DITIRO 22

₃“Ke Mojuta, ke tsaletswe mo Tareso wa Kilikia, ka godisiwa mo motseng ono, fa dinaong tsa ga Gamaliele, ka rutwa ka fa mokgweng o o gagametseng wa borraetsho, ke le tlhoafalo ka ga Modimo, fela jaaka lona lotlhe gompieno. ₄Ka bogisetsa Tsela e, le kwa losong, ke golega banna le basadi, ke ba isa mo matlong a kgolegelo, ₅jaaka le ene moperesiti yo mogolo a ka supa ka ga me, le lesomo lotlhe la bagolwane, ba ke bileng ka tshola mo go bone dikwalo tse ke yang ka tsone kwa bakaulengweng; ka etela kwa Damaseko, ke ya go lere ba ba teng, ke ba tlisa Jerusalema ba golegilwe, gore ba sekisiwe.

₆“Ya re ke etile, mme ke atamela Damaseko, go le motshegare, ka tshoga ka lesedi le legolo, le le tswang legodimong, le phatsima mo tikologong ya me. ₇Ka wela fa fatshe, ka utlwa lentswe le nthaya le re: ‘Saule, Saule, ana o mpogisetsang?’ ₈Mme ka fetola ka re: ‘O mang Morena?’ Mme a nthaya a re: ‘Ke Jesu wa Nasaretha, yo o mmogisang.’ ₉Le gale ba ke ne ke na nabo ba bona lesedi, mme ba se ka ba utlwa lentswe la yo o mpuisang. ₁₀Mme ka re: ‘Ke tlaa dirang, Morena?’ Mme Morena a nthaya a re: ‘Nanoga, o ye o tsene mo Damaseko; o tlaa bolelelwa teng ka ga dilo tsotlhe tse o di laoletsweng go di dira.’ ₁₁E rile ke retelelwa ke go bona, ka ntlha ya kgalalelo ya lesedi leo, ka gogwa ka seatla ke ba ke nang nabo, mme ka fitlha mo Damaseko.

₁₂“Mongwe go twe Ananiase, e le motho yo o rapelang Modimo ka fa molaong, a bolelwa ka molemo ke Bajuta botlhe ba ba agileng teng, ₁₃a tla kwa go nna; mme ya re a eme fa go nna, a nthaya a re: ‘Mokaulengwe Saule, foufologa.’ Mme ka mo leba fela ka matlho ka lone lobaka loo. ₁₄Mme a re: ‘Modimo wa borraetsho o go laotse gore o itse go rata ga one, le gore o bone Mosiami, le go utlwa lentswe le le tswang mo molomong wa gagwe. ₁₅Gonne o tlaa nna mosupi wa gagwe mo bathong botlhe, wa se o se bonyeng, le se o se utlwileng. ₁₆Jaana o diegelang? Nanoga, o kolobediwe, o itlhapise dibe, ka go bitsa leina la gagwe.’

₁₇“Ga dirala, e rile ke boetse Jerusalema, ke sa ntse ke rapela mo tempeleng, ya ne e kete ke wela mo tsitegong ya pelo; ₁₈mme ka mmona a nthaya a re: ‘Itlhaganele, o tswe mo Jerusalema ka bonako, gonne ga ba ketla ba tshola tshupo ka ga me mo go wena.’ ₁₉Ka re: ‘Morena, le bone ka bosi ba a itse fa ke ba tsentse mo kgolegelong, ka ba ka ba betsa mo matlong a thuto otlhe fela; e bong bone ba ba dumetseng mo go wena. ₂₀E rile madi a ga Setefane, mosupi wa gago, a tshololwa, le nna ka bo ke eme teng ke dumalanye nabo, ke bile ke tshotse dikobo tsa bone ba ba mmolaileng.’ ₂₁A nthaya a re: ‘Tloga o tsamaye; gonne ke tlaa go romela kgakala kwa go Baditšhaba.’ ”

₂₂Mme ba nna ba mo reetsa go tla go fitlha mo lefokong le; foo ba tlhatlosa mantswe ba re: “A motho yo o ntseng jaana a tlosiwe mo lefatsheng, gonne ga go a tshwanela fa a ka tshela!” ₂₃Ya re ba thela lošalaba, ba apola dikobo, ba kubuela lorole. ₂₄Mong wa mephato a laola gore a isiwe mo kagong ya batlhabani, a re a lotolodiwe ka titeo, gore a tle a itse ka fa ba mo thomeleletsang jalo ka teng. ₂₅E rile ba sena go mo golega ka dikgole, Paulo a raya molaodi wa mophato yo o emeng fa go ene a re: “A go letleletswe go seola motho yo e leng Moroma, a bile a ise a bone tsheko?”

₂₆E rile molaodi wa mophato a utlwa jalo, a ya kwa go mong wa mephato, a mmolelela a re: “O a bo o re o dirang? Gonne motho yo ke Moroma.”

₂₇Mong wa mephato a tla, mme a mo raya a re: “Mpolelela, a o Moroma?” Mme a re: “Ee.”

₂₈Mong wa mephato a mo fetola a re: “Boemo joo jwa bongwana jwa motse, ke bo rekile ka madi a magolo.” Paulo a re: “Nna, ke tsetswe ke le Moroma.”

₂₉Foo ba ba reng ba mo lotolotsa, ba akofa ba kgaogana nae; le ene mong wa mephato a boifa, a sena go itse fa e le Moroma, le ka go bo a ne a mo golegile.

₃₀E rile ka moso, ka a rata go itse tlhomamo ya ka fa o bewang molato ke Bajuta ka teng, a mo golola, a laola gore ditlhogo tsa baperesiti le ba lekgotla botlhe ba phuthege, mme a folosa Paulo, a mmaya fa pele ga bone.