DITIRO 7

₁Moperesiti yo mogolo a re: “A dilo tse di ntse jalo?”

₂Ene a re: “Bana ba ga rra le borra, reetsang, Modimo wa kgalalelo o kile wa bonala kwa go rraetsho Aberahame, a le kwa Mesopotamia, a ise a ye kwa Harane, ₃wa mo raya, wa re: ‘Tloga mo lefatsheng la ga eno, le mo ditsaleng tsa gago, o ye kwa lefatsheng le ke tlaa le go bontshang.’ ₄Foo a tswa mo lefatsheng la Bakalatea, a aga mo Harane. E rile rraagwe a sena go swa, Modimo wa mo hudusa teng, wa mo hudusetsa mo lefatsheng leno, le lo agileng mo go lone gompieno. ₅Mme wa se ka wa mo naya boswa bope mo go lone, le fa e le mo go kanang ka fa o ka tlhomang lonao lwa gagwe teng; mme wa mo solofetsa gore o tlaa le mo naya boswa, le losika lwa gagwe, go le rua morago ga gagwe; le mororo o ne a ise a ka a dirane le ngwana. ₆Modimo wa bua jaana gore losika lwa gagwe lo tlaa ya go jaka mo lefatsheng la seeng, mme ba tlaa ba ntsha batlhanka, ba ba direla maswe ka dinyaga di le 400. ₇‘Mme morafe o ba tlaa nnang batlhanka ba one, ke tlaa o sekisa,’ go bua Modimo; ‘morago ga moo ba tlaa tswa, mme ba tlaa ntirela mo felong fa.’ ₈Wa mo naya kgolagano ya bogwera; jalo Aberahame a tsala Isake, mme a mo rupisa ka letsatsi la bo 8; Isake a tsala Jakobe, Jakobe a tsala ditlhogo tsa ditso tse 12.

₉“E rile ka ditlhogo tse tsa ditso di tlhotlhelediwa ke lefufa ka ga Josefe, tsa mo rekisa, mme a isiwa Egepeto: mme Modimo wa nna nae, ₁₀wa mo golola mo dipitlaganong tsotlhe tsa gagwe, wa mo naya letlhogonolo le botlhale fa pele ga Faro kgosi ya Egepeto; a mmaya molaodi mo Egepeto le mo ntlong yotlhe ya gagwe. ₁₁Jaana ga tla leuba mo lefatsheng lotlhe la Egepeto le la Kanana, le pitlagano e kgolo; mme borraetsho ba se ka ba bona diotlo dipe. ₁₂E rile Jakobe a utlwa fa go na le mabele kwa Egepeto, a roma borraetsho teng lwa ntlha. ₁₃Ya re ba ile lwa bobedi, Josefe a itsisiwe bana ba ga rraagwe; mme losika lwa ga Josefe lwa senogela Faro. ₁₄Josefe a roma a ya go bitsa rraagwe le losika lotlhe lwa gagwe, e le batho ba ba 75. ₁₅Jakobe a fologela kwa Egepeto; mme a swa, ene le borraetsho. ₁₆Ba rwalelwa kwa Shekeme, ba bewa mo phupung e Aberahame o ne a e rekile mo Shekeme mo go bomorwa Hamore, ka tlhwatlhwa ya selefera.

₁₇“E rile motlha o atamela wa lefoko la tsholofetso le Modimo o le neileng Aberahame, sešaba sa gola sa ata mo Egepeto, ₁₈ga ba ga tla ga tsoga kgosi e sele ya Egepeto, e e sa itseng Josefe. ₁₉Ene a direla losika lwa rona ka boferefere, a patika borraetsho ka mo go botlhoko, e bong gore ba latlhe banyana ba bone, gore ba se ka ba tshela. ₂₀Mme ya re ka lobaka loo, Moše a tsalwa, mme a bo a le montle thata; a otlwa ka dikgwedi di le tharo mo ntlong ya ga rraagwe. ₂₁Ya re a sena go latlhwa, morwadia Faro a mo thwala, a mo ikotlela gore a nne ngwana wa gagwe. ₂₂Moše a rutwa botlhale jotlhe jwa Baegepeto; a nonofa mo puong le mo ditirong.

₂₃“E rile a setse a le gaufi le go nna dinyaga di le 40, a tshogana ka pelo ya gagwe e rata go ya go lekola bana ba ga rraagwe, e bong bana ba Iseraele. ₂₄Mme ya re a fitlhela mongwe wa bone a patikwa, a mo femela, a busolosetsa yo o patikwang, a bolaya Moegepeto. ₂₅A itlhoma ba ga gabo ba tlhalogantse fa Modimo o ba direla kgololo ka seatla sa gagwe; mme ga ba a ka ba tlhaloganya. ₂₆Ya re ka moso a bonala mo go bone ba lwa, a rata go ba letlanya a re: ‘Banna, lo bana ba monna; ana lo patikanelang?’ ₂₇Mme yo o patikang mongwe ka ene, a mo kgorometsa a re: ‘E mang yo o go beileng molaodi le moatlhodi mo go rona? ₂₈A o rata go mpolaya, jaaka o letse o bolaile Moegepeto maabane?’ ₂₉Moše a tshaba ka lefoko le, a feta a nna mojaki fela mo lefatsheng la Midiane, kwa o bonyeng bana ba basimane ba le babedi teng.

₃₀“E rile dinyaga di sena go feta di le 40, moengele a bonala kwa go ene ka kgabo ya molelo mo setlhareng, a le mo nageng ya thaba ya Sinai. ₃₁E rile Moše a bona, a gakgamalela se o se bonang; ya re a atamela a ya go bona, ga tla lentswe la ga Jehofa la re: ₃₂‘Ke nna Modimo wa borraeno, Modimo wa ga Aberahame, wa ga Isake, le wa ga Jakobe.’ Moše a roroma, mme a sa ka ke a leka go leba. ₃₃Mme Jehofa a mo raya a re: ‘Rola ditlhako mo dinaong tsa gago, gonne felo fa o emeng teng ke mmu o o itshepileng. ₃₄Ruri ke bonye pitlagano ya batho ba me ba ba kwa Egepeto, ke utlwile go fegelwa ga bone, ke fologile ke tsile go ba golola, mme jaana ntlo, ke tlaa go roma kwa Egepeto.’

₃₅“Moše yo, yo ba mo ganneng ba re: ‘E mang yo o go beileng molaodi le moatlhodi?’ Ke ene yo Modimo o mo romileng, a ya go nna molaodi le mogolodi, ka seatla sa moengele yo o bonetseng kwa go ene mo setlhareng. ₃₆Monna yo a ya a ba ntsha a sena go dira dikgakgamatso, le ditshupo mo Egepeto, le mo Lewatleng le Lehibidu, le mo nageng ka nyaga di le 40. ₃₇Moše yo, ke ene yo o reileng bana ba Iseraele a re: ‘Modimo o tlaa lo tsosetsa moperofeti wa bana ba rraeno, jaaka o tsositse nna.’ ₃₈Yo, ke ene yo o ne a le mo phuthegong mo nageng, a na le moengele yo o buileng nae mo thabeng ya Sinai, a ba a bua le borraetsho, ke ene yo o amogetseng mantswe a a tshedileng go tla a a re naya.

₃₉“Yo borraetsho ba ganneng go mo ineela, ba mo kgorometsa mo go bone, mme mo pelong tsa bone ba boela kwa Egepeto. ₄₀Ba raya Arone ba re: ‘Re direle medimo e e tlaa re etelelang pele; gonne yo, Moše, yo o re ntshitseng mo lefatsheng la Egepeto, ga re itse kwa o ileng teng.’ ₄₁Ba dira namane mo metlheng eo, ba isetsa setshwantsho seo setlhabelo, ba itumelela ditiro tsa diatla tsa bone. ₄₂Mme Modimo wa retologa, wa ba leseletsa ba direla lesomosomo la dilo tsa legodimo; jaaka go kwadilwe mo lokwalong lwa baperofeti ga twe:

₄₄“Borraetsho ba ne ba na le motlaagana wa tshupo mo nageng, fela jaaka go laotse ene yo o buileng le Moše, gore a o dire ka fa setshwantshong se o kileng a se bona. ₄₅E bile e le one o borraetsho le bone ba o gorositseng ba na le Jošua, jale ka ba tsena mo bosweng jwa ditšhaba tse Modimo o ntseng wa nna wa di leleka fa pele ga matlho a borraetsho, go tla go fitlha mo motlheng wa ga Dafite; ₄₆yo o bonyeng letlhogonolo mo matlhong a Modimo, mme a lopa gore a bonele Modimo wa ga Jakobe bonno, ₄₇mme Solomone a o agela ntlo.

₄₈“Le fa go ntse jalo, Mogodimodimo ga a age mo matlong a a agilweng ke diatla; jaaka go bua moperofeti ₄₉a re:

₅₁“Lona ba lo thamo di thata, ba lo sa rupang mo dipelong le mo ditsebeng, lo a bo lo ntse lo ganela le Mowa o o Boitshepo. Jaaka borraeno ba kile ba nna ba dira, le lona lo dira jalo. ₅₂Ana ke ofe wa baperofeti yo borraeno ba se kang ba mmogisa? Ba bolaile ba ba supileng gale ka ga go tla ga Mosiami; yo lona gompieno lo duleng baoki le babolai ba gagwe; ₅₃e bong lona ba lo amogetseng molao, o ntse fela jaaka o sa le o tlhongwa ke baengele, mme lwa se ka lwa o boloka.”

₅₄Jaana e rile ba utlwa dilo tse, ba segega mo pelong, ba mo šenela meno. ₅₅Mme ene ka a tletse Mowa o o Boitshepo, a nna a lelalela legodimong fela, mme a bona kgalalelo ya Modimo, le Jesu a eme ka fa letsogong le legolo la Modimo, ₅₆a re: “Bonang, ke bona magodimo a atlhamologile, le Morwa Motho a eme ka fa letsogong le legolo la Modimo.”

₅₇Mme ba goa ka lentswe le legolo, ba ithiba ditsebe, ba mo seogelela gongwe, ₅₈ba ya ba mo latlhela kwa ntle ga motse, ba mo kgobotletsa ka maje; mme basupi ba baya diaparo tsa bone fa dinaong tsa lekau lengwe le le bidiwang Saule. ₅₉Ba kgobotletsa Setefane ka maje, a ntse a bitsa Morena a re: “Morena Jesu, amogela mowa wa me.” ₆₀Mme a khubama, a bua ka lentswe le legolo a re: “Morena, o se ka wa ba balela boleo jo.” Ya re a sena go bua jalo, a robala.