola ope wa rona mo go Abesalome; itlhaganeleng lo tloge, o ka tla a akofa a re tshwara, a tlisa bosula mo go rona, a kgemetha motse ka bogale jwa tšhaka.”
15Batlhanka ba kgosi ba raya kgosi ba re: “Bona, batlhanka ba gago ba iketleeleditse go dira sengwe le sengwe se kgosi e se ratang.” 16Kgosi ya tswa, le botlhe ba ntlo ya yone ba e sala morago. Mme kgosi ya tlogela basadi ba le some, ba e ne e le bagadingwana, go lebela ntlo.
17Kgosi ya tswa, le batho botlhe ba e sala morago; ba ema kwa ntlong ya bofelo. 18Mme batlhanka botlhe ba yone ba feta ka fa go yone; le Bakerethe botlhe, le Bapelethe botlhe, le Bagite botlhe, banna ba ba 600, ba ba sa leng ba mo sala morago ba tswa kwa Gathe, ba fetela kwa pele ga kgosi. 19Foo kgosi ya raya Itai wa Mogite ya re: “Ana wena o elang le rona? Boa, o sale le kgosi; gonne o moeng, o bile o mofaladi; boela kwa felong ga gago. 20Mme e re ka o tsile maabane fela, a gompieno ke tlaa go kgarakgatsha le rona, ka ke ya fela kwa ke ka yang gone? Boa o bo o buse bomorwa rraago; a boutlwelo botlhoko le boammaaruri bo nne nao.”
21Itai a fetola kgosi a re; “Jaaka Jehofa a tshedile, le jaaka kgosi morena wa me a tshedile, ruri kwa kgosi morena wa me o tlaa nnang gone, kana e le go swa, kana go tshela, motlhanka wa gago le ene o tlaa nna gone fela.”
22Dafite a raya Itai a re: “A re ye koo, o kgabaganye.” Itai wa Mogite a kgabaganya, le batho botlhe ba gagwe le banyana ba o nang nabo. 23Lefatshe lotlhe la lela ka lentswe le legolo, batho botlhe ba kgabaganya; kgosi le yone ya kgabaganya molatswana wa Kiterone, le batho botlhe ba kgabaganya, ba leba kwa tseleng ya naga.
24Mme bonang, Satoke le ene a tla le Balefi botlhe nae, ba rwele letlole la kgolagano ya Modimo; ba rola letlole la Modimo, Abiathare a tlhatloga, ga tsamaya batho botlhe ba feta ba tswa mo motseng. 25Kgosi ya raya Satoke ya re: “Busetsa letlole la Modimo kwa motseng; fa ke bona botsalano mo matlhong a ga Jehofa, o tlaa ba a ntlisa, a ba a mpontsha lone, le boago jwa gagwe. 26Mme e tlaa re fa a bua jaana a re: ‘Ga ke na kgatlhego mo go wena;’ bona, ke fano, a dire ka nna ka fa o bonang go le molemo ka gone.” 27Le gone kgosi ya raya Satoke moperesiti ya re; “A ga o molebi? Boela motseng ka kagiso, le bana ba lona ba babedi ba basimane lo ye nabo, e bong Ahimaase morwao, le Jonathane morwa Abiathare. 28Bona, ke tlaa ema kwa madibogong a a kwa lobaleng, ke leta lefoko le le ka tswang kwa go lona go ntlhomamisetsa.” 29Ke gone ka moo Satoke le Abiathare ba busetsa letlole la Modimo kwa Jerusalema; mme ba nna gone.
30Dafite a tlhatloga mokong wa thabana ya Matlhware, a eta a lela jaaka a tlhatloga; o ne a ikhurumeditse tlhogo, le mo dinaong a sa rwala ditlhako; le batho botlhe ba ba nang nae, mongwe le mongwe a ikhurumetsa tlhogo, ba tlhatloga, ba eta ba lela jaaka ba tlhatloga. 31Mongwe a bolelela Dafite a re: “Ahithofele o mo go bone ba ba rerileng le Abesalome.” Mme Dafite a re: “Jehofa, ke a go rapela, a ko o fetole kgakololo ya ga Ahithofele bonyana fela.”
32Ga dirala ya re Datife a fitlha kwa godimo ga botlhatlogo, kwa Modimo o ne o tle o obamelwe gone, Hušai wa Moareka a tla go mo kgatlhantsha a ikgagotse kobo, le mmu o le mo tlhogong ya gagwe. 33Dafite a mo raya a re: “Fa o feta le nna, o tlaa nna kimelo mo go nna. 34Fa o boela kwa motseng, mme o raya Abesalome o re: ‘Kgosi, ke tlaa nna motlhanka wa gago; jaaka ke ntse ke le motlhanka wa ga rraago mo metlheng e e fetileng; jaana ke tlaa nna motlhanka wa gago jalo’; foo o tlaa bo o ntsupueletsa kgakololo ya ga Ahithofele. 35A ga o na le baperesiti Satoke le Abiathare gone? Ke gone go tlaa dirala go re sengwe le sengwe se o tlaa se utlwang mo ntlong ya kgosi, o tlaa se bolelela baperesiti Satoke le Abiathare. 36Bona, ba na le bana ba bone ba babedi ba basimane, Ahimaase morwa Satoke, le Jonathane morwa Abiathare; mme sengwe le sengwe se lo se utlwang lo tlaa se fitlhisa kwa go nna ka bone.”
37Jalo Hušai tsala ya ga Dafite a tsena mo motseng; le Abesalome a tla mo Jerusalema.
