2 SAMUELE 22

“Jehofa ke lefika la me,

le kago ya me ya phemelo,

le mogolodi wa me,

e bong wa me;

₃Modimo wa lefika la me,

ke tlaa ikanya mo go one;

thebe ya me,

le lonaka lwa poloko ya me,

kago ya me e e godileng,

botshabelo jwa me;

mmoloki wa me,

wa nkgolola mo thubakong.

₄Ke tlaa bitsa Jehofa,

yo o tshwanetseng go bakwa;

jalo ke tlaa gololwa

mo babeng ba me.

₅Gonne makhubu a metsi a loso

a ne a ntsentse gare,

merwalela ya boikepo ya mpoifisa.

₆Megala ya Bobipo e ne e ntharile,

diru tsa loso tsa nkwela.

₇Mo pitlaganong ya me

ka bitsa Jehofa,

Ee, ka tlhaeleletsa

kwa go Modimo wa me;

wa utlwa lentswe la me

o le mo tempeleng ya one,

go goa ga me

ga tsena mo tsebeng tsa one.

₈Foo lefatshe la reketla la roroma,

metheo ya legodimo

ya tshikinyega ya reketlisiwa,

ka one o ne a tuka bogale.

₉Ga kua mosi mo dinkong tsa one,

molelo o o tswang molomong wa

one wa laila;

magala a tshujwa ka one.

₁₀Wa oba le one magodimo,

wa fologa;

go ne go le lefifi le le kwenneng

tlase ga dinao tsa one.

₁₁Wa palama mo tšherubeng,

wa fofa;

Ee, wa bonwa

mo diphukeng tsa phefo.

₁₂Wa dira lefifi

go nna maobo tikologong ya one,

kgobokano ya metsi,

maru a a kwenneng a legodimo.

₁₃Magala a molelo a ne a

tshujwa ka phatsimo

e e fa pele ga one.

₁₄Jehofa a duma

a le kwa legodimong,

Mogodimodimo a ntsha lentswe

la gagwe.

₁₅A hula ka metswi a ba phatlalatsa;

e bong ka dikgadima, a ba alola.

₁₆Foo meedi ya lewatle ya bonala,

metheo ya lefatshe ya senolwa,

ka kgalemo ya ga Jehofa,

ka pudulo

ya mowa wa dinko tsa gagwe.

₁₇A roma a le godimong, a ntsaya;

a ntshwatola mo metsing a magolo;

₁₈a nkgolola

mo mmabeng wa me yo o thata,

mo go bone ba ba nkidileng;

gonne ba ne ba le thata bobe

mo go nna.

₁₉Ba ne ba nkwela

mo motlheng wa tatlhego ya me;

mme Jehofa ya nna ene

seitshegeletso sa me.

₂₀O ne a nntshetsa

kwa felong fa go atlhameng;

a nkgolola, gonne

a kgatlhega thata mo go nna.

₂₁Jehofa, o ne a ntuela

ka fa tshiamong ya me;

a ntefetsa ka fa bontleng

jwa diatla tsa me.

₂₂Gonne ke tshegeditse

ditsela tsa ga Jehofa,

ga ke a tloga mo Modimong

ka go ikepa.

₂₃Gonne dikatlholo tsotlhe tsa gagwe

di ne di le fa pele ga me;

ka ga melao ya gagwe

ga ke a ka ka tloga mo go yone.

₂₄Gape ke ne ke le boitekanelo

fa pele ga gagwe,

ka ithiba mo boikepong jwa me.

₂₅Ke gone ka moo

Jehofa o ne a ntefela

ka fa tshiamong ya me;

ka fa bontleng jwa me

mo ponong ya matlho a gagwe.

₂₆Mo go ba ba kutlwelo botlhoko

o tlaa itshupa kutlwelo botlhoko,

mo go yo o itekanetseng

o tlaa itshupa boitekanelo;

₂₇mo go yo o itshekileng

o tlaa itshupa boitsheko;

mo go yo o logwadi,

o tlaa itshupa lesoko.

₂₈Batho ba ba patikegang

o tlaa ba boloka;

mme matlho a gago

o mo go ba ba ipegang,

gore o tle o ba kokobetse.

₂₉Gonne ke wena lobone lwa me,

Jehofa; o tlaa bonesa lefifi la me.

₃₀Gonne ke sotlhomela lesomo

ka wena;

ke tlola lorako ka Modimo wa me.

₃₁Ka ga Modimo,

tsela ya one e itekanetse;

lefoko la ga Jehofa le lekilwe;

ene, ke thebe ya botlhe

ba ba mo ikanyang.

₃₂Gonne Modimo e mang,

fa e se ene Jehofa?

Le gone lefika ke mang,

fa e se Modimo wa rona?

₃₃Modimo ke one kago ya me

e e thata ya phemelo;

o goga moitekanedi

mo tseleng ya one.

₃₄O dira dinao tsa gagwe

go nna jaaka ditlhako tsa kwalata,

mme o mpeye mo mafelong a me

a a godimo.

₃₅O ruta diatla tsa me go tlhabana;

jalo mabogo a me

a ba a tle a obe bora jwa kgotlho.

₃₆O bile o nneile

thebe ya poloka ya gago;

bopelonamagadi jwa gago

bo ntirile mogolo.

₃₇Dikgato tsa me

o di atlhamoloseditse tlase ga me,

dinao tsa me ga di a relela.

₃₈Ke konateletse baba ba me,

ke ba sentse;

le gone ga ke a ka ka bowa

ba ise ba nyelediwe pele.

₃₉Ke ba gaitse,

ka ba phololetsa,

ba ba ba retelelwa ke go tsoga;

Ee, ba wetse fa tlase

ga dinao tsa me.

₄₀Gonne o ntlametse

go tlhabana ka nonofo,

o kokobeditse fa tlase ga me

bone ba ba neng ba ntsogologela.

₄₁Gape o dirile gore

baba ba me ba nnee dikotla,

gore ke tle ke tlose

bone ba ba nkilang.

₄₂Ba ne ba leba,

mme go ne go se na ope

yo o bolokang;

ba leba e bong kwa go Jehofa,

mme a se ka a ba araba.

₄₃Foo ka ba ngotangota bosesane,

jaaka lorole lwa lefatshe,

ka ba šobotla

jaaka moraga wa mebila,

ka ba phatlalatsa.

₄₄E bile o nkgolotse

mo dipetapetanong

tsa batho ba gaetsho;

o ntshegeditse

go tla ke nna tlhogo ya merafe;

tšhaba e ke iseng ke e itse

e tlaa ntirela.

₄₅Baeng ba tlaa inkokobeletsa;

e tlaa re ba itlhoma ba nkutlwela,

boo ba ineela fela.

₄₆Baeng ba tlaa tlhotlhorega,

ba tlaa tla ba roroma

ba tswa mo maitshubelong a bone.

₄₇Jehofa o tshedile;

a go bakwe lefika la me;

a go goletsege

Modimo wa lefika la poloko

ya me;

₄₈e bong Modimo

o o dirafatsang pusoloso ka ga me,

o kokobeletse ditšhaba

fa tlase ga me;

₄₉e le o o ntshawatolang

mo babeng ba me;

Ee, o a ntsholetsa,

o mpaya godimo ga bone

ba ba ntsogologelang;

wa nkgolola

mo monneng yo o thubakang.

₅₀Ke gone ka moo

ke tlaa go lebogang, Jehofa,

mo gare ga merafe,

ke tlaa opelela

leina la gago dipako.

₅₁O naya kgosi ya gagwe

kgololo e kgolo;

o itshupa bopelonomi

mo go motlodiwa wa gagwe,

mo go Dafite le losika lwa gagwe

ka bosakhutleng.”