DITIRO 26

₁Ageripa a raya Paulo a re: “O leseleditswe go ipuelela.” Foo Paulo a otlolola letsogo, a ikarabela a re:

₂“Ke ipona fa ke le sego, kgosi Ageripa, ka ke na le go ikarabela fa pele ga gago gompieno, ka ga dilo tsotlhe tse ke beilweng molato ka tsone ke Bajuta, ₃bogolo ka kgosi e na le kitso ka ga mekgwa yotlhe le dikgang tsa Bajuta; ke gone ke a go rapela ka re, o ntheetse ka pelotelele.

₄“Ka re, mokgwa wa go tshela ga me, le mo bokaung jwa me, o ke sa leng ke o simolola ke le mo morafeng wa gaetsho le mo Jerusalema, Bajuta botlhe ba a o itse; ₅ka ba sa le ba nkitse ka tshimologo, fa ba ne ba rata, ba ka supa fa ke ne ke le Mofarisai yo ke tshelang ka fa mokgweng wa lefoko la tumelo ya rona, le e leng lone le nang le melao e e gagametseng thata. ₆Gompieno ke eme fa, gore ke sekisiwe ka ga lefoko la tsholofetso le le sa leng le newa borraetsho ke Modimo, ₇e e leng lone ditso tsa rona tse di 12 di solofelang go e fitlhela, ka go direla Modimo ka tlhoafalo bosigo le motshegare. Kgosi, ke bewa molato ke Bajuta ka ga tsholofelo eo! ₈Ana go ntse jang, fa go kaiwa ke lona fa e le mo go sa dumelesegeng, fa Modimo o tsosa baswi?

₉“Ruri ke itheile ka re ke tshwanetse go dira dilo di le dintsi tse di tlhabanang le leina la ga Jesu wa Nasaretha. ₁₀Mo, ke bile ka go dira mo Jerusalema; ka tswalela baitshepi ba le bantsi mo matlong a kgolegelo, ke sena go newa taolo ke ditlhogo tsa baperesiti, mme e ne e re ba bolawa, le nna ke ntshe lefoko la me la go dumalana nago. ₁₁Ka ba betsa gantsi mo matlong a thuto otlhe, ke leka gore ba tlhapatse; ya re ka ke ba gakaletse thata, ka ba bogisetsa le kwa metseng ya mafatshe a sele.

₁₂“E rile ke etela kwa Damaseko ka tiro e e ntseng jalo, ke bile ke tshotse thata le taolelo mo ditlhogong tsa baperesiti, ₁₃ya re motshegare, kgosi, ke le mo tseleng, ka bona lesedi le le tswang legodimong, le gaisa phatsimo ya letsatsi, le phatsima mo tikologong ya me le ya ba ke etileng nabo. ₁₄E rile re wetse rotlhe fa fatshe, ka utlwa lentswe le nthaya ka puo ya Sehebere, la re: ‘Saule, Saule, o mpogisetsang? Go thata mo go wena go raga setlhabi.’ ₁₅Ka re: ‘O mang, Morena?’ Morena a re: ‘Ke nna Jesu yo o mmogisang. ₁₆Tsoga, o eme ka dinao; gonne ke go bonaletse gone moo, gore ke go dire modiredi le mosupi wa dilo tse o mponyeng mo go tsone, le wa dilo tse ke tlaa bonalang kwa go wena ka tsone; ₁₇ke go golola mo bathong, le mo go Baditšhaba, ba ke go romang kwa go bone. ₁₈O ya go ba budulola matlho, gore ba tswe mo lefifing, ba sokologele mo leseding, ba tswe mo thateng ya ga Satane, ba sokologele mo Modimong, gore ba bone boitshwarelo jwa dibe, le boswa mo go ba ba itshepisitsweng ka go dumela mo go nna.’

₁₉“Ke gone kgosi Ageripa, ga ke a ka ka nna bokaka ka ga ponatshegelo e ya selegodimo, ₂₀mme ka bolela mo go ba Damaseko pele, le kwa Jerusalema, le mo lefatsheng lotlhe la Jutea, le mo go Baditšhaba ka re, ba tshwanetse go ikwatlhaya le go sokologela mo Modimong, ba dira ditiro tse di tshwanetseng boikwatlhao. ₂₁Mme Bajuta ba ntshwara mo tempeleng ka ntlha ya gone moo, mme ba leka go mpolaya. ₂₂E re ka ke bonye thuso e e tswang mo Modimong, ke ntse ke eme le gompieno, ke supetsa bannye le bagolo, ke sa bue sepe fa e se se baperofeti le Moše ba rileng se tlaa tla: ₂₃e bong gore, Keresete o na le go swa, le gore ke ene wa pele yo o tlaa bolelang lesedi mo bathong, le mo go Baditšhaba, ka go tsoga mo baswing.”

₂₄Ya re a ntse a ikarabela jalo, Feseto a bua ka lentswe le legolo a re: “Paulo o a tsenwa; go rutega thata ga gago go a go tsentsha.”

₂₅Paulo a re: “Ga ke tsenwe, Motlotlegi Feseto; ke bua mafoko a boammaaruri le a boitekanelo. ₂₆Gonne kgosi e itse dilo tse, e ke bileng ke bua ke phuthologile fa pele ga yone; gonne ke a dumela fa go se na sepe sa dilo tse se se fitlhegetseng kgosi; gonne mo ga go a ka ga direlwa mo kgokgotshong. ₂₇Kgosi Ageripa, a o dumela baperofeti? Ke a itse fa o dumela.”

₂₈Mme Ageripa a raya Paulo a re: “O a bo o rata go nkgona go nna Mokeresete ka go mpuisa go le gonnye fela.”

₂₉Paulo a re: “Le fa e ka bo e le ka bonnye le fa e le ka bogolo, Modimo o ka ka wa mma, gore e seng wena wesi, e leng botlhe ba ba nkutlwang gompieno, ba nne jaaka nna, ke sa reye dikgole tse.”

₃₀Mme kgosi ya nanoga, le molaodi, le Berenise, le ba ba dutseng nabo; ₃₁ya re ba ile fa thoko, ba bua mmogo ba re: “Monna yo, ga a a dira sepe se se tshwanetseng loso le fa e le dikgole.” ₃₂Mme Ageripa a raya Feseto a re: “Monna yo o ka bo a golotswe, fa a ne a se ka a ipiletsa Kaesare.”