Loeto lwa ga Paulo go ya Jerusalema
1Ga dirala, ya re re sena go kgaogana nabo ra tsamaya ka sekepe, ra tlhamalalela fela kwa Kose, mme ya re ka moso ra fitlha kwa Rotese, ra tswa foo ra ya kwa Patara. 2Ya re ka re fitlhela sekepe se se tlolaganyetsang kwa Fenikia, ra tsena mo go sone, mme ra tswelela. 3Ya re re sena go fitlha fa Kupero o bonalang teng, ra o ntela kwa ntlheng ya la molema, ra ya go fitlha kwa Siria, ra tswa mo sekepeng kwa Ture; gonne ke teng fa sekepe se tlaa olololelwang teng. 4E re ka re fitlhetse barutwa, ra tlhola malatsi a supa teng, mme ba tlhagisa Paulo ka Mowa ba re a se ka a ya go gata mo Jerusalema. 5Ga dirala, ya re re sena go wetsa malatsi ao, ra tsamaya, ra tswelela mo loetong lwa rona; mme bone botlhe, ka basadi le bana, ba re buledisa, ba re ntsha mo motseng; mme ra khubamela fa mošaweng wa lewatle, ra rapela. 6Ra dumedisa; rona ra tsena mo sekepeng, mme bone ba ba ba boela kwa gae.
7E rile re sena go wetsa loeto lwa ka sekepe go tswa kwa Ture, ra fitlha mo Petolemaia; mme ra dumedisa bakaulengwe, ra tlhola nabo letsatsi le le lengwe fela. 8Ya re ka moso ra tsamaya, ra fitlha kwa Kaesarea, mme ra tsena mo ntlong ya ga Filipo mmoledi wa Mafoko a a Molemo, yo e ne e le mongwe wa bale ba ba supa, mme ra nna nae. 9Monna yoo o ne a na le bana ba basetsana ba le bane, ba ba perofesang, e le makgarebane. 10Ya re re ntse re tlhotse teng malatsi a le mantsi, ga fologa moperofeti mongwe a tswa Jutea, go twe Agabuse. 11Ya re a fitlha mo go rona, a tsaya moitlamo wa ga Paulo, a ipofa maoto le mabogo ka one, a re: “Mowa o o Boitshepo o bua jaana wa re: ‘Bajuta ba ba kwa Jerusalema ba tlaa bofa jalo monna yo e leng ene mong wa moitlamo o, ba tlaa mo tsenya mo diatleng tsa Baditšhaba!’ ”
12Ya re re utlwa dilo tse, go le rona, go le bone ba felo foo, ra mo rapela, gore a se ka a tlhatlogela kwa Jerusalema. 13Foo Paulo a ba fetola a re: “Lo dirang, ka lo lela lo mphatlola pelo? Gonne ke iketleditse, e seng go golegwa go le gosi, mme le gone go swela leina la Morena Jesu kwa Jerusalema.”
14Ya re a gana go rapelesega, ra khutla, ra re: “A go rata ga Morena go dirafale.”
15Ya re morago ga malatsi ao, ra baakanya makokoma a rona, ra tlhatlogela kwa Jerusalema. 16Ra tsamaya le bangwe ba Kaesarea, ba na le mongwe go twe, Menasone wa Kupero, e le morutwa wa bogologolo, yo re yang go nna mo ntlong ya gagwe.
Paulo o etela Jakobe
17E rile re sena go fitlha mo Jerusalema, bakaulengwe ba re tshola ka boitumelo. 18Ka moso ra tsena le Paulo kwa go Jakobe; mme bagolwane botlhe ba bo ba le teng. 19Ya re a sena go ba dumedisa, a ba tlhatlologanyetsa dilo tse Modimo o di dirileng mo go Baditšhaba ka tirelo ya gagwe. 20Bone ya re ba utlwa, ba galaletsa Modimo; ba mo raya ba re: “O a bona mokaulengwe, go na le batho ba le bantsintsi ba Bajuta, ba ba dumetseng; botlhe ke ba ba tlhoafaletseng molao, 21ba boleletswe ka ga gago, fa o ruta Bajuta botlhe ba ba mo go Baditšhaba, gore ba tlhoboge Moše, o ba raya gore ba se rupise bana ba bone, le fa e le go tsamaya ka fa mekgweng. 22Mme gone go ka tweng? Le gale ba tlaa utlwa fa o gorogile. 23Ra re, dira se re se go rayang: Re na le banna ba le bane ba ba nang le ikano; 24ba tseye, o ye go itshekisiwa nabo, o ba duelele, gore ba tle ba beolwe ditlhogo; mme botlhe ba tlaa itse fa go se na mabolelelaruri mo dilong tse ba di boleletsweng ka ga gago; mme ba fitlhele le wena o tsamaya ka molemo, o tshegeditse molao. 25Mme ka ga Baditšhaba ba ba dumetseng, re kile ra kwala, ra atlhola gore ba ithibe mo dilong tse di isediwang medimo ya disetwa ditlhabelo, le mo mading a dilo tse di tlhabilweng, le mo se se betilweng, le mo boakeng.”
26Foo Paulo a tsaya banna bao, ya re ka moso a itshekisiwa nabo, mme a tsena mo tempeleng, a supa fa malatsi a go itshekisiwa a dirafetse, a ba a nna teng ga tsamaya tshupelo ya isediwa mongwe le mongwe wa bone.
Paulo o tshwarwa mo tempeleng
27E rile malatsi a supa a setse a batlile go feta, Bajuta ba ba tswang kwa Asia, ya re ba mmona mo tempeleng, ba feretlha bontsi jotlhe jwa batho, mme ba mo tsenya diatla. 28Ba goa ba re: “Banna ba Iseraele, thusang! Monna yo ke ene yo o rutang batho botlhe mo ntlheng tsotlhe, gore ba tlhoboge batho, le molao, le felo fa; gape o lerile le Bagerika mo tempeleng, mme o itshekolotse felo fa, fa go boitshepo.” 29Gonne ba kile ba mmona mo motseng a na le Terofimo wa Moefesia, yo ba itlhomileng gore Paulo o mo isitse mo tempeleng.
30Motse otlhe wa tsebeega, batho ba kgobokana, mme ba tshwara Paulo, ba mo swabolela kwa ntle ga tempele; mme ga akofa ga tswalwa. 31Ya re ba ntse ba senka go mmolaya, ga bolelelwa mong wa mophato wa batlhabani gore motse otlhe wa Jerusalema o feretlhegile. 32Mme a akofa a tsaya batlhabani, le balaodi ba mephato, a ba tshologela; mme bone ya re ba bona mong wa mephato le batlhabani, ba khutla go betsa Paulo. 33Foo mong wa mephato a atamela, a mo tshwara, a laola gore a golegwe ka diketane di le pedi; mme a botsa gore ke mang, le se o se dirileng. 34Mme mo bontsing, bangwe ba goa se, ba bangwe ba goa se sele; e rile a retelelwa ke go itse tlhomamo ka ntlha ya magawegawe, a laola gore a isiwe mo kagong ya batlhabani. 35O rile a fitlha fa mapalamong, a bo a setse a rwelwe fela ke batlhabani, ka ntlha ya bogale jwa batho; 36gonne bontsintsi jwa batho jwa ba sala morago, ba goa ba re: “A a bolawe!”
Paulo o a iphemela
37Ya re fa Paulo a tlaa isiwa mo kagong ya batlhabani, a raya mong wa mephato a re: “Tswee a nka bua selo sengwe nao?” Mme a re: “A o itse Segerika? 38E ntse jaana a ga se wena Moegepeto yole, yo e rileng mo metlheng ele a ikepa bogosi, a ba a gogela babolai bale ba ba 4 000 kwa nageng?”
39Mme Paulo a re: “Ke Mojuta wa Tareso wa Kilikia, ke motho wa motse o o seng mmotlana; mme ke a go rapela, o mme ke bue le batho ba.”
40Ya re a sena go mo leseletsa, Paulo a ema mo mapalamong, a gwetlha batho ka seatla; e rile go sena go nna tidimalo e kgolo, a bua nabo ka puo ya Sehebere a re:
