2 BATHESALONIKA 3

₁Sa bofelo, bagaetsho, lo re rapelele, gore lefoko la Morena le siane, le galalediwe, fela jaaka le ntse mo go lona, ₂le gore re gololwe mo bathong ba ba se nang megopolo, le ba ba bosula, gonne batho ga ba na tumelo botlhe.

₃Morena o boikanngo, yo o tlaa lo tlhomamisang, a ba a lo dibela mo go yo o bosula. ₄Re ikantse mo Moreneng ka ga lona, gore lo ntse lo a dira, le gone lo tlaa nna lo dira dilo tse re di laolang.

₅A Morena a gogele dipelo tsa lona mo loratong lwa Modimo, le mo bopeloteleleng jwa ga Keresete.

₆Jaana re a lo laola, bagaetsho, mo ineng la Morena wa rona Jesu Keresete, gore lo ikgoge mo go mokaulengwe mongwe le mongwe yo o tsamayang ka go tlhokomologa molao, a sa tsamaye ka fa dipolelong tse ba di amogetseng mo go rona. ₇Gonne lo a itse ka losi ka fa lo tshwanetseng go etsa rona ka teng, gonne ga re a ka ra dira ka go tlhokomologa molao mo go lona; ₈le gone ga re a ka ra jela motho ope dijo ka lefela, fa e se ka mofufutso le thekisego, re dira bosigo le motshegare, gore re se ka ra imela ope wa lona. ₉Ga se go re, ga re na tshiamelo ya gone, e le go re re itire sekao mo go lona, gore lo etse rona. ₁₀Gonne le e rile re le mo go lona, ra lo laola jalo ra re: Fa mongwe a gana go dira, le gone a se ka a ja.

₁₁Gonne re utlwa ka ga bangwe ba ba tsamayang ka go tlhokomologa molao mo go lona, ba ba se keng ba dira gope, mme e le balotlhanyi fela. ₁₂Jaana ba ba ntseng jalo re a ba laola, re ba re ba laya mo ineng la Morena Jesu Keresete, gore ba dire ka tidimalo, ba je dijo tse e leng tsa bone. ₁₃Mme lona, bagaetsho, lo se ka lwa lapa mo go direng molemo. ₁₄Fa motho mongwe a sa utlwe lefoko la rona ka lokwalo lo, lo ele motho yoo tlhoko, gore lo se nne bokopano nae, gore a tlhajwe ke ditlhong. ₁₅Le fa go ntse jalo lo se ka lwa mo kaya mmaba, mme lo mo tlhagise jaaka mokaulengwe.

₁₆Jaana a Morena wa kagiso ka esi a lo neye kagiso ka metlha yotlhe, ka mekgwa yotlhe. A Morena a nne le lona lotlhe. ₁₇Tumediso ya me ke le Paulo e kwadilwe ka seatla sa me, se e leng sone sesupo mo lokwalong longwe le longwe, ke kwala fela jalo. ₁₈A tshegofatso ya Morena wa rona Jesu Keresete e nne le lona lotlhe.